1Sam. 7 - BUKO SIPUNENAN

¹ Iageti alarangan Peti Pakerekat Baga nenda tai Kiryat-Jearim, lepa abbitrangannia ka bagat lalep Abinadab, ikukuddu lalep nenda ka uddut tinambu. Lepa geti bujairangan si Eleazar togat Abinadab, addeat masijago Peti Pakerekat Baga nenda.

Si Samuel masiparenta Israel

² Maburu leu aikuddu Peti Pakerekat Bagat Tuhan nenda ka Kiryat-Jearim, iaili rua ngarura. Kaburunia nenda sangamberi paamian Israel musoga katubut Tuhan masitiddou paroman.

³ Lepa kuanangan si Samuel ka paamian Israel, “Ke toili kam katubut Tuhan ka muinet patuatmui, buita nuribbaiake kam sangamberi sabulungandra siooiake samba tularat Dewi Asytoret. Segeake kam tubumui katubut Tuhan samba galai kam simaeru katubuNia, iageti belaakenangan geti kam ka tai Filistin.”

⁴ Oto tai Israel masiribbaiake sangamberi tularat sabulungan Baal samba tularat sabulungan Asytoret, lepa paguguletnakerangan tubutda sarat katubut Tuhan.

⁵ Lepa nenda kuanangan si Samuel, “Ruruake kam sangamberi bangsa Israel ka Mizpa, iageti panindoukungan katubut Tuhan geti addeatmui.”

⁶ Lepa parururangan sangamberitda ka Mizpa. Aisurangan oinan lepa uruakerangannia sibailiu panguruat katubut Tuhan, riuriuakerangan leu et mupuaso ka sanganantat gogoi nenda. Kuarangannia, “Amajongan kai katubut Tuhan.” (Ka Mizpa nenda si Samuel masitadda masikappluake sangamberi pakaro paukkelatdra tai Israel.)

⁷ Kele araarepnia tai Filistin aipoi aparuruan tai Israel ka Mizpa. Si lima rimata Filistin nenda mei sedda pasamba saladdutdra masisaggangi tai Israel. Areprangannia tai Israel pagalaiat nenda lepa malotorangan.

⁸ Kuarangan katubut Samuel, “Bui' nupuari manindou katubut Tuhan Taikamanuanta bule iarauake sita ka tai Filistin.”

⁹ Kalulut nenda si Samuel masija'ja sangamuneng togat biribiri sibau tubu, lepa panguruatnakenangannia sibailiu buluakenen rarangen katubut Tuhan. Kele ailepa nenda panindounangan bule si Tuhan masiropmake tai Israel, samba arepinanngan panindogatnia.

¹⁰ Kateteret aipangunguruatnake buluakenen rarangen nenda si Samuel, bela tai Filistin pasaggak masisaggangi tai Israel, tapoi ipot gogoi nenda si Tuhan masibaraake leleggu sibara ka manua ka ipo'ra. Paingonangan sia lepa tuitui sia sigalu puineng.

¹¹ Bela saladdut Israel sibara ka Mizpa, lepa kukrurangan tai Filistin nenda malegre ka Bet-Kar, samba kalaakerangan sia.

¹² Kapplu nenda rioakenangan sara bukku si Samuel, ka pasongan Mizpa samba Sen. Oniakenangannia Eben-Haezer, Kuanangannia, “Teret sene iropmake sita si Tuhan.”

¹³ Kisedda te aramakala tai Filistin. Ta'an iobaake sia si Tuhan raguruki minca kupkumen laggaira tai Israel, aipeile muririmanua si Samuel.

¹⁴ Sangamberi laggaira tai Israel sikalaakenendra tai Filistin, barania ka Ekron teret Gat, toiliakerangannia katubutdra tai Israel. Oto tai Israel masiala minca sangamberi kupkumen laggaira. Tai Israel samba tai Amori leu et murimanua ka bagat aban.

¹⁵ Si Samuel masiparenta Israel burut puririmanuania.

¹⁶ Senen rura baraakenangan puenunganan masibokko ka Betel, Gilgal samba Mizpa, samba ka sangamberi kudduat nenda lepaakenangan sangamberi pakaro paukelat.

¹⁷ Sarat lepat nenda toilinia ka lalepnia ka Rama. Sedda bailiunia siuteake tai Israel samba leu et rioakenangan sara kudduat pasibuluat kai Tuhan.