1Sam. 27 - BUKO SIPUNENAN

Si David mukuddu ka talagatda tai Filistin

¹ Iageti paatunangannia si David, “Kenanen kipangan pa ka sara gogoi imateiake leu et aku si Saul. Oto, ta'anai enungan bagei kaku, maeru peile mei ka laggai Filistin. Kele kisedda, taan igagaba aku si Saul ka Israel, bailiu bela aku kakabei Saul.”

² Lepa si David samba sienem ngotu saladdu olaakerangan mei katubut Akhis togat Maokh, rimata laggai Gat.

³ Iageti pukuddunangan simakere saladdu ka Gat, senenda pasamba sikalalepda. Si David masiabbit leu ruadda sinanalepnia, iate Ahinoam sinanalep sibara ka Jizreel samba si Abigail silumangakenen Nabal, sinanalep sibara ka Karmel.

⁴ Kele aiarepnia si Saul, si David ameiannia ka Gat, ta'an aibesiake ilabania.

⁵ Lepa kuanangan sipinaatunia si David katubut Akhis, “Ke manuntu bai bagam katubukku, ake kaku sara laggai sigoiso ka polak simagaktuk, bule kukuddu sedda, bailiu ta'an mukukuddu aku katubum ka inan laggai purimataat nene.”

⁶ Lepa kaunangan laggai Ziklag si Akhis katubut David, samba iate lulunia Ziklag ibailiu bakkatda sangamberi rimata Jehuda pat aili kineneiget.

⁷ Si David mukuddu ka tobbou laggai Filistin burunia sangarura epat ngalaggo.

⁸ Burut oggaknia nenda si David samba saladdu mareirei masisaggangi tai Gesur, Girzi samba tai Amalek, tai bangsa nenda amaburuan arakuddu ka kupkumen laggai nenda. Sagganginangan polak nenda ka ipot Sur samba riuriu ka Misir.

⁹ Mateiakenangan sangamberi sirimanua taimanteu samba tainanalep samba leu masiparauraugi biribiri, jaui, kalidei, unta samba leu bibilet. Lepa geti toilinia samba masipatiboake si Akhis.

¹⁰ Ke parere' si Akhis katubunia, “Kaipa anuei pasaggak ka gogoi nene?” Iageti kuanangan si David katubunia, akuei ka rubeiat kaiaman Jehuda ele ka kupkumen laggai Jerahmeel ele ka kupkumen pulaggaiatda tai Keni.

¹¹ Ta' anai berisara sia ka sangamberi kupkumen laggai sisagganginia nenda aiobaake murimanua, bule bui' ibara sirimanua ka kupkumen laggai nenda siooi mei ka Gat masisegeake apa bulat aigalaiake si David samba saladdunia. Kisedda te sigalaiakenen David burut aikuddu ka tobbou laggai Filistin.

¹² Tapoi si Akhis matonem bagania kai David, kalulut aipaatu poi, “Bulat makope rapulagakinia baga taikaumania, oto ibailiunia le nia paguguletku ka burut purimanuaiatnia.”