1Sam. 4 - BUKO SIPUNENAN

Tai Filistin masioppu Peti Pakerekat Baga

¹ Kateteret nenda tai Filistin masiabbit sangamberi saladdunia bule rasaggangi tai Israel, kalulut nenda ei saladdutdra tai Israel ka kudduat pasaggangan, pusapourangan ka bebet Eben-Haezer, oto rapusasapou ka sia saladdutdra tai Filistin iate ka Afek.

² Taddaakerangan pasaggangan saladdutdra tai Filistin, samba kele aimakope oloi pasaggangan, makalarangan tai Israel samba ke tuadde simamatei ka pasaggangan nenda iaili epat ngaribu sia.

³ Kele aratoili saladdu sipulelegei simakakala nenda ka sapoura, kuarangan sikebbukat laggai ka Israel, “Angoian le aiobaake si Tuhan rakalaake sita tai Filistin ka gogoi nene? Mei kam sita masiala Peti Pakerekat Bagat Tuhan ka Silo, samba taabbit kamnia sene, bule ioba si Tuhan masiropmake sita samba masibelaake sita ka saggak.”

⁴ Lepa koiniakerangan sirimanua ka Silo masiala Peti Pakerekat Bagat Tuhan sibailiu kudduat purimataat Tuhan Sipulugege. Ruadda togat Eli, si Hofni samba si Pinehas, masipaalei Peti Pakerekat Bagat Tuhan nenda.

⁵ Kele aisege Peti Pakerekat Baga nenda ka pusapougat, pugereirangan tai Israel sabeu nganga, pat pugeretnangan polak.

⁶ Tai Filistin leu et arepdrangan gerei nenda, lepa kuarangan, “Angoian le rapugegerei tai Ibrani?” Tapoi kele araagainia, Peti Pakerekat Bagat Tuhan aian ka pusapougatdra tai Ibrani.

⁷ Malotorangan, samba kuarangan, “Ai Taikamanua amoi ka sapoura! Mateian te sita! Ta'pei leu ataagai pagalaiat kele nene!

⁸ Bulatnia paan te ka sita! Kasei te momoi masibelaake sita ka Taikamanua simakope ron nenda? Ta' pa Taikamanua nenda leu et amasimateiake tai Misir ka simatangeu siburu?

⁹ Ronnake kam patuatmui, ale kam tai Filistin! Pasaggak kam kele taimanteu, ke ta kisedda, bailiunangan kam geti paguguletda tai Ibrani nenda, kele sia siburu ibailiu paguguletmui. Kalulut nenda pasaggak le kam kele taimanteu!”

¹⁰ Lepa geti pasaggakdrangan tai Filistin samba kalaakerangan saladdutdra tai Israel. Pusaburangan tai Israel ratuitui ka sapoura sene-senendra. Bulat kala sabeu te nenda: Telu ngaribu tai saladdu Israel amatei.

¹¹ Peti Pakerekat Bagat Taikamanua oppurangannia saggakdra tai Israel, samba ka rua togat Eli nenda, si Hofni samba si Pinehas matei sia.

Kamateiat Eli

¹² Sara sirimanua sibara ka muntogat Benjamin amutuitui sibara ka pasaggangan iailiake ka Silo, samba gogoi nenda leu et segenia. Sibailiu toggaiat pureureugat baga, aipabiritnan leppeinia samba aikauan polak ka utenia.

¹³ Si Eli, simakope karat baga masipaatu Peti Pakerekat Bagat Tuhan, ainia mukukuddu ka korosi ka bebet enungan, ai leunia mupaatuat. Kele aipaagai katuareman aramakala tai Israel sirimanua nenda, sangamberi sikuddu ka laggai pusourangan simakope.

¹⁴ Arepnangan sou simakope nenda si Eli, lepa rerenangannia, “Pulamaugat apangan le nenda?” Aipeile pababalau sirimanua nenda iailiake si Eli, kele ai sege, paagainangan katuareman sikatai nenda.

¹⁵ Ka sia si Eli aiat siba pulu balu ngarura samba malegrengan le ta imaitco matania.

¹⁶ Kuanangan sirimanua nenda katubut Eli, “Amutuitui barakku ka pasaggangan gogoi nene samba simaruei le akusege.” Parerenangan si Eli katubunia, “Kipa katuaremannia togakku?”

¹⁷ Aleginangan sipasiabbit katuareman nenda, amusabu le sia tai Israel ka tai Filistin. Bulat kala sabeu aiorak sita. Maigi sia simamatei, ia leu et ruadra tatogam ukkui, si Hofni samba si Pinehas matei leu et. Samba Peti Pakerekat Bagat Taikamanua oppurangannia tai saggak!”

¹⁸ Kele aisegeake pagalaiat Peti Pakerekat Baga sirimanua nenda, belenangan leu si Eli ka korosinia, tugailaknangan ka isit matatbaliu gugurukat. Amakopeat bajania samba mamo'monia bailiunangan kateteret ai bele bakbak lolokkatnia, samba mateinia. Aiuteake tai Israel epat pulu ngarura burunia.

Kamateiat pulumangakenen Pinehas

¹⁹ Kateteret nenda, talikut Eli, iate sinanalep Pinehas, amabeunannan suruketnia, samba amalegrengan teterenia itu'tuake matat togania. Kateteret aiarepnia, Peti Pakerekat Bagat Taikamanua araoppungan, samba aipoi talikunia samba simanteunia atata'an, sinulut againangan besit pususule, lepa geti tutuakenangan matat togania.

²⁰ Keteteret malegre imatei, kuarangan tainanalep sipasiroropnia, “Bui' numaloto! Togam simanteu!” Tapoi ta iaalegi ele ta ipuletcei sia.

²¹ Kaunangan onin Toga nenda Ikabod, kuanangannia, “Ta'an anai Pulatsanan Taikamanua Sipululatsat ka Israel” katukolobatnia iate Peti Pakerekat Baga araraurauan samba talikunia samba leu simanteunia atata'an.

²² Lulut nenda kuanangannia, “Ta'an anai Pulatsanan Taikamanua Sipululatsat ka Israel, kalulut araraurauan Peti Pakerekat Baga.”