1Sam. 17 - BUKO SIPUNENAN

Si Goliat masiukkat tai Israel

¹ Ka sara tetere tai Filistin masiruruake saladdunia raei pasaggak. Pasikelirangan saladdutda ka laggai Sokho, ka bagat kupkumen laggaira tai Jehuda samba masigalai pusapougatda ka oggak Sokho samba Azeka, legret Efes-Damim.

² Si Saul samba sangamberi tai Israel paruru leu et samba musapou ka su'sut Ela, patarekrangan tubutda masisaggangi tai Filistin.

³ Kisedda te saladdutda tai Filistin murio ka sara tinambu samba saladdutda tai Israel ka tinambu bagei, saba ka oggakdra ai sara peleu leleu.

⁴ Iageti sara sirimanua simagege palaba sipuoni Goliat, sibara ka laggai Gat, belania ka pusapougatda tai Filistin masiukkat tai Israel. Nantania iaili enem eto sangaremang,

⁵ samba nia masipakei tutu tembaga samba leppei pasaggak tembaga sanenia iaili lima pulu pitu kilo.

⁶ Rerenia aisasakkerinia pasitabbot rere sibara ka tembaga, samba ka ta'tania masibairat sosoat tembaga.

⁷ Uman sosoatnia kele beunan loina ka pasiputreat, samba sot sosoatnia iali pitu ngakilo sanenia. Sara sia saladdu muenung ka matania aiaabbit korabbinia.

⁸ Puarinangan si Goliat, lepa pusoganangan katubutda saladdu Israel, “Aponia nugagalai kam sedda? Pasaggak pa kam? Aku sara tai Filistin, ale sapagugulet Saul! Pili kam sara sirimanua ka talagamui simagege tugorosot ioi isaggangi aku.

⁹ Ke makala aku kabagat pasaggangan nenda, momoi ibailiu kai paguguletmui, tapoi ke mamanang aku samba kumateiakenia, kam te ibailiu paguguletmai.

¹⁰ Kineneiget leu et kuukkat saladdut Israel, pili kam sara sirimanua ioi kupasaggak kai!”

¹¹ Kateteret si Saul samba sangamberi sirimanuania masiarep paukkanan nenda, tugegerangan samba mulotorangan simakope.

Si David ka pusapougat Saul

¹² Si David iate togat Isai tai Efrata, sibara ka Betlehem ka Jehuda. Si Isai ai balu tatogania simanteu, samba kateteret puparentaat Saul, si Isai amakopean bajania.

¹³ Katelutda togat Isai sikebbukat ameian sia pasaggak masitut si Saul. Sikebbukat sipuoni Eliab, sikarua si Abinadab samba sikatelu si Syama.

¹⁴ Si David toga sisuleket. Kateteret telu sakebbunia sikebbukat nenda ai sia pasaggak masitut si Saul,

¹⁵ Si David mareirei le ikaddiuake si Saul samba toili ka Betlehem addeat masijago biribiri ukkuinia.

¹⁶ Burunia epat pulu ngagogoi, senen simansep samba kasoibokat, si Goliat masilegreake tubunia ka saladdut Israel samba masiukkat sia.

¹⁷ Ka sara gogoi kuanangan si Isai katubut David, “Ala pulu ngakilo gandum rarak pasamba pulu roti nene, samba abbit le katubutda sakebbunu ka pusapougatda saladdu.

¹⁸ Abbit leu et pulu ngambua keju nene addeatda sautet saladdu. Rerenungan leu kipa pagalaiat sia sakebbunu, samba abbit le toggaiat kaku, paailimui kabagat angkat baga.

¹⁹ Ai sia ka su'sut Ela pasamba Rimata Saul, samba sangamberi tai Israel ai sia pasasaggak rasaggangi tai Filistin.”

²⁰ Ka gogoinia imapato, simanseman suru si David. Lepa patareknangan tubunia. Kaddiuakenangan biribirinia samba segeakenangannia katubut sara sipasijago bule ijagonia, lepa geti alanangan abbinennia lepa tuituinia, siripot parentat ukkuinia. Segenia ka pusapougat kateteret tai Israel bela mei ka pasaggak sialei masigereiake gerei pasaggangan.

²¹ Tai saladdut Filistin samba saladdut Israel masipasikeli saladdutda, bule rapasaggak.

²² Lepa gorostakenangan bibiletnia si David samba galakakenangannia ka sipasijajago sangamberi bibiletda tai saladdu. Pabalaunangan si David ka kudduatda saladdu masiailiake sakebbunia.

²³ Tapoi kateteret ai sia patitibo bela si Goliat ka mata samba masiukkat saladdu Israel, kele galaiakenennia simareirei. Si David leu et masiarep tiboiet paukkanan nenda.

²⁴ Kateteret sangamberi tai Israel masiitco si Goliat, putuituirangan kalulut loto'ra.

²⁵ Kuarangan tai Israel, “Itco pei nia! Arep kam tiboiet paukkanannia! Rimatatta si Saul aigalaian palelengan, kasei le simateiake si Goliat, kaunangan geti panguruat sabeu. Rimata leu et masitalimouake geti sirimanua nenda ka togania. Samba saepput ukkui sirimanua nenda ta'an tuorakake masilului juran.”

²⁶ Lepa kuanangan si David, “Bulat magegenia tai Filistin sipuarat bulungan nenda masiukkat saladdut Taikamanua sipuririmanua!” Iageti parerenangan katubut sara saladdu, “Aponia tukakau geti katubut sirimanua siooi masimateiake tai Filistin nenda samba masiposa paloloiat ka Israel?”

²⁷ Paagairangan saladdu katubunia pagalaiat apa sipalelekakenen rimata.

²⁸ Si Eliab kebbut David sikebbukat masiarep patiboat David pasamba sangamberi saladdu. Bara golunia katubut David samba kuanangan, “Angoi moi ekeu sene? Kasei anukoiniake masipuuku sangamberi biribirimui piga ngamuneng pa nenda ka simatangeu? Kuagai, magege ekeu, nuoi sene masiitco pasaggangan.”

²⁹ Aleginangannia si David, “Apa selekku? Sarat parere' le akugalai!”

³⁰ Lepa tuituinia samba masirereake pagalaiat simakere ka saladdu sabagei, samba sesenangan alegiet kisedda leu et.

³¹ Tapoi piga pa sirimanua sipasiarep tiboiet David, samba segeakerangannia katubut Saul, samba si Saul masikoiniake rasogai si David.

³² Kuanangan si David katubut Saul, “Tuan, ta maloloto sita katubutda tai Filistin nenda! Matarek aku masisagganginia.”

³³ Aleginangannia si Saul, “Ta' momoi, kipa iooi nusagganginia? Mabau peile tubum, oto ka sia amatukelengan pasaggak baranangan kateteret mabau peile tubunia.”

³⁴ Tapoi kuanangan si David katubut Saul, “Tuan, matukklengan kujago biribirit ukkuiku. Ke ai singa ele beruang moi masitarakkup biribiri,

³⁵ tarimeu simasabbak nenda kukrukungannia samba bo'bokungannia, lepa biribiri nenda belaakekungannia. Samba ke singa ele beruang nenda masilawan aku, iageti ukkakekungan lolokkatnia, lepa bo'bokungannia pat matei.

³⁶ Akumateiakean singa samba beruang samba tai Filistin sipuarat bulungan nenda leu et makere geti sangamberi tarimeu nenda, kalulut magegenia masipaloloi saladdu sibara Taikamanua sipuririmanua.

³⁷ Si Tuhan amasibelaake aku ka singa samba beruang, Nia leu et masibelaake aku geti ka tai Filistin nenda.” Lepa kuanangan si Saul katubunia, “Maeruan, bule si Tuhan masiropake ekeu.”

³⁸ Kaunangan si Saul leppei pasaggaknia, iate sara leppei laba katubut David samba pakeinangannia si David. Lepa kaunangan si Saul tutu tembaga ka utet David.

³⁹ Kalepakatnia si David masiappraake lanjau Saul ka leppei laba nenda lepa sibonangan muenung, tapoi ta momoi, kalulut si David ta matukkle ipakei bibilet pasaggak. Kuanangan si David, “Tamomoi kupuenung kupakei leppei nene, kalulut ta matukkle kupakeinia.” Lepa geti goloknangan sangamberi leppei pasaggak nenda.

⁴⁰ Lepa geti alanangan tutura pujagonia, samba masipili lima ngambua bukku simateimut sibara ka bagat oinan, lepa kaunangannia ka bagat suppitnia. Sambat tali pipingping matarek ka kabeinia, ei nia masiailiake si Goliat.

Si David masikalaake si Goliat

⁴¹ Tai Filistin nenda memei malelegre iailiake si David samba amuboikian sipasiabbit korabbinia.

⁴² Tapoi kateteret aiitco si David samba aipuleleknia, pugaganangan si Goliat ipasiloloi kalulut si David makope peile bau tubunia samba malainge putubuatnia.

⁴³ Kuanangan si Goliat katubut David, “Apa kaunu tutura nenda? Taleu pa aku nene nuaddeake le kele jo'jo?” Lepa teleinangan si David ka oninda sia sabulungannia.

⁴⁴ Aipei bagei iukkat le si David kuanangannia, “Kauan, konan! Kukau le geti tubum ka uma' sitububurut samba ka sangamberi tarimeu ka leleu bule rakomnia.”

⁴⁵ Tapoi aleginangannia si David, “Moi Ekeu masisaggangi aku pasamba lanjau, simuinebakkat, tapoi moi aku masisaggangi ekeu ka onin Tuhan Sipulugege, Taikamanua saladdu Israel sipaloloinu nenda.

⁴⁶ Gogoi nene leu et si Tuhan iake le ekeu katubukku, kalaakekungan ekeu samba saggrikungan lolokkatnu. Tubum samba tubutda saladdut Filistin kukau le geti ka uma' sitububurut samba katubut sangamberi tarimeu simalia bule rokomnia. Iageti agairangannia geti sangaliot polak, kai tai Israel, Taikamanua le panindogietmai,

⁴⁷ samba agairangan leu sangamberi sirimanua sene, iarauake paamianNia si Tuhan lanjau ele simuinebakkat. Kalulut kakabei Taikamnaua le pasagangan samba aiakean kam ka kabeimai.”

⁴⁸ Bela si Goliat masiailiake si David, lepa pabalaunangan simakope ola si David ka ipot saladdutda tai Filistin masiailiakenia.

⁴⁹ Si David masijunungake kabeinia ka bagat suppitnia, masiala sara bukku lepa pingpingakenangannia katubut Goliat. Bukku nenda oraknangan bukkut Goliat, pat ragat tolat utenia, samba belenia sipurarappo matania ka polak.

⁵⁰ Kisedda te si David aikalaake samba aimateiake si Goliat, aipakei pipingping samba bukku! Ikalaake tai Filistin nenda samba imateiakenia, ta anai palittei ka kabei.

⁵¹ Pabalaunangan si David iailiake si Goliat, lepa purionangan kabebenia, alanangan lanjau Goliat samba goloknangan ka umania, lepa saggrinangan lolokkat tai Filistin nenda. Kateteret araitconia tai Filistin aimatei si Goliat nenda, tuitui sia.

⁵² Tai Israel samba tai Jehuda mugerei samba kukrurangan sangamberi tai Filistin aili ka Gat samba matatbaliu gugurukat Ekron. Sangamberi simamatei tai Filistin saparappo ka sanganantat enungan ka Saaraim.

⁵³ Kapplu nenda tai Israel toili baradda masikukru tai Filistin, lepa rauraurangan sibabara ka pusapougatda.

⁵⁴ Si David masiala utet Goliat, samba tuabbitnia ka Jerusalem, tapoi sangamberi pamatei Goliat ikoiriakenia ka bagat sapounia sarania.

Tupaagai Si David katubut Saul

⁵⁵ Kateteret si Saul masiitco si David iei masilawan si Goliat, parerenangan katubut Abner ute'ra saladdunia, “Abner, togat kaseinia?” Aleginangannia si Abner, “Ta' kuagai, Tuanku.”

⁵⁶ Lepa parentaakenangan si Saul, “Kenan le samba rere'ake le pagalaiat nenda.”

⁵⁷ Oto kateteret aitoili si David ka pusapougat lepat aimateiake si Goliat, abbitnangannia si Abner patibo katubut Saul. Si David aipeile iabbit utet Goliat.

⁵⁸ Lepa parerenangan si Saul katubunia, “Ale silainge! Togat kasei ekeu?” Aleginangannia si David, “Paguguletnu nene togat Isai sibara ka Betlehem.”