1Sam. 21 - BUKO SIPUNENAN

Si David mutuitui katubut Saul

¹ Iageti ei si David katubut Imam Ahimelekh ka Nob. Kabagat geret tubu bela si Ahimelekh masiailiake si David samba kuanangan katubunia, “Angoi saram le amoi samba ta'anai sia sipaaleiake ekeu?”

² Aleginangannia si David, “Aiake sara galaiakenen rimata katubukku samba tamomoi kupaagainia katubut kasei pa pagalaiat galaiakenen nenda. Kalulut nenda koiniakekungan saladduku rapangena ka sara kudduat.

³ Oto kineneiget, aponia sibabara katubum? Ake katubukku lima roti ele apa pa sibabara sene.”

⁴ Lepa kuanangan imam nenda, “Ta'anai kaku roti simareirei, sarat roti panguruat le sibabara, momoi nualania, sarat kau le rajago tubutda saladdum ka tainanalep.”

⁵ Aleginangannia si David, “Kirenangan, tamomoi kupaalei kai ka tainanalep, kele siburu, ke mei aku pasaggak. Malina le saladdukku siripot arat, kenanen ka puenunangan simareirei, sarapei kineneiget, malina le sia.”

⁶ Lepa kaunangan roti panguruat nenda si imam katubut David, aipoi sibabara katubunia sarat roti sipanguruatakenen ka Taikamanua le, samba atuakkatakean ka kudduat pasibuluat bule tusaili roti sibau. (

⁷ Apasese, si Do'eg tai Edom, ute sipasijago tarimeu Saul ainia sedda ka gogoi nenda masienungake enungan galaiakenen kabagat arat.)

⁸ Lepa geti parerenangan si David katubut Ahimelekh, “Taleu ai simuinebakkat anukoiriake ele lanjau sioi kupakei? Sigege le parentat rimata bailiu tuitui aku simaola samba ta'an maoggak kuala lanjau ele pamatei bagei.”

⁹ Lepa aleginangannia si Ahimelekh, “Akukoiriake lanjau Goliat, tai Filistin simateiakenennu ka su'sut Ela nenda, lanjau nenda ai kabeliu efod, ai katatabunan ka bagat komak. Ke nuoba, alaat, sarat nenda le pamatei sibabara sene.” Kuanangan si David, “Lanjau nenda lanjau simakope eru ka sangaliot tobbou laggai, akean le nenda katubukku!”

¹⁰ Ka gogoi nenda leu et putuituinangan si David katubut Saul, lepa segenia katubut Akhis rimata laggai Gat.

¹¹ Kuarangan sapaguguletnia si Akhis, “Ta'pa nia nene si David, rimata ka tobbou laggainia. Ta pa kalulut nia araputuru samba arapuurai tainanalep kise, ‘Si Saul masimateiake sipuriribu saggak, tapoi si David sipupulu ngaribu?’ ”

¹² Sangamberi tiboiet nenda sisaila pupaatuanan David, samba bulat makope lotonia katubut Rimata Akhis.

¹³ Lulut nenda, ka matat sirimanua simigi kaunangan tubunia si David kele siroro'. Kateteret rasibo ralabania, galainangan kele sitaiagai patuat, rabaknangan matatbaliu laggai samba pujainangan menmennia ka bulut bakklania.

¹⁴ Lepa kuanangan si Akhis katubutda sapaguguletnia, ta anuico kam sirimanua siroro nenda? Angoian le nuabbit kamnia sene?

¹⁵ Ta'pei pa maigi sirimanua ka bebeku siroro', bailiu ambitmuian sirimanua kele nene ka lalepku?”