1Sam. 26 - BUKO SIPUNENAN

Si David masikeraake minca masimateiake si Saul

¹ Ka sara gogoi oi sirimanua sibara ka Zif katubut Saul ka Gibea samba masipaagaiake katubunia si David ai mulilipput ka leleu Hakhila ka be'bet simatangeu Jehuda.

² Iageti olaakenangan si Saul mutuitui pasamba telu ngaribu saladdu simakope eru ka Israel sipaaleakenia, masiailiake simatangeu Zif masigaba si David.

³ Pusapounangan si Saul ka be'bet enungan legret leleu Hakhila nenda. Si David sipukukuddu ka simatangeu, masiarep si Saul masitutnia teret ka simatangeu.

⁴ Koiniakenangan sipasitataiko, samba againangan sibulatnia si Saul ai sedda.

⁵ Olaakenangan mei si David ka pusapougat Saul samba sedda sesenangan sapou kudduat Saul merep ka be'bet Abner togat Ner. Sapou Saul nenda ai katalaga, sia geti saladdunia musapou masigoiliknia.

⁶ Lepa geti parerenangan si David katubut Ahimelekh tai Het nenda, samba katubut Abisai sarainan Joab, togat Zeruya, “Kasei magege tuguru' pasamba aku ka bagat pusapougat Saul?” Aleginangannia si Abisai, “Aku.”

⁷ Iageti ka soibo nenda si David samba si Abisai moileakerangan mei ka bagat pusapougat nenda samba masiitco si Saul ai memerepnia ka tengan pusapougat, simuine bakkatnia aituibbi ka polak legret utenia. Si Abner samba saladdunia merep masibokkonia si Saul.

⁸ Lepa kuanangan si Abisai katubut David, “Taikamanua amasiake saggaknu katubum ka soibo nene. Obaake kupunuake simuine bakkatnia katubunia pat bela kasila, sangapunuan, ta leu iaaili ruangaminca!”

⁹ Tapoi kuanangan si David, “Bui' nugalai apapa katubunia! Bulat si Tuhan masiukum sirimanua sigalai katai katubut rimata sipiliNia.

¹⁰ Ka onin Tuhan sipuririmanua, kuagai, si Tuhan le masimamateiake si Saul, ke aiailingan teteret purimanuaiatnia, ele ke mateinia ka bagat pasaggangan.

¹¹ Bule si Tuhan masikeraake aku masimateiake rimata sipiliNia!”

¹² Iageti alanangan simuine bakkat si David samba kudduat lot Saul nenda ka bebet utet Saul, lepa tuitui sia. Beri sara sia masiitco pagalaiat nenda ele masiagai aponia sipuaaili, ele sitususuru pa, kalulut si Tuhan masigalai raperep simakope sangamberitda.

¹³ Lepa putaliponangan si David ka bebet guluggu bagei aili ka uddut leleu, bailiu mareunannangan ka pusapougat Saul.

¹⁴ Lepa pusoganangan si David katubut Abner samba ka saladdut Saul kuanangannia, “Abner! Nuarep leu ngangangku?” Si Abner leu et musoga, “Kasei ekeu sipugegerei nenda?”

¹⁵ Aleginangan si David, “Abner, ta ekeu pa sirimanua simakope eru ka Israel? Angoi ta anujago tuannu, rimata? Simaruei le ai sirimanua masiguruki pusapougatnu ramateiake tuannu.

¹⁶ Tamomoi nugalaiake galajetnu, Abner! Ka onin Tuhan sipuririmanua, bui' ta matei kam sangamberimui, kalulut ta anujago kam tuanmui, rimata sipilit Tuhan. Itco pei! Kaipania simuine bakkat rimata? Kaipania kudduat lo sikuddu ka be'bet utenia siboiki?”

¹⁷ Iagai si Saul ngangan David, lepa kuanangan, “David, ekeu leu pa nenda, togakku?” Alegianangan si David, “Oo, Tuan rimata.”

¹⁸ Lepa kuanangan minca, “Angoian le nukukukru aku Tuanku rimata? Aponia selekku?

¹⁹ Tuanku rimata, arepake pei panindogatku nene. Ke si Tuhan bai sikoiniake Tuanku rimata masisaggangi aku, sara panguruat buluakenen le momoi masitataake goluNia katubukku. Tapoi ke sirimanua le amasikoiniake Tuanku rimata, bule si Tuhan masipateleiji sia! Kalulut kasigalaira nenda, atukeklengan aku ka polak bakkat Tuhan samba bailiu aku buita mutuitui ka tobou laggai bagei bailiu sedda panindogikungan taikamanua bagei.

²⁰ Bui' te nuobaake kumatei ka polak simareunan ka matat Tuhan. Apa katukaunannia nia ikukru aku rimata Israel kele rakukru sirimanua gougou leleu?”

²¹ Lepa aleginangannia si Saul, “Amajongan aku. Toiliake ekeu David, togakku! Ta'an kugagalai geti katai minca katubum kalulut anuobaakean kupurimanua soibo silelepa. Paraboatku bulatnia taiagai patuat. Bulatnia amapepengan aku!”

²² Tapoi aleginangan si David, “Simuinebakkatnu, ai sene koiniake le sara saladdum ialania sene.

²³ Ipanukani le sia si Tuhan sirimanua simariuriu topit. Kenanen ka gogoi nene isegeake ekeu si Tuhan katubukku, tapoi ta kuoba masigalai katai katubut Tuanku rimata, rimata sipilit Tuhan.

²⁴ Oto, kele akuobaake ekeu murimanua ka gogoi nene, kisedda leu et ibelaake aku si Tuhan ka sangamberi gejat baga!”

²⁵ Lepa kuanangan si Saul katubut David, “Si Tuhan masipanukani ekeu, togakku! Mariuriu le ekeu geti ka bagat sangamberi galajet!” Lepa riuriuakenangan si David puenunganannia, samba si Saul leu et toili ka lalepnia.