1Sam. 20 - BUKO SIPUNENAN

Si Jonatan masiropake si David

¹ Iageti tuitui si David barania ka Nayot legret Rama samba einia masiailiake si Jonatan, lepa kuanangan, “Aponia selekku? Aponia katai akugalai samba aponia joku katubut ukkuinu bailiunangan ioba imateiake aku?”

² Aleginangannia si Jonatan, “Bui' nukua kisedda! Ka onin Tuhan, ta imamateiake ekeu ukkuiku. Sarat ipaagai le ukkuiku sangamberi siisiakenennia katubukku, bulat besiakenen, kisedda leu et ta besiakenen. Oto ta maro' bagakku ipakele sipinatunia nenda katubukku. Lulut nenda, apa sikuam nenda ta sibulatnia!”

³ Aleginangannia si David, “Bulat aiagaian ukkuinu, obanu samba nuntut bagam katubukku. Oto bulat ta ioba ipaagainia katubum, babara mareureu bagam. Kenanen kipangan leu et, ka onin Tuhan Sipuririmanua, bulatnia te purimanuaiatku aiat le sangabakkou ka iaili ka kamateiat.”

⁴ Lepa kuanangan si Jonatan, “Apa le sitiddounu, galaiakekungan leu et nia.”

⁵ Aleginangannia si David, “Kisene, mancep iate punen kabelaiat laggo, samba siripokatnia mukom le aku pasamba rimata. Tapoi ke pasese kabagam, memei le aku mulipput ka leleu teret mancep minca sinoibo.

⁶ Ke irereake ukkuinu pagalaiat ta akuoi, kua ka ukkuinu, akutidouan katubum kutoili simaola ka Betlehem, kalulut sedda tubaraake punen buluakenen sisenen rura ka sangamberi saeppukku.

⁷ Ke ikua rimata, “Maeruan leu, oto maaraukungan leu, tapoi ke mugolu ukkuinu, againungannia bulat aiteuakean ukkuinu imateiake aku.

⁸ Oto kutiddou paromannu, kalulut atagalaian pukerekat baga ka matat Tuhan. Tapoi ke masele aku, mateiake le aku, tapoi bui' le nusegeake aku katubut ukkuinu.”

⁹ Aleginangan si Jonatan, “Bui' makarat bagam! Ke kuagai bai simakolou aimuineakean paatuatnia ukkuiku imateiake ekeu, aile kupaagainia katubum.”

¹⁰ Lepa geti parerenangan si David, “Kasei masipaagai katubukku ke iake alegiat ukkuinu kabagat golunia?”

¹¹ Kuanangan si Jonatan katubut David, “Konan le taei ka su'su,” Iageti ei sia simakere ka su'su.

¹² Lepa kuanangan si Jonatan katubut David, “Bule Tuhan, Taikamanuan Israel ibailiu sapasimuneng! Mansep simanseman ele mansep minca kele katetere kineneiget nene, kubesiake kuagai patuat ukkuiku. Ke galai tubunia maeru katubum, aileu kuake katuareman katubum.

¹³ Ke aile ibebesiake imateiake ekeu, paagaikungan leu et katubum bule ioi nubela nuarauake tubum. Bule si Tuhan masimateiake aku ke ta kugalaiake nenda. Bule si Tuhan masiropake ekeu kele airopake ukkuiku siboiki!

¹⁴ Ke ai peile aku muririmanua, repdem le pakerekat bagatta ka matat Tuhan samba kau matopit ekeu katubukku, tapoi ke ta'an anai aku,

¹⁵ patoila le riuriu topitnu ka tatogakku teret buru-buru. Samba ke imateiake sangamberi saggaknu si Tuhan,

¹⁶ bui' itakki pakerekat bagatta ruatta. Tapoi ke tutataake palelenganta nene, bule si Tuhan masiukum ekeu.”

¹⁷ Oto ka sikarua ngamincania si Jonatan masikoiniake si David masigalai palelengan ipununtukinia baga, kalulut bulat manuntu bagania katubut David kele nuntut bagania katubunia.

¹⁸ Lepa geti kuanangan si Jonatan katubunia, “Mancep Punen Laggo Sibau. Bulat maagai te taibabaram, kalulut ta anai sikudduiji kudduatnu ka pukoman;

¹⁹ sarapei ka mansep minca! Kalulut nenda, kenan le ka kudduat pulippunannu siboiki nenda, samba ngena le ka beliu tinambut bukku sedda.

²⁰ Oto kupanaake telu ngantaili silogui ka ipot bukku nenda, kugalai kele masipana pakokat.

²¹ Lepa kukokoiniake te paguguletku masiabbut sangamberi siloguiku nenda, samba ke kukua katubunia, “Itco sangamberi silogui nenda sene peile ka legre, alaat,” Nenda katukolobatnia, maarau ekeu samba momoi nubela. Musuppa aku ka onin Tuhan sipuririmanua kau mangka bagam samba ta'anai kalotoakenen apapa.

²² Tapoi ke kukua ka paguguletku, “Itco sangamberi silogui nenda sedda peile ka reunan,” nenda katukolobatnia, si Tuhan masikoiniake ekeu nutuitui, oto kau nutuitui.

²³ Bule si Tuhan masijago sita teret buru-buru masiukkaake pakerekat bagatta ruatta.”

²⁴ Iageti pulippunangan si David ka su'su. Ka punen Laggo Sibau, oi Rimata Saul ka punen samba kuddunia ka pukoman.

²⁵ Kele simareirei ikuddu ka bebet rupi, si Jonatan mukuddu sipamamatai pasamba rimata, si Abner mukuddu ka bebet Saul, tapoi kudduat David ta'anai sikudduijinia.

²⁶ Tapoi si Saul ta'anai aikua apapa ka gogoi nenda, aipoi aipaatu, “Ele aile pasailaat katubunia, bailiu ta malinania ka siripot arat.”

²⁷ Tapoi ka gogoi sibabara minca, iate gogoi sikarua Laggo Sibau, ta leu et anai sikudduiji kudduat David, lepa parerenangan si Saul katubut Jonatan, “Angoian le sokat samba kineneiget ta'aibara si David ka punen?”

²⁸ Aleginangannia si Jonatan, “Bulat aitiddouan le katubukku iei ka Betlehem.

²⁹ Aikua, “Obaake kuei, kalulut saeppukku ai sia mupupunen pasibuluat ka Betlehem, samba bulat sakebbuku le amasisogai aku. Lulut nenda, ke nuobaake, eddangan kuei paaili samba masiitco sasarainangku.” Iate lulunia ta aibara ka punen nene, ukkui.”

³⁰ Masiarep nenda bara golut Saul simakope katubut Jonatan samba kuanangan katubunia, “Toga sikatai le ekeu sitaiagai arat! Kineneiget akuagaian, mare're le ekeu katubut David anupakaila tubum samba leu inam!

³¹ Ta'pei pa makokolou ka bagam, ke aipeile muririmanua si David tamomoi ibailiu ekeu rimata ka sangaliot tobbou laggai nene? Kineneiget koiniake sia ragabania samba raambbitnia sene, aipoi bui' ta matei le nia!”

³² Iageti aleginangan si Jonatan, “Angoi tumateiakenia? Aponia jonia?”

³³ Masiarep nenda soatakenangan simuinebakkatnia si Saul katubut Jonatan bule imateiakenia. Oto againangannia si Jonatan bulat ibebesiake le ukkuinia imateiake si David.

³⁴ Bulat kopet golunia si Jonatan kaddiuakenangan meja pukoman punen samba ta'anai aikom apapa ka gogoi sikarua Punen Laggo Sibau nenda, kalulut mareureu bagania masipaatu si David sipaloloi Saul ukkuinia.

³⁵ Patonia le simansep ei si Jonatan ka leleu paaili kai David kele sitiboira simakere. Abbitnangan sara sia tatoga simanteu, paguguletnia,

³⁶ lepa kuanangan katubunia, “Konan, abbutan le sangamberi silogui sipanaakenenku!” Aipababalau toga nenda, panaakenangan sara silogui si Jonatan masisaliu toga nenda.

³⁷ Kateteret toga nenda sege ka kudduat kabelekat silogui, pusoganangan si Jonatan katubunia, “Itco, silogui nenda, sedda peile ka reunan!

³⁸ Olaake goiso, apa nupaatu!” Toga nenda masiabbut silogui nenda samba toilinia katubut tuannia.

³⁹ Tapoi pagugulet nenda ta iagai katukolobat tiboiet Jonatan nenda, sarat si Jonatan pasamba si David le iagainia.

⁴⁰ Lepa geti kaunangan rourou samba silogui nenda katubut toga nenda samba koiniakenangannia itoili ka laggai.

⁴¹ Kele aituitui toga nenda, bela si David sibara ka beliu tinambu bukku nenda, purekkuknangan telu ngaminca. Pusourangan ruadda kateteret arapasigguk ruadda. Reureu bagat David peile makope bele peile ka reureu bagat Jonatan.

⁴² Iageti kuanangan si Jonatan katubut David, “Bule Taikamanua masiropake ekeu. Si Tuhan sibailiu ron sita samba sapunuteteuta sarat masiukkake pakerekat bagatta ruatta ka matat Taikamanua.”

⁴³ Kapplu nenda tuitui si David, samba si Jonatan leu et toili ka laggai.