1Sam. 16 - BUKO SIPUNENAN

Tuuddetnake si David ibailiu rimata

¹ Piga pa burunia atusabau kuanangan si Tuhan katubut Samuel, “Kipangan le burunia pureureugat bagam kalulut si Saul? Ta' pa Aku katsliakeannia sibailiu rimata Israel? Kineneiget, ala tulat zaitun samba kenan le ka Betlehem, katubut sara sirimanua sipuoni Isai, kalulut ai sara katalagat tatogania Akupilingannia ibailiu rimata.”

² Tapoi aleginangan si Samuel, “Kipa bulat kugagalaiake. Ke iarep bai pagalaiat nenda si Saul, bulatnia imamateiake le aku!” Aleginangannia si Tuhan, “Abbit le sangamuneng jaui sibau tubu, samba kua le ka siberikabaga nuei sedda masipanguruatake buluakenen katubut Tuhan.

³ Lepa sogainungan si Isai ka punen pasibuluat nenda. Aileu Kupaagai apa sibulatnia galaiakennu. Sirimanua sipatoilaKu katubum, buita nutulaijinia ibailiu rimata.”

⁴ Si Samuel masigalaiake kele sikuat Tuhan. Kateteret aisege ka Betlehem, amiakerangannia sikebbukat laggai ka geret tubu samba kuarangan, “Aileu pa kaooinu nene masibaraake angkat baga?”

⁵ Aleginangan si Samuel, “Oo, bulatnia. Akuoi nene iate masipanguruatnake buluakenen katubut Tuhan. Iageti puneni kam tubumui bule ioi nuoi kam ka punen pasibuluat nenda.” Si Isai samba tatognia leu et ikoiniake sia masipuneni tubutdra sene-senendra, samba sogainangan sia ka punen nenda.

⁶ Kele araparuru, si Samuel masiitco si Eliab togat Isai paatunangannia, “Bulatnia nene ipipili Tuhan.”

⁷ Tapoi kuanangan si Tuhan katubut Samuel, “Bui' te iala bagam kalulut putubuatnia simaeru sambat nantat tubunia, ta nia siobat bagaKu. Ta' kele siitcot sirimanua itcoketKu. Sirimanua masiitco putubuat, tapoi Aku masiitco patuat.”

⁸ Lepa geti si Isai masisogai si Abinadab, togania, lepa koiniakenangannia murio ka matat Samuel. Tapoi kuanangan si Samuel, “Nia leu et ta aipili si Tuhan,”

⁹ Lepa geti si Isai masikoiniake si Syama mei ka mata, tapoi kuanangan si Samuel, “Nia leu et ta aipili si Tuhan.”

¹⁰ Kisedda te si Isai masikoiniake pitu tatogania sipatutut murio ka matat Samuel, tapoi si Samuel masikua katubunia, “Ta' aipili sia si Tuhan.”

¹¹ Lepa parerenangan si Samuel katubunia, “Sarat siangan le nene tatogam?” Aleginangannia si Isai, “Ai peile sara, sisuleket, tapoi ainia masijago biribiri.” Kuanangan si Samuel, “Koiniake le rasogainia, kalulut ta mukokom sita ke ta'pei moinia.”

¹² Lepa si Isai koiniakenangan rasogai togania nenda. Oto nia sara sirimanua sibau tubu simalainge tubu samba simaron tubu, samba pumataatnia malainge. Lepa kuanangan si Tuhan katubut Samuel, “Nene te nia, tulaijinia!”

¹³ Alanangan si Samuel tulat zaitun samba tulaijinangan si David ka enungan galaiakenen masitulaiji kamatatdra sakebbunia. Kateteret nenda leu et salokinangan si David Ketsat Tuhan. Barania gogoi nenda sambat sanganantat gogoi Ketsat Tuhan masipaaleinia. Lepa geti toili si Samuel ka Rama.

Si David ka uma purimataat Saul

¹⁴ Ka sia si Saul aikaddiuakeannia Ketsat Tuhan, samba aiooreinia ketsat sikatai sikoiniakenen Tuhan.

¹⁵ Kalulut nenda sapagugulet Saul masikua katubunia, “Kuagai kai, ketsat sikatai sikoiniakenen Tuhan masiorei rimata.

¹⁶ Ke noba bai, matarek kai masigaba sara sirimanua simaagai masinauake kecapinia, bule imaangka bagam.”

¹⁷ Lepa si Saul masiparentaake sia, “Gaba kam sara sirimanua simaagai masinauake kecapi, samba abbit kamnia sene.”

¹⁸ Masiarep nenda sara sia sapaguguletnia masikua, si Isai sipulaggai ka Betlehem ai togania sara simanteu siagai masinauake musik. Magegenia samba sara sirimanua saladdu simaeru. Aipei bagei magegenia samba maagai mutitiboat, samba sarat iropakenia si Tuhan.”

¹⁹ Iageti si Saul masikoiniake pakoinien katubut Isai bule isegeake patonekat nene, “Koiniake le togam si David, sipasijago biribirim nenda ioi katubukku.”

²⁰ Iageti si Isai masitarekake sangamuneng kalidei, lepa kaunangan abbinennia sangamuneng togat kambing, roti samba suppit kulit simasut anggur. Sangamberinia nenda kaunangannia katubut David addeat tupanguruatake katubut Saul.

²¹ Kisedda te aisege si David katubut Saul samba ibailiiu paguguletnia. Makope ipununtuki baga si Saul samba bailiuakenangannia siabbit pamateinia.

²² Lepa geti si Saul masikau patonekat katubut Isai, “Obaakean le si David mukuddu simariuriu sene samba masipasikeli aku, aipoi kobania.”

²³ Barania teret nenda, senen ileuki si Saul ketsat sikatai nenda, si David masiala kecapinia samba nauakenangannia. Lepa bara angkat bagat Saul minca, kalulut ikaddiuakenia ketsat sikatai nenda.