1Sam. 24 - BUKO SIPUNENAN

Si David ta ioba masimateiake si Saul

¹ Barania sedda ei si David ka kupkumen laggai En-Gedi, samba pulipputnangan ka ngaliu leleu.

² Kateteret simaruei peile aitoili si Saul barania ka pasaggangan masisaggangi tai Filistin, paagairangan katubunia, si David ainia ka kudduat simatangeu ka bebet En-Gedi.

³ Olaakenangan si Saul masipili telu ngaribu saladdu simakope eru ka sangaliot Israel, lepa ei nia masigaba si David sambatda saladdunia ka saigit kabelaiat sulu Leleu Bukku Simatsura.

⁴ Iageti sege si Saul ka bebet piga pa gelit biribiri ka bebet enungan. Sedda ai leu et sara ngaliu samba gurunia ka bagania masiribbai. Bulat apasese si David samba saladdunia ai mulipput ka ngaliu nenda leu et, ka isit kabaga peile.

⁵ Lepa kuarangan saladdut David katubunia, “Nene te oggak sipasese ukkui! Ta' pa aikuangan si Tuhan katubum kisene, “Kusegeake le geti saggaknu katubum, galaiake siobat bagam katubunia!” ” Iageti moileakenangan iei ka kudduat Saul ja'janangan goiso taiming jubah Saul.

⁶ Tapoi kele aitukapplu nenda, bagainangan bagania si David masele kalulut aigalaiake pagalaiat nenda.

⁷ Kuanangannia katubutda saladdunia, “Bule si Tuhan masijago bui' iaili kugalai katai katubut rimata sipilit Tuhan. Beri goiso ta omoi kubesikinia, kalulutnia rimata sipilit Tuhan!”

⁸ Kisedda te si David masiaseake saladdu samba ta aiobaake sia masisaggangi si Saul. Suru si Saul samba masikaddiuake gua nenda, lepa riuriuakenangan puenunganannia.

⁹ Lepa geti bela leu et si David barania ka ngaliu nenda samba pusoganangan, “Tuanku rimata!”

¹⁰ Pitcananagan teiteinia si Saul samba si David murekkuk iabeuakenia, lepa kuanangan, “Angoi anuarepi nganganda sirimanua sipasikua,” Aku masibesiake masimateiake Tuanku rimata?

¹¹ Kineneiget Tuanku, ta anuagai ka bagat ngaliu simaraei nene, si Tuhan masiake ekeu katubukku. Ai sipasina'na aku sara sirimanua addeat masimateiake Tuanku, tapoi manuntu bagakku katubum akupaatu poi ta kuoba masibesiki rimatakku sipilit Tuhan.

¹² Itco pei ukkuiku! Itco pei sigetaiat leppei Tuanku siukkaakenenku nene! Sibulatnia momoi kumateiake Tuanku, tapoi aku sarat masija'ja' goiso bebet jubah Tuanku. Oto toila te' aku poi ta'anai pupaatuanan sikatai ele masipajo leu et. Tuanku masikukru aku bule numateiake aku, kenanen ta masele aku katubum.

¹³ Bule si Tuhan le masiteuake kasei simasele karuatta. Si Tuhan le sipasilulumunake sigalai Tuanku katubukku, tapoi beri goiso ta kubesiki Tuanku.

¹⁴ Anuagaian pasikat siburu nene, “Pukakatai sarat sirimanua sikatai le masigagalaiake.” Kalulut nenda ta kubebesiki Tuanku.

¹⁵ Lelekake pei aku nene mateiakenennu rimata Israel! Itco pei aku nene sibailiu kukuretnia! Aku sangamuneng jo'jo simamatei le, sangamuneng goset le.

¹⁶ Si Tuhan ibailiu geti sipasiukum ekeu samba aku. Bule Nia masilelekngake paukelat nene, samba masiropake aku samba masiarauake aku ka Tuanku rimata.”

¹⁷ Kele ailepa aipanibo si David, kuanangan si Saul, “Ekeu pa nenda, ale David togakku?” Lepa pusounangan.

¹⁸ Iageti kuanangan katubut David, “Ekeu le sineseat, samba aku le simasele.

¹⁹ Pukakataiku katubum anusiliakean anugalai simaeru katubukku. Ka gogoi nene anupatoilaan bulat erunu katubukku, kalulut ta anumatei aku, kenanen aisegeakean aku katubum si Tuhan.

²⁰ Ta mareirei sara sirimanua iaili saggaknia samba iobaake ipurimanua! Oto, bule si Tuhan masipanukani ekeu kalulut sigalainu simaeru katubukku ka gogoi nene!

²¹ Kineiget matonem bagakku ekeu le geti ibailiu rimata Israel samba purimataat Israel ariuriu le imaron ka kabeinu.

²² Kineneiget pusuppa le ka kamatat Tuhan, ta numamateiake muntogatku samba ta nupoposa oninda saeppukku.

²³ Iageti pusuppanangan si David gagalaiakenan nenda, lepa toili si Saul ka lalepnia samba saladdunia leu ei sia ka pulippunanda.