1Sam. 23 - BUKO SIPUNENAN

Si David ka laggai Kehila

¹ Ka sara gogoi paagairangannia katubut David, tai Filistin airasasaggangi laggai Kehila samba airararaurau gandum ka pamerakat.

² Lepa pererenangan si David katubut Tuhan, “Bulat memei pa aku kusaggangi tai Filistin?” Aleginangannia si Tuhan, “Oo, saggangi sia samba arauake sipulalaggai ka Kehila.”

³ Tapoi kuarangan saladdut David, “Beringan sene, ka Jehuda bulat malotoan sita, sarapei ke mei sita masisaggangi saladdutda tai Filistin ka Kehila.”

⁴ Kalulut nenda tiddounangan minca enungan si David katubut Tuhan, samba aleginangannia si Tuhan, “Bui' makarat bagam, saggangi le tai Filistin ka laggai Kehila, kalulut tai Filistin kuaake sia ka kabeinu.”

⁵ Iageti ei si David samba saladdunia ka Kehila, lepa sia masisaggangi samba leu ramateiake maigi tai Filistin, samba rauraurangan tarimeura. Kisedda te si David aiarauake sipulalaggai ka laggai nenda.

⁶ Kateteret aituitui si Abyatar togat Ahimelekh aiei katubut David ka Kehila, nia leu et masiabbit efod.

⁷ Kateteret aitupaagai katubut Saul, si David ainia ka Kehila, aipaatu poi si Saul, “Si David aisegeakeannia Taikamanua katubukku. Atuluplupmannia kalulut aituguru' ka bagat laggai sibara irip samba sibara matatbaliu gugurukat.”

⁸ Lepa koiniakenangan saladdunia si Saul mei ka Kehila masialou si David samba sangamberi saladdunia.

⁹ Tapoi aiagaian si David, pukakatai patuat Saul katubunia. Kalulut nenda kuanangan katubut imam Abyatar, “Abbit le efod nenda sene.”

¹⁰ Lepa panindounangan si David, “Tuhan Taikamanuan Israel, akuarepman ibesiake le si Saul moi ka Kehila ipakatai laggai nenda kalulut aku, paguguletNu.

¹¹ Bulatnia leu pa katuareman siarepku nenda? Tuhan, Taikamanua Israel bule Nupaagaiake katubukku. Aleginangannia si Tuhan, “Oo, si Saul momoinia.”

¹² Lepa parerenangan minca si David, “Taleu rasesegeake le aku tai Kehila samba saladduku katubut Saul?” Iageti aleginangan si Tuhan, “Oo.”

¹³ Lepa si David samba saladdunia ele aisia enem ngotu igitda, olaakerangan masikaddiuake Kehila samba mukuddu ka sara kudduat ka kudduat bagei. Kateteret aiarepnia si Saul, amutuituian si David ikaddiuake Kehila, tairiuriuakenangan sipinatunia masisaggangi sia.

Si David ka kudduat simatangeu ka Zif

¹⁴ Lepa nenda kuddu si David ka leleu simaigi ngaliu ka kudduat simatangeu Zif. Sarat ikukru le nia si Saul. Tapoi si Tuhan ta aikaunia katubut rimata nenda.

¹⁵ Kenanen poi kisedda maloto leu et si David, kalulut si Saul masibesiake masimateiakenia. Ka sara tetere ai si David ka kudduat simatangeu Zif ka Hores.

¹⁶ Iageti ei Jonatan masiailiakenia sedda masironake putoneman bagania, jajagonania Taikamanua.

¹⁷ Kuanangan si Jonatan katubunia, “Bui' numaloto, ta sesege kabei ukkuiku katubum. Bulat aiagaian ukkuiku, ekeu te ibabailiu rimata Israel samba aku ibailiu sirimanua sikarua kudduat purimataatnu.”

¹⁸ Lepa si David samba si Jonatan masiappra pukerekat baga pasuruangan ka matat Tuhan. Lepat nenda toili si Jonatan ka lalepnia, oto ka sia si David kuddunia ka Hores.

¹⁹ Lepa geti piga pa sia sibara ka Zif ei sia masiailiake si Saul ka Gibea samba kuarangan, “Si David ainia mulilipput ka kupkumen laggaimai ka bagat sangamberi ngaliu legret Hores, ka uddut leleu Hakhila saigit ka kaiaman kudduat simatangeu ka Jehuda.

²⁰ Kuagai kai, bulat noba masilaba si David, lulut nenda, konan le ka kupkumen laggaimai. Aile kuake kainia ka kabeinu.”

²¹ Aleginangan si Saul, “Bule ipanukani kam si Tuhan kalulut sigalaimui simaeru katubukku!

²² Kenan kam samba pulelek kam minca, lelekake kam bulat simakolou kaipa ikukuddu si David samba kasei amasiitconia sedda. Akuarep poi bulat masiku paatuatnia.

²³ Oto lelekake kam simakolou sangamberi ngaliu sibailiu kudduat pulippunannia, samba toiliake kam sene nusegeake kamnia katubukku. Lepa geti ei sita simakere, samba ke aipeilenia ka kupkumen laggai nenda, bulat kugagaba le nia, kenanen kugabania ka talagat sangamberi sipuriribu tai Jehuda!”

²⁴ Iageti tuitui sangamberi sirimanua nenda minca ka Zif muboiki kai Saul. Kateteret nenda si David samba saladdunia ai sia ka simatangeu Maon, ka isit kaiaman Jehuda.

²⁵ Kateteret aiei si Saul samba saladdunia masigaba si David, paagairangannia pagalaiat nenda katubut David bailiunangan ei nia ka leleu bukku ka simatangeu Maon samba mukuddu sedda. Kele aiagainia si Saul pagalaiat nenda, olaakenangan masikukru si David.

²⁶ Si Saul samba saladdunia muenung ka iggrit leleu saigit sene, oto ka sia si David samba saladdunia ka iggrit leleu saigit sedda. Aioolaake si David iareuake tubunia kai Saul, Kateteret malegrengan le si Saul masialou si David.

²⁷ Tapoi sinulut oi sara pakoinien masiailiake si Saul samba kuanangan, “Toiliake ekeu simaruei! Arasaggangingan laggaita tai Filistin.”

²⁸ Iageti ariakenangan si Saul masikukru si David samba einia masisaggangi tai Filistin. Iate lulunia aituoniake kudduat nenda: Leleu Bukku Kabelaiat.