1Sam. 31 - BUKO SIPUNENAN

Kamateiat Saul samba tatogania

¹ Kateteret nenda leu et tai Filistin aisia pasasaggak rasaggangi tai Israel. Putuituirangan tai Israel kamatatda tai Filistin samba maigi simamatei ka leleu Gilboa.

² Tapoi tai Filistin masikukru sia samba mateiakerangan tatogat Saul iate si Jonatan, Abinadab samba si Malkisua.

³ Iageti makopenangan pasaggangan nenda, ailirangan si Saul samba panarangannia samba leu oraknangannia.

⁴ Lepa kuanangan si Saul katubut silainge siabbit pamateinia, “Golok lanjaunu samba pununungan aku, bule bui' rapaguileake aku samba ramateiake aku sirimanua sitaiagai si Tuhan nenda.” Tapoi silainge nenda ta ioba masioppat lanjaunia kalulut makope isurunia. Lulut nenda si Saul masiala lanjaunia samba beleakenangan tubunia ka sot lanjaunia nenda.

⁵ Kele aiitco silainge nenda si Saul poi amateiat, nia leu et masibelake tubu ka sot lanjaunia, lepa matei ka bebet Saul.

⁶ Kisedda te si Saul samba telu tatogania samba sangamberi saladdu samba leu silainge nenda matei ka gogoi nenda.

⁷ Kele araarep sangamberi tai Israel sikuddu ka silat su'sut Jizreel samba ka saigit kabelaiat sulu bagat oinan Jordan, saladdut Israel amutuituian sia, samba si Saul samba leu tatogania amateiat, tuitui sia masikaddiuake sangamberi laggaira. Lepa geti kudduijirangan tai Filistin sangamberi laggai nenda.

⁸ Mansepnia le kele araoi tai Filistin masiparauraugi sangamberi simamatei, seserangan si Saul samba telutda tatogania amateiat ka leleu Gilboa.

⁹ Saggrirangan lolokkat Saul samba alarangan leppei pasaggaknia, lepa tai Filistin masikoiniake pakoiniet ka sangaliot tobbou laggai Filistin masisegeake katuareman simaeru nenda katubut taikauma samba ka sabulunganda.

¹⁰ Lepa geti leppei pasaggak Saul nenda tukoiri ka bagat uma rimata sinanalep, Asytoret, samba tubunia tupattaake ka irip laggai Bet-Sean.

¹¹ Tapoi sipulalaggai ka Jabesh ka Gilead masiarep apa sigalaiakenenda tai Filistin katubut Saul,

¹² lepa sangamberi sirimanua simakope gege mei sedda samba muenung sangasoibo ka Bet-Sean. Gorosotakerangan tubut Saul simamatei samba leu tatogania ka irip laggai nenda, lepa abbitrangannia ka Jabesh, samba laborangannia.

¹³ Sangamberi tolatnia tururuake samba turateiake ka tei loinat tamariska ka laggai nenda, lepa geti pupuasorangan pitu ngagogoi burunia.