1Sam. 8 - BUKO SIPUNENAN

Paamian Israel masitiddou sara rimata

¹ Kele aimabaja si Samuel, rioakenangan tatogania ibailiu sipasiukum ka Israel.

² Togania sikebbukat sipuoni Jo'el samba sikarua Abia. Sia sibailiu sipasiukum ka Bersyeba.

³ Tapoi ta aratutnake paraboat ukkuira, tapoi sarat masikukru uktukda saratda le. Masisilo bulagat sibara ka enungan sitaimaroipo samba masiukum siberikabaga ka enungan sitaimaroipo.

⁴ Lulut nenda parururangan sikebbukat laggai Israel, lepa ei sia kai Samuel ka Rama,

⁵ samba masikua ka tubunia, “Arepmake ukkui, amabajaan ekeu samba tatogam ta aratutnake paraboatnu. Oto simaerunia nuuddetnake sara rimata bule ibara rimatamai kele sirimanua sabagei.”

⁶ Tapoi si Samuel ta mangka bagania ka sikuatda nenda. Lepa panindounangan kai Tuhan,

⁷ samba kuanangan si Tuhan, “Arepmakean le sangamberi sitiddoura sirimanua nenda katubum. Aipoi ta ekeu arata'ta'ake, tapoi Aku le. Ta'an araoba Aku sibailiu rimatadatda.

⁸ Baranangan Akuabbit sia bela sibara ka Misir, kaddiuakerangan Aku samba buluijirangan sabulungan, samba apa sigalaiakenenda kineneiget katubum, nenda te sigalaiakenenda katubukKu.

⁹ Lulut nenda arepmakean le panindogatda, tapoi parepdem le sia bulat sibulatnia samba paagaiake le katubutda kipa igagalaiake rimata siparentaake sia geti.”

¹⁰ Sangamberi sikuat Tuhan nenda segeakenangannia si Samuel katubutda sangamberi sirimanua sipasititiddou rimatatda, kuanangannia,

¹¹ Kuanangannia si Samuel, “Kise te geti igagalaiake rimatamui katubumui, alanangan te geti tatogamui taimanteu bailiuakenangan sia saladdu, sangarubeiat sibailiu saladdu sipukekereta, sangarubeiat bagei saladdu sipukukuro' samba sabagei sibailiu saladdu sipueenung.

¹² Sangarubeiat iuddetnake sia ibailiu sautet saladdu siuteake sangaribu sia saladdu samba sabagei siuteake saladdu silima pulu sia. Rimata nenda masikoiniake tatogamui masikuilu monenia, masiruruake buat monenia, masigalai sangamberi pamateinia samba pugalai kereta pasaggaknia.

¹³ Tatogamui sinanalep ikoiniake le geti sia masigalai tulania simasingin samba mugalai sibailiu sipaneneu samba sigalai rotinia.

¹⁴ Paalakinangan geti monemui, monen anggurmui, samba monen zaitunmui simakope eru samba kaunangannia katubutda sipugagalai katubunia.

¹⁵ Mone samba monen aggurmui tuorakngake geti juran sepersepulu sibara ka buania, lepa kaunangannia geti katubutdra tai sautet saladdu samba ka sipugagalai katubunia.

¹⁶ Paalakinangan geti sapaguguletmui, tarimeumui simakope eru samba kalideimui samba pakeinangannia ka galajetnia.

¹⁷ Alanangan te geti sepersepulu sibara mungkuat kambing biribirimui. Samba kam leu et ibailiu paguguletnia.

¹⁸ Ke aiailingan teterenia, pukatcimuian geti kalulut rimata sipilimui nenda, tapoi si Tuhan ta ioba masiarepmake katcimui.”

¹⁹ Tapoi sirimanua nenda ta raoba masipuletcei sikuat Samuel, tapoi arakua peile, “Eddangannia! Kenanen kipangan pa, bui ta bara le rimatamai.

²⁰ Koba kai imakere kele ka sirimanua sabagei, iparentaake kai rimata samba iuteake kai ka pasaggangan.”

²¹ Kapplu aiarep sangamberi tiboietda nenda si Samuel, segeakenangannia katubut Tuhan.

²² Aleginangannia si Tuhan, “Tutnakean le siobara samba uddetnakean le sara rimatatda.” Lepa geti si Samuel masikoiniake sangamberi tai Israel nenda ratoili ka lalepda senenda.