1Sam. 30 - BUKO SIPUNENAN

Pasaggangan masisaggangi tai Amalek

¹ Kele aisege si David samba saladdu ka Ziklag ka gogoi sikatelunia, tai Amalek arasaggangingan rubeiat kaiaman tobbou laggai Jehuda samba Ziklag, arakalaakean Ziklag samba aralaboan isappru.

² Sangamberi tainanalep samba sirimanua sibabara sedda, sibau tubu samba simabaja', aratangsiakean sia, tapoi ta anai sia atumateiake, abbitrangan sia sangamberitda, lepa geti masiriuriuake puenungananda.

³ Kateteret si David samba saladdu sege ka laggai nenda, toila teet laggai nenda atata'an aimalabo samba sinanalepda samba leu tatogatda simanteu samba sinanalep atutangsiakean.

⁴ Lepa pusaounangan te si David samba sarakyat simakere pasambania simaron, pat taimarondangan musou.

⁵ Samba leu ka rua sinanalep David tutangsiake, iate si Ahinoam sibara ka Jizreel samba si Abigail sipalumangakenen Nabal, tai Karmel.

⁶ Saanak buania si David bulat mabesi patuatda kalulut ta'arabara tatoga samba tainanalepda. Lulut nenda aiat patutda masibaijuk si David bukku. Oto si David ainia ka bagat puokkiman sabeu, tapoi patuatnia ironake le minca si Tuhan Taikamanuania.

⁷ Lepa kuanangan si David katubut imam Abyatar togat Ahimelekh, “Abbit le efod nenda sene!” Iageti si Abyatar masiabbit efod nenda katubunia.

⁸ Lepa geti parerenangan si David katubut Tuhan, “Bulat kukukru pa gerombolan sipasiggangi nenda? Momoi leu pa kuailiake sia?” Aleginangan si Tuhan, “Oo kukrungan, sia samba ujaake sia sitangsiakenen.”

⁹ Lepa tuitui si David simakere pasamba sienem ngotu saladdu. Kele arasege ka bagat oinan Besor,

¹⁰ si David masiriuriuake puenunganannia simakere pasamba epat ngotu sia. Oto si rua ngotu sia sabagei kuddu sia sedda. Kalulut makopean saggo samba ta'an momoi masitalipoki bagat oinan Besor.

¹¹ Kabagat puenunganan nenda saanak buat David paaili sara toga simanteu tai Misir ka leleu, lepa abbitrangannia katubut David tukau kan samba lo'nia,

¹² samba leu kue buat ara, samba rua ngaappra anggur simagarak. Lepa nenda toili minca ron tubunia, lulut ta amukom samba ta maulo'nia telu ngatago samba telu ngasoibo burunia.

¹³ Lepa parerenangan si David katubunia, “Kasei tuannu, samba kaipa anubara?” Aleginangan toga nenda, “Tai Misir le aku, pagugulet sara tai Amalek. Aikaddiuake aku tuanku telu ngagogoi situsasabau lulut mabesi aku.

¹⁴ Akusaggangingan kai kupkumen laggai Kreti ka rubeiat kaiaman Jehuda samba kupkumen laggai muntogat Kaleb, samba asapprungan akulabo kai laggai Ziklag.”

¹⁵ Lepa parerenangan si David katubunia, “Nuoba leu nutaroake aku ka kudduat mungkuat nenda?” Aleginangannia, “Kuoba, ke nugalai palelengan katubukku ka onin Taikamanua, ta numamateiake aku ele masikau aku katubut tuanku.”

¹⁶ Lepa taroakenanngan sia toga nenda ka kudduat mungkuat nenda. Kateteret nenda mungkuat nenda arapagalakngan tubutda ka sangamberi kudduat nenda, sialei mukom, mulo' samba mupunen masisegeake baga kalulut iginia bibilet siraurau siabbitda sibara ka tobbou laggai Filistin samba Jehuda.

¹⁷ Kateteret amailauan gogoinia imapato, si David masisaggangi sia, samba pasaggangan riuriu teret soibo. Ta'anai berisara sia sibara ka tai saggak sioi bela, sarat si epat ngotu sia sibau tubu situituiake tubunia pasamba muunta.

¹⁸ Si David mariuriu masiujaake sangamberinia sirauraura tai Amalek, samba ruadda sinanalepnia,

¹⁹ ta'anai apapa simapepepe. Sangamberi tatoga taimanteu samba tainanalep samba sangamberi bibilet siraurau sialara tai Amalek iala minca si David.

²⁰ Ta' sarat nenda, si David leu et masiraurau sangamberi biribiri samba tarimeu. Sangamberinia nenda raabbit saladdu ka matania, tusaraake sibara ka sangamberi bibilet siraurau bagei, samba kuarangan, “Nene rubeiat David!”

²¹ Lepa nenda toili si David katubutda sirua ngotu sia simakope saggo addeat masitutnia, samba sikaddiuakenennia ka bebet bagat oinan Besor. Ailiakerangan si David samba leu saladdu, samba si David masilegreake tubu samba leu roroinangan sia.

²² Tapoi ka talagatda saladdu simakere masitutnia, ai sikatai samba simaalau baga. Kuarangan, “Kalulut ta sambat sia mei simakere pasamba sita, oto ta'anai puteukatda masisilo apapa ka bibilet siraurau nenda. Sarat momoi raala sinanalepda samba tatogatda lepa, samba tuitui sia.”

²³ Tapoi aleginangannia si David, “Sangamberi sasarainangku, bui' nugalaiake kam kisedda ka siaket Tuhan katubutta! Lulut Nia amasikuneni sita, samba masiake katubutta mungkuat sisaggangi sita.

²⁴ Oto berisara sia leu et ta momoi masiooake pinaatu nenda! Sangamberitda buita bara rubeiat simakere iginia, sirimanua sikukuddu addeat masijago sangamberi bibilet buita bara rubeiat simakere kele sia sieei pasaggak.”

²⁵ Iageti pagalaiat nenda tugalai ibailiu sara enungan galaiakenen, samba tureddet ka Israel teret kineneiget.

²⁶ Kele aitoili si David ka Ziklag, kaunangan sangarubeiat sibara ka sangamberi bibilet siraurau nenda katubutda sautet laggai Jehuda sipasiroropnia, kuanangannia, “Nene te panguruat addeatmui sibara ka bibilet siraurau sialamai ka saggak Tuhan.”

²⁷ Sangamberi laggai nenda iate, Betel samba Rama karubeiat ka kaiaman Jehuda, Jatir,

²⁸ Aroër, Sifmot, Estemoa,

²⁹ Rakhal, samba leu sangamberi laggaira tai Jerahmeel, sangamberi laggaira tai Keni,

³⁰ Horma, Bor-Asan, Atakh,

³¹ samba Hebron. Sangamberi laggai kaipa si David samba saladdu mei mueppak, kaunangan panguruat.