1Sam. 29 - BUKO SIPUNENAN

Tai Filistin masikoiniake si David itoili

¹ Tai Filistin masiruruake sangamberi saladdutda ka Afek, ka sia tai Israel musapou ka legret bubuakat oinan ka Su'sut Jizreel.

² Limanda rimata Filistin nenda ei sia sambatda sangamberi saladdu sangotu samba sangaribu sia, si David samba saladdu muenung ka teiteira simakere pasamba Rimata Akhis.

³ Sia saute saladdu Filistin masiitco sia, lepa parererangan, “Sangamberi tai Heber nenda apa katukaunanda sene?” Aleginangannia si Akhis, “Nene si David, siboikinia sipugagalai kai Rimata Saul sibara ka Israel. Maburuan ikuddu katubukku. Baranangan aioi katubukku teret gogoi nene, ta'pei akusese puseleatnia.”

⁴ Tapoi sautet saladdu Filistin nenda mugolu katubut Akhis samba kuarangan katubunia, “Koiniakenia itoili ka laggai sikaunu katubunia. Ta' momoi ipasaggak sambatta, babara ipajojo sita ka pasaggangan. Ta' pa nene oggak simaeru ka sia igalai pualakat bagat rimatania ka enungan imateiake saladdutta?

⁵ Ta'pa nia nene si David siuraijitda samba siturukitda tainanalep, rakua ‘Si Saul masimateiake sipuriribu saggak, tapoi si David sipupulu ngaribu.’ ”

⁶ Lepa sogainangan si David si Akhis samba kuanangan katubunia, “Matonem bagakku ka onin Tuhan sipuririmanua, matopit le ekeu katubukku, ke mei sita simakere sambatda ka pasaggangan, kalulut baranangan anuoi katubukku aili teret nene, ta akusese puseleatnu. Tapoi sangamberi rimata sabagei nenda ta raoba ekeu.

⁷ Lulut nenda toiliakean le ekeu ka angkat baga, samba bui' nugalaiake apapa sibaraake pugolukatda.”

⁸ Aleginangannia si David, “Aponia puseleat sigalaiakenenku? Samba aponia puseleat anusese katubukku, barania peile aibailiu aku pagugulet katubum pat aili kineneiget, bailiu tamomoi kuoi pasaggak masisagganngi saggaknu?”

⁹ Aleginangannia si Akhis, “Nuagai ekeu poi kuaddeake simatopit kele malaikat Taikamanua. Tapoi sia sautet saladdu nenda aratakkiakean ekeu poi ta mooi pasaggak semakere pasamba katubut.

¹⁰ Lulut nenda David, mancep sangamberimui sikaddiuake si Saul samba moi katubukku, buita tusuru simaseggei samba mutuitui simaola ke abelangan sulu.”

¹¹ Kalulut nenda ka gogoi imapato simanceman, tuitui te si David samba saladdu toili ka tobbou laggai Filistin, oto sia saladdutda tai Filistin nenda tuitui ka Jizreel.