1Sam. 18 - BUKO SIPUNENAN

Si David samba Jonatan

¹ Kele ailepa patiboat David pasamba si Saul, si Jonatan togat Saul, masiarep patiboatda nenda; samba manuntu bagania si Jonatan katubut David.

² Ka gogoi nenda Si Saul masiabbit si David ka lalepnia samba ta aiobaake itoili kalalep ukkuinia.

³ Kalulut nenda appranangan palelengan pasuruangan si Jonatan katubut David teret buru-buru.

⁴ Goloknangan leppeinia si Jonatan lepa kauanangannia katubut David, ialeu et leppei pasaggak samba lanjau, rourou samba apprat tengania.

⁵ Si David masigalaiake simalelek sangamberi galaiakenen sikau Saul katubunia. Lulut nenda bailiuakenangannia si Saul utet saladdunia, samba si David raobania sangamberi saladdu samba leu sapagugulet Saul.

Si Saul mulaga baga katubut David

⁶ Kateteret aitoili si David, lepat aikalaake si Goliat tai Filistin nenda, samba saladdu tuguru ka bagat laggai, bela sangamberi tainanalep sibara ka sangamberi laggai Israel raroroi Rimata Saul. Uraiakerangan sangamberi urau angkat baga, samba muturu samba masinauake rebana samba kecapi.

⁷ Aisia mututuru tainanalep nenda puurairangan kise, “Si Saul masimateiake sipuriribu saggak, tapoi si David sipupupulu ngaribu.”

⁸ Masiarep nenda, pugolunangan simakope si Saul. Aipoi ipaatunia, si David araaddeakean simateiakenennia sipupulu ngaribu, oto kaku geti sipuriribu le. Ta'an mabuburu bailiuakerangannia rimata.

⁹ Barania ka gogoi nenda malaganangan bagania katubut David

¹⁰ Ka gogoinia imapato si Saul ainia ka lalepnia samba aiukkaake simuine bakkatnia samba sinulut oi katubunia ketsat sikatai sikoiniakenen Taikamanua, bailiu pugolunangan kele sirimanua siroro'. Kateteret nenda si David ainia mukecapi kele simareirei.

¹¹ Si Saul masisoatake simuinebakkat nenda, kalulut ipaatunia, “Kusoatake simuinebakkat nene katubut David pat turi' ka rupi!” Lepa soatakenangan simuinebakkat nenda rua ngaminca katubut David, tapoi amoi aikatsliake tubunia si David.

¹² Seseakenangannia si Saul, si David nene aijajagonia si Tuhan tapoi ka sia geti aikaddiuakeannia si Tuhan. Kalulut nenda, malotonangan katubut David.

¹³ Iageti areuakenangan si David katubunia samba bailiuakenangannia utet sangaribu saladdu, bailiu si David masiuteake saladdunia ka senen pasaggangan.

¹⁴ Mariuriu igalaiake sangamberi galajetnia, lulut si Tuhan masiropakenia.

¹⁵ Kele aiitconia si Saul, sarat mamanang le si David ka pasaggangan, makopenangan lotonia katubut David.

¹⁶ Tapoi sangamberi tai Israel samba tai Jehuda manuntu bagatda katubut David kalulut nia sara ute sigalai maigi simaeru.

Si David mutalimou ka togat Saul

¹⁷ Si Saul masiisiake bule si David ramateiakenia tai Filistin ka bagat pasaggangan, bule ta nia imateiake si David. Oto ka sara gogoi kuanangan si Saul katubut David, “Si Merab togakku sinanalep sikebbukat, kuakenia geti katubum ibailiu sinanalepnu, sarat kau le nutoilaake gegem kabagat pasaggangan addeat Tuhan.”

¹⁸ Aleginangan si David, “Kasei pa aku nene, samba saepput ukkuiku katalagat Israel, ibailiu aku talikut Rimata?”

¹⁹ Tapoi kele aiaili teterenia si Merab bule tutalimouake kai David, talimouakerangan siokko nenda kai Adriel sibara ka Mehola.

²⁰ Si Mikhal togat Saul sinanalep bagei manunutu bagania katubut David. Kele aiarepnia si Saul pagalaiat nenda, ioba leu et.

²¹ Aipoi aipaatu si Saul, “Maeruan leu kukau si Mikhal katubut David, bule tupataju si David samba ioi ramateiakenia tai Filistin.” Oto ka sikarua ngamincania si Saul masikua katubut David, “Kineneiget momoi ekeu ibailiu talikukku.”

²² Lepa koiniakenangan sipugagalai ka uma purimataatnia bule rakuania katubut David ka sipinakele, kisene, “Rimata manuntu baga katubum kisedda leu et sangamberi sipugagalai ka uma purimataatnia, oto kineneiget te teterenia simaeru kekeu nutalimouake togania sinanalep.

²³ Tapoi kateteret rasegeake tiboiet nenda katubut David, aleginangannia, “Nukua kam malabbei ibailiu talikut rimata? Aku nene sirimanua simageba samba sita'anai katukolobat!”

²⁴ Paagairangan katubut Saul alegiat David nenda,

²⁵ lepa koiniakenangan sia si Saul masikua katubut David kisene, “Siobakat bagat rimata sibailiu appra putalimougat, sangaotu kulit keikeijetda tai manteu tai Filistin, sibailiu lumun katubut saggak rimata.” (Nene te siisiakenen Saul bule ioi ramateiake si David tai Filistin.)

²⁶ Segeakerangan sipugagalai ka uma purimataat Saul patoneat nenda katubut David, samba si David masisilo sikuat rimata. Kalulut nenda, enan tapei tata teterenia,

²⁷ tuituinia pasamba saladdunia ka kupkumen laggaira tai Filistin. Mateiakenangan rua ngotu sia tai Filistin, lepa alanangan kulit keikeijetda taimanteu, samba kaunangannia katubut Saul taanai aibeleki berisara. Kapplu nenda si Saul masitalimouake si Mikhal kai David.

²⁸ Kisedda te aiseseakenia si Saul, si David nene aijajagonia si Tuhan, samba leu et manuntu bagania si Mikhal togania sinanalep.

²⁹ Oto memei le maloloto le nia katubut David samba malaga bagania ka sanganantat puririmanuania.

³⁰ Ke mei sangamberi rimatada tai Filistin pasaggak, si David peile mariuriu masimateiake sia bele peile ka sautet saladdut Saul sabagei. Iageti memei maagai onin David.