1Sam. 28 - BUKO SIPUNENAN

Si Saul ka En-Dor

¹ Piga pa burunia atusabau tai Filistin masikoiniake saladdutda masisaggangi tai Israel, samba kuanangan si Akhis katubut David, “Kirenangan anuagaian, nupasaggak kam saladdum buita ka rubeiatku.”

² Aleginangannia si David, “Kirenangan, aileu nuinconia aponia momoi kugalaiake.” Lepa kuanangannia si Akhis, “Maeruan, kubailiuake le ekeu sipasijajago aku simariuriu.”

Si Saul masitiddou katukolobat sibara ka tai kerei sipasisosogai ketsatda taikebbukat

³ Si Samuel atataannia samba sangamberi tai Israel masisoibinia samba leu turateiake ka Rama, ka laggainia. Si Saul amasikekle sibara ka Israel sangamberi tai kerei sipasisosogai ketsatda taikebbukat samba sipasituptup sibabara geti.

⁴ Iageti kateteret araparuru saladdutda tai Filistin samba musapou ka legret laggai Sunem, si Saul leu et masiruruake tai Israel, samba pusapourangan ka leleu Gilboa.

⁵ Kele aiitco si Saul saladdutda tai Filistin nenda, bailiunangan bulat malotonia.

⁶ Lepa tiddounangan enungan galaiakenen katubut Tuhan, tapoi ta aialegi si Tuhan, ele ka pangamutet, kisedda leu et kapasipapakei Urim samba Tumim ele ka tai nabi.

⁷ Lulut nenda kuanangan si Saul ka sapaguguletnia, “Gaba kam sara sia sikerei sinanalep sipasisosogai ketsatda taikebbukat, memei te aku katubunia masitiddou enungan galaiakenen. Alegirangannia, “Ka En-Dor ai sikerei kele nenda.”

⁸ Lepa pakatainangan tubunia si Saul, bule ta ragainia sirimanua. Tuituinia pasamba rua aimanteu samba segenia ka lalep sikerei nenda kateteret sinoibo. Iageti kuanangan si Saul, “Sogai le ketsat sirimanua sikuakku oninia, samba tiddou le bule ikua aponia sibabara geti.”

⁹ Aleginangan sinanalep nenda, “Kirenangan anuagaian, Rimata Saul aikeklengan ka Israel sangamberi tai kerei sipasitutuptup sibabara geti samba sikerei sipasisosogai ketsatda taikebbukat. Angoian nusibo nupakatai aku, bailiu tumateiake aku?”

¹⁰ Lepa pusuppanangan si Saul, kuanangan, “Ka onin Tuhan sipuririmanua, kugalai palelengan ta tuukum ekeu kalulut gagalaiakenu nene.”

¹¹ Parerenangan sinanalep nenda, “Kasei ketsat kusosogai ioi kekeu?” Aleginangannia si Saul, “Ketsat Samuel.”

¹² Kele aiitco si Samuel sinanalep nenda, pugereinangan samba kuanangan katubut Saul, “Angoi nupataju aku? Oto rimata Saul le ekeu.”

¹³ Aleginangan rimata, “Bui' numaloto! Kua le apa siitconu!” Aleginangan sinanalep nenda, “Akuitco ketsat bela sibara ka polak.”

¹⁴ Parerenangan si Saul, “Kipa putubuatnia?” Alegianangannia, “Sara simanteu simabaja'. Belania sipuleppei jubah.” Lepa againangannia si Saul, nenda iate si Samuel, samba purekkuknangan iabeuakenia.

¹⁵ Kele ailepa nenda kuanangan si Samuel katubut Saul, “Angoi nugeugeu aku? Angoi nusogai aku minca?” Aleginangannia si Saul, “Aipaingongan aku kalulut tai Filistin masisaggangi aku, beringan Taikamanua aikaddiuakean aku. Ta'an aiarepi aku, ele kapaneteiat ka tai nabi kisedda leu et ka pangamutet. Kalulut nenda kutiddou katubum, bule nupaagai apa bulat galaiakenenku.”

¹⁶ Lepa kuanangan si Samuel, “Apangan le lulunia nusogai aku, beringan si Tuhan aikaddiuakean ekeu samba ibailiu saggaknu?

¹⁷ Aigalaiakean si Tuhan katubum kele sikuaNia sisege kaku. Aialaan si Tuhan purimataat Israel katubum samba aikauan katubut David.

¹⁸ Kalulut ta anureddet parentat Tuhan samba ta noba masisappruake tai Amalek samba leu sangamberi bakkatda. Nenda te lulunia kineneiget aigalaiake katubum kisene si Tuhan.

¹⁹ Ekeu samba sangamberi tai Israel isegeake le geti katubutda tai Filistin. Mansep ekeu samba tatogam paruru le geti pasamba aku, samba leu sangamberi saladdu Israel isegeake le si Tuhan katubutda tai Filistin.”

²⁰ Kateteret nenda leu et, bele si Saul ka polak kele situnung leleggu, lulut bulat aituge'ge masiarep tiboiet Samuel nenda. Sarapei bagei simakope saggonia, lulut ta' mukom sangatago samba sangasoibo.

²¹ Sikerei nenda masilegreake tubunia katubut Saul samba masiitco si Saul bulat makope ingo, kalulut nenda, kuanangan sinanalep nenda katubunia, Tuanku, akubuluakean tubukku masigalaiake apa sitiddounu.

²² Oto, buita nuarepi panindogatku, kom le goiso komen sitarekakenenku bule ioi nuriuriuake puenunganannu.”

²³ Tapoi ta ioba si Saul samba kuanangan. Tapoi kele arananania sapaguguletnia, tutnakenangannia. Tusurunangan ka polak samba kuddunia ka laibokat.

²⁴ Olaakenangan sinanalep nenda masija'ja togat jauinia simamo'mo samba alanangan tapung samba leu galainangan roti ibailiu roti sita' sioman.

²⁵ Kele ailepa nenda patareknangan komen nenda katubut Saul samba ka sapaguguletnia, lepa pukomrangan. Lepa geti tuitui sia ka soibo nenda leu et.