1Sam. 5 - BUKO SIPUNENAN

Peti Pakerekat Baga ka talagatdra tai Filistin

¹ Lepat araoppu Peti Pakerekat Bagat Taikamanua tai Filistin, Abbitrangannia sibara ka Eben-Haezer rakaunia ka laggaira ka Asdod.

² Ambitrangan Peti nenda samba guruakerangannia ka uman sabulunganda, Dagon, samba galakngakerangannia ka bebet tularat sabulungan nenda.

³ Kateteret aimapato simancep ei sipulalaggai ka Asdod ka uman sabulungan nenda, itcorangan tularat Dagon abelean sipululukke ka polak, ka matat Peti Pakerekat Bagat Tuhan! Angkatnakerangan patung nenda samba toiliakerangannia ka kudduatnia.

⁴ Tapoi ka gogoi aimapato simanseman, itcorangan aipoi tularat Dagon nenda abelan minca ka matat Peti Pakerekat Bagat nenda, samba atakkiat ute samba rua ngasilat kabei tularat Dagon samba ai ka matatbaliu, sarat tubunangan le mamuine.

⁵ Nenda te lulunia, tai imam sabulungan Dagon samba sangamberi sibuluijinia ka Asdod masibakkou samba ta rapepera matatbaliu gugurukat uman Dagon pat aili kineneiget.

⁶ Lepa geti ukumnangan sipulalaggai ka Asdod si Tuhan samba kupkumen laggai ka bebenia kaunangan lubbe simigi katubutda.

⁷ Kateteret raitco sipuaaili katubutda nenda, kuarangan, “Taikamanuan Israel masiukum sita samba sabulunganta Dagon. Ta' momoi taobaake Peti Pakerekat BagaNia ikuddu sene simaburu.”

⁸ Lulut nenda sogairangan si lima rimata Filistin bule raparuru' samba parererangan, “Kipa tagagalai Peti Pakerekat Baga Taikamanua Israel nenda?” Alegirangan tai rimata nenda, “Kau kam ka laggai Gat.” Oto, peti nenda kaurangannia ka laggai Gat, sara laggaira tai Filistin.

⁹ Tapoi kele aisege peti nenda sedda, si Tuhan masiukum laggai nenda leu et samba masibaraake katuge'geket simakope beunan. Sipulaggai ka laggai nenda, sibau tubu samba simabaja tuukum pasamba lubbe simigi sipututu'tu katubutda.

¹⁰ Lepa geti Peti Pakerekat Baga nenda tutaroake ka Ekron, laggaira tai Filistin. Kele aisege peti nenda sedda, sipulalaggai sedda mugerei kuarangan, “Peti Pakerekat Bagat Taikamanua Israel nenda tuabbit sene bule tamatei kam sangamberitta.”

¹¹ Lulut nenda sogairangan sangamberi rimata Filistin bule paruru', lepa kuarangan, “Toiliake kam Peti Pakerekat Bagat Taikamanuan Israel nenda ka kudduatnia siboiki bule bui' imateiake sita samba sakaumanta.” Ka sangaliot laggai muaili ka tuge'gekat kamateiat kalulut Taikamanua masiukum sipulalaggai.

¹² Sangamberi sirimanua sitaimamatei, iorak besi' lubbe simigi nenda, bailiunangan sipulalaggai ka laggai nenda musoga katubut sangamberi sabulungandra, masitiddou paroman.