1Sam. 6 - BUKO SIPUNENAN

Tutoiliake Peti Pakerekat Baga

¹ Kele aikuddu Peti Pakerekat Bagat Tuhan pitu ngalaggo burunia ka Filistin,

² tai Filistin masisogai tai imam samba simatawa, lepa parererangan, “Kipa tagagalai ka Peti Pakerekat Bagat Tuhan nenda ke tatoiliake ka kudduatnia, kipa enungannia?”

³ Lepa alegirangannia, “Bui' tenan le kam toiliake Peti Pakerekat Bagat Taikamanuan Israel nenda, tapoi kau sialei panguruat sibailiu panebui jomui. Ke kiseddania maalemuian, samba agaimuian geti angoi mariuriu iukum kam Taikamanuan Israel.”

⁴ Parererangan sirimanua nenda, “Aponia bulat tukakau panebui katubuNia? Alegirangannia tai imam, “Lima lubbe mas samba lima birut mas, siripokat igit rimata laggai Filistin. Ta'pa lubbe simigi samba birut leu et aiorak kam sangamberimui?

⁵ Oto, buita nugalai kam kele tularat lubbe samba birut sipakatai laggaimui. Oto kisedda nusuru' kam Taikamanuan Israel. Bule iariake iukum kam, samba sabulungan samba leu polakmui.

⁶ Aponia lulunia nukelaake kam patutamui kele rimata samba tai imam siburu? Bui' nukalipoginia kipa aipaguileake sia Taikamanua, pat magelarangan samba obaakerangan tai Israel rakaddiuake Misir.

⁷ Lulut nenda, patarek le kam kereta sibau pasamba rua ngamuneng jaui sipasitotottoni, samba sita'pei atupakei masigirit pedati. Kau kam ruania jaui nenda ka pedati, samba giritmuian togat jaui nenda itoili ka bagat geli.

⁸ Lepa geti, alamuian Peti Pakerekat Bagat Tuhan, samba sakaiakemuiannia ka uddut pedati, samba galakngakemuannia ka bebet peti sibara ka baga sangamberi bibilet mas panguruatnakenenmui katubuNia sibailiu pasitebui jomui. Obaakemuian pedati samba jaui nenda ipuenung sarania.

⁹ Pulelek kam enungannia, ke Peti Pakerekat Baga nenda iabbit ka isit tobbou laggainia le, iate laggai Bet-Semes, nenda katukolobatnia Taikamanuanda tai Israel le sipasiake pugejaat baga sabeu nenda ka tubutta. Tapoi ke pedati nenda ta iailiake sedda, sedda agaitangan pugejaat baga nenda ta sibara ka Taikamanuan Israel, tapoi aiipo le.”

¹⁰ Galaiakerangannia sangamberitda sirimanua nenda, alarangan rua ngamuneng jaui sipasitotottoni, lepa kaurangannia ka pedati, tapoi togat jaui nenda tugeliake.

¹¹ Lepa kaurangan Peti Pakerekat Baga nenda ka uddut pedati, kisedda leu et peti sibara kabaga birut mas samba tularat palubbe-lubbe nenda.

¹² Jaui nenda riuriu ipuenung ka ipot Bet-Semes, tarimeu nenda musingak samba ta tusosoip kai katsiu ele kai kattoet ka enungan sabeu. Si lima rimata Filistin nenda riuriu ratutnia teret ka pasongan Bet-Semes.

¹³ Kateteret nenda sipulalaggai ka Bet-Semes ai sia masimomonei gandum ka su'su. Kele araitco Peti Pakerkat Baga nenda, ailiakerangannia ka angkat baga.

¹⁴ Puarinangan pedati nenda ka bebet sara bukku sabeu ka monen Josua, sara sipulaggai ka Bet-Semes. Sipulalaggai ka laggai nenda masipapokpongi loinat pedati nenda, lepa ja'jarangan sirua ngamuneng jaui nenda sibailiu buluakenen rarangen katubut Tuhan.

¹⁵ Lepa geti gorosotnakerangan Peti Pakerekat Bagat Tuhan nenda tai Lewi samba leu peti sibara ka baga sangamberi bibilet mas nenda, lepa koiriakerangannia ka uddut bukku sabeu nenda. Lepa nenda sipulalaggai ka Bet-Semes masipanguruatnake buluakenen rarangen samba sangamberi buluakenen bagei katubut Tuhan.

¹⁶ Kateteret si lima rimata Filistin nenda masiitco sangamberinia, toili sia ka Ekron ka gogoi nenda leu et.

¹⁷ Nene te sangamberi lubbe mas siluluira tai Filistin katubut Tuhan sibailiu pasitebui sele, sibara ka Asdod sara, sibara ka Gaza, sibara ka Askelon sara, sibara ka Gat sara, sibara ka Ekron sara.

¹⁸ Senen laggai nenda masikau sara tularat lubbe mas samba tularat birut mas. Sibailiu toggaiat sipuaaili nenda iate bukku sabeu kudduat pasigalanganda Peti. Teret kineneiget bukku nenda aipeile ka monen Josua, tai Bet-Semes.

¹⁹ Tapoi kalulut araloggouake kabagat Peti nenda tai Bet-Semes, bailiu pitu pulu sia ka talagatdra imateiake si Tuhan. Lepa pureureurangan baga siberikabaga kalulut aiorakngake katubutda si Tuhan pugejaat baga sabeu.

Peti Pakerekat Baga ka Kiryat-Jearim

²⁰ Lepa kuarangan sipulalaggai ka Bet-Semes, “Kaseian le siooi masiopmake murio ka matat Tuhan, Taikamanua Sipululatsat nenda? Kaipangan le tatataroake Peti Pakerekat Baga nenda bule imareunan katubutta?”

²¹ Lepa kaurangan punutubu ka sipulalaggai ka Kiryat-Jearim pasamba patonekat kele nene, “Aratoiliakean Peti Pakerekat Baga tai Filistin. Konan kam samba abbit kam Peti nenda ka kudduatmui.”