1Sam. 2 - BUKO SIPUNENAN

Panindogat Hana

¹ Lepa panindounangan si Hana, kuanangannia, “Si Tuhan masiangkaake bagaku, sigalaiNia sipagora bagaku. Kabagat angkat bagakku kugeigei saggaku, kalulut Taikamanua sibulatnia amasiropmake aku.

² Ta'anai sipunenan kele si Tuhan! Sarat Nia le sioi masiake pukuneman.

³ Ariake le putitiboatnu sita'paluluat! Lepaake mubuak titiboat! Kalulut Tuhan nenda Taikamanua siagai sangamberinia sipasiukum sangamberi sirimanua siripot sigalaiakenennia.

⁴ Amabakbakngan te rourou simagege, tapoi sirimanua simasaggo memei maroron le.

⁵ Sirimanua simaengtek siboiki kalulut iginia komen, kineneiget aibailiuan sia sipugagalai siupaiji bule ibara komen. Sirimanua sipulalaje siburu, kineneiget sege bagatdra, aian komen simemetnia. Sinanalep sitaipususule, kineneiget aian umun tubu, aian pitu tatoga sinutuakenennia! Tapoi ina simigi tatoga, araobaakean ipangorik samba arakaddiuakeannia.

⁶ Si Tuhan masimateiake, Nia leu et masirimanuake. Ka laggaira simamatei Igorosotnake sirimanua. Samba Nia leu et masiaakatnake sibara sedda.

⁷ Nia le masigalai ramageba sirimanua, Nia leu et masigalai ramakayo sirimanua. Ai sirimanua epeakenenNia, ai leu et buakngakenenNia.

⁸ Sibara ka pugebakat akkatnakenangan sia pangoringanda, sibara ka besit puririmanua belaakenangan sia ka paloloiatda. Bailiuakenangan sia aleira sia siabeu tiboi tubu, samba kaunangan pupasikelanan sibaraake katuumunan tubu. Saisai polak si Tuhan le sibakkatnia, galainangan polak ka uddutnia.

⁹ Sirimanua simatopit sarat masanang le ka bagat pasikelat Tuhan. Tapoi sikatai tusubuake ka bagat pugepgeman. Ronta saratta ta momoi tukaroake, puroron sirimanua ta iaake kamanangan.

¹⁰ Sangamberi saggak Tuhan masusubu, maloto sia, kalulut naunia kele leleggu, iukum te geti si Tuhan sangaliot polak nene, samba kaunangan pulatcanannia si Tuhan katubut rimata sipiliNia nene.”

¹¹ Lepa toili si Elkana samba sangalalepnia ka Rama, tapoi si Samuel, toga nenda, kuddunia ka Silo masipuuku si Tuhan ka bagat pupasikelanan Imam Eli.

Tatogat Eli

¹² Tatogat Eli bulat makatai sia. Ta' rapuletcei si Tuhan

¹³ samba kenanen sia tai imam ragagalai le siobat bagatdra ka tai Israel. Ke ai sara sirimanua sipanguruatnake buluakenen, oi pagugulet imam abbitnangan kakakkak sitelu son. Aiseseu akkula nenda,

¹⁴ punuakenangan kakakkak nenda ka bagat pario paneu akkula nenda, iageti apa ipunu kakakkak nenda si imam sibakkatnia. Kisedda te ragalaiake tai imam katubut sangamberi tai Israel siooi ka Silo masipanguruatnake buluakenen.

¹⁵ Ai leu bagei iipo ioi pagugulet nenda, ta'pei atubaggei tabenia addeat rarangen, iageti kuanangannia katubut sirimanua sipanguruatnake buluakenen nenda, “Akean le kam akkula simata' nenda katubut imam bule iraraknia, ta ioba masisilo akkula silepa seu.”

¹⁶ Ke sirimanua nenda masialegi, “Simaerunia tatutut le katukelat, samba masilabo tabe nenda le boiki, ke alepaan nenda momoi nuala kipa siobanu,” iageti kunangan pagugulet nenda, “Ta', kineneiget leu et nuaakenia, ke ta nuake, alakungannia geti sibesiakenen.”

¹⁷ Kisedda te ruadda togat Eli nenda masigalai jo sabeu ka matat Tuhan, kalulut arapulabbei panguruat buluakenen katubut Tuhan.

Samuel ka Silo

¹⁸ Si Samuel tatoga peilenia aipuukuan si Tuhan. Pakeinangan leppei sikokoi sibara ka komak juto, kele leppeira tai imam ka parurukatda rapanindou.

¹⁹ Senen rura inania masigalai jubah sigoiso samba kaunangannia katubut Samuel, ke sinanalep nenda makere raei simanteunia masipanguruatnake buluakenen sisenen rura.

²⁰ Iageti si Eli masisukatnake si Elkana samba sinanalepnia, samba kuanangan katubut Elkana, “Bule si Tuhan masiake tatoga minca ka tubum sibara ka sinanalepnu nene, sibailiu sailit toga siakenu katubut Tuhan.” Kele ailepa nenda toili sia ka Rama.

²¹ Taikamanua masisukatnake si Hana, bailiu tu'tuakenangan minca telu tatogania taimanteu samba rua sinanalep. Si Samuel leu et aituppaiat beunannia ai leunia masipuuku Taikamanua.

Si Eli samba tatogania

²² Si Eli bulat amabajaan, mariuriu le ipasiarep pangasegekat pagalaiat puparaboanandra tatogania katubutda sia tai Israel. Si Eli iagai leu et, tatogania nenda amerep sia pasamba tainanalep sipugagalai ka isit ka mata ka matatbaliu Sapou.

²³ Kalulut nenda kuanangannia ka tubutdra tatogania, “Akusiloan te pangasegekat sibara ka sangamberi paamian pagalaiat puparaboananmui sikatai. Angoian le anugalaiake kam nenda?

²⁴ Bui' te nugalai kam kele nenda minca kam tatogakku. Bulat makope katai apa sikuatdra paamian Tuhan pagalaiat kam!

²⁵ Ke sirimanua masigalai sele ka sirimanua, Taikamanua momoi iropmakenia, tapoi ke sirimanua masigalai jo katubut Tuhan, kaseian le momoi masiromakenia?” Tapoi ta arapuletcei nganturat Eli ukkuira, aipoi aiteuakean si Tuhan imateiake sia.

²⁶ Tapoi si Samuel, toga nenda, memei mabebeunannia samba memei raobania, ka matat Tuhan kisedda leu et ka matat sangamberi sirimanua.

Pamoilianan pagalaiat si Eli samba tatogania

²⁷ Ka sara gogoi oi sara nabi katubut Eli samba segeakenangan tiboiet patonekat sibara katubut Tuhan ka tubunia, kise le tiboiet patonekatNia, “Ka teteret taikebbukatmui si Aron samba sangalalepnia ibailiu pagugulet rimatatda tai Misir, Aku patoilaan tubukKu katubut Aron.

²⁸ Sibara ka sangamberi muntogat Israel Aku pilingan saeppunia ibailiu imamKu, addeat sipuuku ka kudduat pasibuluat, masilabo kumanyang samba masipakei leppei imam ke patibo sia pasamba Aku. Samba katubutda samba leu ka reddenanda Aku kauan ka sia gege addeat masiala sangarubeiat sibara ka buluakenen pusurakat sirarak ka kudduat pasibuluat.”

²⁹ Oto, angoian le ibabara alau bagam masiitco sangamberi buluakenen siripokat siparentaakenenKu, sipanguruatnakenen paamianKu ka tubuKu? Angoian le, makope nusuru' tatogam bele pei pasisusurunu Aku, samba anuobaake sia masipamo'mo tubutda ka rubeiat simakope eru sibara ka senen panguruat paamianKu siakera katubukKu?

³⁰ Aku, Tuhan Taikamanuan Israel, siburu Akugalaian palelengan, saeppum samba samuntogatnu te geti masipuuku Aku sibailiu imam teret buruburu. Tapoi kineneiget ta'an kubebesiake pagalaiat nenda! Aipoi sisuru Aku, Kususuru te geti sia, tapoi sipaloloi Aku, Kupaloloi te geti sia.

³¹ Arepmake, iaaili te teterenia Kumateiake sangamberi sibau tubu ka saeppum samba samuntogatnu, bailiu ta anai sia sara sirimanua taimanteu ka bagat muntogatnu sipururura simigi.

³² Mureureu baga te ekeu samba masi'si bagam masiitco sangamberi puuktungan kaunen geti ka sia sirimanua sabagei ka Israel, tapoi ka bagat muntogatnu geti, matei le kateteret sibau tubu peile.

³³ Tapoi sara sia sibara ka reddenannu, Kuoobaake te geti murimanua samba masipuuku Aku sibailiu Imam. Tapoi mapepeset le nia samba murimanuania ka belet baga. Sangamberi tatogam sabagei geti matei le sia ka lanjaura tai saggak.

³⁴ Sibailiu toggaiat bulat puaailina sangamberi sikuakKu nenda, ruadda togam nenda, si Hofni samba si Pinehas ka bagat gogoi simakere te geti ramamatei.

³⁵ Lepa pilikungan imam simatopit katubukKu samba sipasigagalaiake apa siparentakenenKu katubunia. Katubunia te geti Kukakau reddenan sipugagalai simariuriu sibailiu imam ka matat sangamberi rimata sipilikKu.

³⁶ Senen reddenannu sipuririmanua peile, memei te sia ka imam nenda masitiddou bulagat samba komen. Tiddounangan te geti, Obaake pei aku masiropmake sia tai imam, bule ioi kupukom kenanen sangatamukat le.”