1Sam. 25 - BUKO SIPUNENAN

Kamateiat Samuel

¹ Lepa geti ta amaburu tata' si Samuel. Sangamberi tai Israel paruru masisoibinia samba masirateiakenia ka lalepnia ka Rama. Kele aitukapplu nenda ei si David ka kudduat simatangeu ka Paran.

Si David samba si Abigail

² Kateteret nenda ai sara simanteu ka Maon. Ai polak putarimeugatnia ka bebet laggai Karmel. Sirimanua nenda bulat makayonia, ai telu ngaribu ngamuneng biribiri samba sangaribu ngamuneng kambingnia. Ai nia ka Karmel kapasisapuat bulut sangamberi biribirinia.

³ Onin sirimanua nenda Nabal samba onin sinanalepnia Abigail. Sinanalep nenda maagainia patuat samba malainge tubunia, tapoi simanteu nenda magolu samba makatai paraboatnia. Nia iate sara punuteteu Kaleb.

⁴ Kateteret ai si David ka simatangeu, arepnangan pagalaiat nenda,

⁵ koiniakenangan pulu sia sibau tubu mei ka Karmel,

⁶ masiailiake si Nabal masisegeake paroroiat David katubunia. Koiniakenangan sia masikua kisene katubut Nabal, “Salam erut puririmanua katubum samba sikaumam samba leu sangamberi bakkatnu.

⁷ Akuarep ai ekeu masisasapu bulut biribirim. Sipasijajago tarimeunu ai sia ka kupkumen laggaimai, ta akugeugeu kai sia samba leu et ta pei anai apapa simapepepe katubutda burut ai sia ka Karmel.

⁸ Sibo pei nurere sia, bulat raseseseake geti pagalaiat nenda. Lulut nenda kukatonemi bule saladduku tusilo ka simaeru ka lalepnu, kalulut akuoi kai ka gogoi punen sabeu nene. Kau leu et katubut sapaguguletnu nene samba kaku, si David, aleinu simaeru, aponia siripot sibabara katubum.”

⁹ Kele arasege ka Karmel, segeakerangan saladdut David patonekat nenda katubut Nabal ka onin David, lepa ngenarangannia.

¹⁰ Tapoi aleginangannia si Nabal, “Si David? Kasei nia? Kasei nenda togat Isai? Ta' pei akuarep pagalaiat nia! Kateteret kineneiget maigi pagugulet situtuitui ka tuannia ka tobbou laggai nene!

¹¹ Kipa iooi kuala roti samba lo'ku samba leu akkula silepa kutarekake ka sipasisapu bulut biribirikku, lepa sangamberinia nenda kaukungannia katubut sirimanua sitaimakolou kabaraiatnia!”

¹² Iageti saladdut David nenda toili katubut David samba masipaagaiake katubunia sangamberi tiboiet Nabal nenda.

¹³ Lepa geti kuanangan si David katubut saladdu, “Senemui, appraake kam lanjaumui ka tengamui! Lepa senenda masiappraake lanjaura, si David leu et masiappraake lanjaunia ka tengania. Lepat nenda ele aisia epat ngotu bela masitut si David, tapoi rua ngotu sia mukuddu masijago bibilet.

¹⁴ Kateteret nenda leu et, sara pagugulet Nabal, masipaagai katubut Abigail, sinanalep Nabal, kise, “Anuarep pa? Aikoiniakean piga pa pakoinien si David ka kudduat simatangeu bule rasegeake paroroiat katubut tuanta, tapoi aigolu le sia.

¹⁵ Sia nenda maeru le sia katubumai. Ta' arageugeu kai samba leu et ta anai simapepepe apapa kateteret kupaalei kai simakere ka kudduat simatangeu.

¹⁶ Sinago samba sinoibo rajago le kai burunia kujago kai biribiri.

¹⁷ Kalulut nenda, paatu pei pagalaiat nenda, samba teuake aponia momoi nugalai. Kalulut bulat babara te lumun katubut tuanta samba sangamberi sikaumania. Bulat makela le patuatnia tuanta, bailiu tamomoi tupatiboakenia.”

¹⁸ Lepa olaakenangan si Abigail masiala rua ngotu roti, samba rua suppit gandum sirarak, sangotu ngambua kue kismis samba rua ngotu kue ara. Sangamberinia nenda ikau ka uddut sangamberi kalideira.

¹⁹ Lepa kuanangannia katubut sangamberi sapaguguletnia, “Kenannan kam boiki, aile kutut kam.”

²⁰ Si Abigail mukalidei ka kalideinia, samba kateteret segenia ka sara biluket ka be'bet leleu, paailirangan leu si David samba saladdu ai sia tugogorosot masiailiake ka iponia.

²¹ Kateteret nenda aipaatu si David, “Siboboi le kujago bakkat sirimanua nenda ka simatangeu! Ta' anai beri goiso simapepepe, samba kineneiget isiliake pueeruku pasamba pukakatai!

²² Bule Taikamanua masiukum aku ke ta kumateiake sangamberi taimanteu sibabara sedda kepei bela sulu!”

²³ Kele aiitco si David si Abigail, olaakenangan tugorosot sibara ka kalideinia lepa purekkuknangan reret David,

²⁴ samba leu kuanangan katubunia, “Tuanku obaan le masiarepake! Eddangannia puseleat nenda aku masibabairat!

²⁵ Buian leu nupaatu si Nabal, sirimanua sita'anai katukaunan nenda! Nia sirimanua sitaiagai patuat makere katukolobat oninia. Ta akuitco sangamberi sikoiniakenen tuanku nenda.

²⁶ Taikamanua masikeraake ekeu masiala lumun samba masimateiake sangamberi saggaknu. Samba kineneiget tuanku, ka onin Tuhan sipuririmanua, musuppa aku, bule uktuk puririmanuanda sangamberi saggaknu samba senen sirimanua sioba masimateiake ekeu makere kele uktuk puririmanuan Nabal.

²⁷ Silo le siabbitku nene kekeu.

²⁸ Bojoiake gulaiku. Si Tuhan bulat masibailiuake tuanku samba leu sapunuteteu tuanku rimata ka Israel, aipoi tuanku pasaggak addeat Tuhan, samba tuanku ta masigagalaiake geti sikatai burut purimanuaiatnu.

²⁹ Ke sara sirimanua masisaggangi ekeu samba masisibo masimateiake ekeu, jagonangan leu ekeu si Tuhan Taikamanua kele ijago bibilet sibakkatnia. Tapoi saggaknu iribaaiake le si Tuhan ka sareunan, iribbaiakenia sipasipipingping.

³⁰ Si Tuhan masigalaiake geti sangamberi simaeru sipalelekNia katubut Tuanku, samba ta'an maburu minca Tuanku ibailiuakeNia rimata sangaliot Israel.

³¹ Kateteret nenda Tuanku masirepdep geti Tuanku poi ta masimateiake sita' paluluat ele masigalai siobat bagania bailiunangan Tuanku ta leu mureureu baga ele iolei bagam. Samba ke Tuhan aipanukaningan Tuanku, repdem le paguguletnu nene.”

³² Lepa kuanangan si David katubunia, “Tuumunake le si Tuhan, Taikamanuan Israel, sikoiniake ekeu masiailiake aku ka gogoi nene!

³³ Tuumunake le pusikuat patuatnu samba tuumunake leu et ekeu kalulut anukeraake aku masigalaiake pamamatei samba leu masigalaiake siobat bagakku sarakku.

³⁴ Aikeraakean aku si Tuhan masigalai katai katubum. Ka onin Tuhan, Taikamanuan Israel sipuririmanua ke ta maruei nuailiake aku, bulatnia le sangamberi sapagugulet Nabal matei le sia kateteret ibela sulu!”

³⁵ Lepa nenda silonangan si David apa siabbit si Abigail katubunia, lepa kuanangan katubunia, “Toiliake ekeu ka lalepnu samba buian makarat bagam akuarepingan sitiddounu.”

³⁶ Kele aitoili si Abigail katubut Nabal, matoilanangan ai punen sabeu ka lalepnia, kele punen rimata. Samba kalulut si Nabal muangka baga samba pat puineng, ta aipaagai katubunia sinanalepnia apapa pat aili simansep.

³⁷ Tapoi ka mansepnia, kele ta aimapuineng si Nabal, paagainangan katubunia sinanalepnia pagalaiat sangamberi pukakatai nenda. Lepa oraknangan si Nabal besit teinung samba sangaliot tubunia ibailiu matei.

³⁸ Ele aili pulu ngagogoi pa oraknangan si Nabal besit teinung minca sibara kai Tuhan bailiu mateinia.

³⁹ Kele aiarepnia si David kamamatei Nabal, kuanangannia, “Tuumunake le si Tuhan! Aisiliakean paloloiat sigalaiakenen Nabal katubukku, samba aikeraakean paguguletNia masigalaiake pukakatai. Si Tuhan masiukum si Nabal kalulut pukakatainia.” Lepa geti kaunangan si David pakoinien katubut Abigail masinounounia ibailiu sinanalepnia.

⁴⁰ Iageti sege sikoiniakenen David nenda katubut sinanalep nenda ka Karmel samba kuarangan katubunia, “Aikoiniake kai si David masipatiboake ekeu kalulut ioba masinounou ekeu ibailiu sinanalepnia.”

⁴¹ Tusurunangan si Abigail samba purekkuknangan pat aili utenia ka polak samba kuanangan, “Aku nene pagugulet David, matarek aku masibui reretda sia sapaguguletnia.”

⁴² Lepa geti olaakenangan ipatarek tubunia. Tusakainangan ka teitei kalideinia pasamba lima sia sapagugulet tainanalep masipaenungake, einangan te masitut sikoiniakenen David, iageti bailiunangannia sinanalep David.

⁴³ Kepei nenda amutalimouan si David pasamba si Ahinoam sibara ka Jizreel, samba kineneiget si Abigail leu et ibailiu sinanalepnia.

⁴⁴ Ta'pei amaburu nenda si Saul aitalimouakean si Mikhal togania, iate sinanalep David, pasamba si Palti togat Lais sibara ka laggai Galim.