1Sam. 15 - BUKO SIPUNENAN

Pasaggangan masisaggangi tai Amalek

¹ Ka sara gogoi kuanangan si Samuel katubut Saul, “Si Tuhan le sikoiniake aku masiuddetnake rimata ibailiu rimata sangaliot Israel paamianNia. Lulut nenda, simateunia rimata masiarepake parentat Tuhan Sipulugege.

² Nia masiukum geti tai Amalek, kalulut taikebbukatdra masisaggangi tai Israel kateteret aratuitui tai Israel rakaddiuake Misir.

³ Oto, kenan kam samba saggangi kam tai Amalek samba pakatai kam sangamberi bakkadra. Bui' nulegeiake kam apapa, mateiake kam sangamberi taimanteu, tainanalep, tatoga samba tatoga sigoiso, samba leu et jaui, biribiri, unta samba kalidei.”

⁴ Lepa si Saul masitarekngake saladdunia samba masiadde sia ka Telaim, ai rua ngotu ngaribu sia saladdu sibara ka Israel samba pulu ngaribu sia sibara ka Jehuda.

⁵ Kapplu nenda ei si Saul sambatda saladdunia ka laggai Amalek samba masingena saggak ka saisai bagat oinan simagarak.

⁶ Kaunangan leu et patonekat repdemen ka tubutda tai Keni, kuanangannia, “Kenan kam samba kaddiuake kam tai Amalek, bule bui' kumateiake kam simakere pasamba sia, aipoi siburu taikebbukatmui arapatoilaan pasusuruak ka tubutdra tai Israel kateteret tai Israel moi baratdra ka Misir.” Iageti tuitui tai Keni baratda sedda.

⁷ Lepat nenda sagganginangan si Saul tai Amalek, samba kalaakenangan sia sanganantat enungan barania ka Hawila teret ka Syur ka saigit kabelaiat sulu Misir.

⁸ Labanangan si Agag rimatatda tai Amalek samba obaakenangan ipurimanua, tapoi sangamberi siberikabaga imateiake le sia sangamberitda.

⁹ Kisedda leu et biribiri samba jaui simakope eru, togat jaui samba leu togat biribiri simakope mo'mo, samba sangamberi apapa simakope kepput saki, sarat tarimeu sita'anai katukaunannia samba bibilet sitai makeppu saki le tukataiake.

Si Saul ta'an isilonia si Tuhan sibailiu rimata

¹⁰ Lepa kuanangan si Tuhan katubut Samuel,

¹¹ “Aioleian bagakKu atuuddetake si Saul ibailiu rimata, kalulut aikaddiuakean Aku, samba ta'aigalaiake parentaKu.” Reureu le bagat Samuel, samba sanganantat soibo ipusoga katubut Tuhan.

¹² Ka gogoi mansep imapato, simansep tuitui si Samuel iailiake si Saul. Tupaagai ka tubunia aipoi ameian si Saul ka laggai Karmel addeat masirioake bukku toggaiat tubunia sedda, lepa riuriuakenangan iei ka Gilgal.

¹³ Kateteret si Samuel paaili pasamba si Saul, kuanangan si Saul katubunia, “Bule si Tuhan masipanukani ekeu! Akugalaiakean parentat Tuhan.”

¹⁴ Tapoi parerenangan si Samuel, “Ke kisedda, angoi kuarep ipunau jaui samba ibiribiri?”

¹⁵ Aleginangannia si Saul, “Sangamberi tarimeu nenda siraurau sibara ka tai Amalek. Biribiri samba jaui simakope eru nenda araalaan siberikabaga addeat panguruat buluakenen katubut Tuhan Taikamanuam. Tapoi legeinia geti akupamateian kai sangamberinia.”

¹⁶ Masiarep nenda kuanangan si Samuel, “Ngena boiki, kupaagai boiki apa sikuat Taikamanua katubukku soibo silelepa.” “Kuangan le,” ngangan Saul.

¹⁷ Kuanangan si Samuel, “Ta' pa ekeu aibailiu siuteake ka sangamberi muntogat Israel, kenanen poi ekeu masiaddeake tubum sita'anai katukaunan? Aipilingan ekeu si Tuhan ibailiu rimata ka Israel.

¹⁸ Aikoiniake leu ekeu si Tuhan masimateiake tai Amalek sikatai nenda. Ikoiniake ekeu pasaggak masisaggangi sia teret sappru sia sangamberitda.

¹⁹ Angoi ta anureddet parentat Tuhan? Angoi mukere kam baga masiraurau bibiletda, samba masigalaiake sikatai ka matat Tuhan?”

²⁰ Aleginangannia si Saul, “Akureddetnan parentat Tuhan, samba mei pasaggak siripot pakoinianNia katubukku, si Agag rimata Amalek akulabaannia samba sangamberi tai Amalek akumateiakean sia.

²¹ Tapoi saladdukku ta aramateiake sangamberi tarimeu, arapili biribiri samba jaui simakope eru ka sangamberi siraurau nenda addeat panguruat buluakenen katubut Tuhan Taikamanuam ka Gilgal.”

²² Tapoi kuanangan si Samuel, “Kaipa bulat makope ioba si Tuhan, purereddet ele panguruat buluakenen? Maeru peile mureddet katubut Tuhan bele peile masipanguruatake buluakenen. Maeru peile mureddet bele peile tabet biribiri simanteu.

²³ Aipoi masisaggangi si Tuhan makere katainia kele masigalaiake tawa, samba buak patuat makere katainia kele masibuluiji sabulungan. Kalulut ta anureddet parentat Tuhan, bailiu si Tuhan leu taan isisilo ekeu sibailiu rimata.”

²⁴ Masiarep nenda, kuanangan si Saul katubut Samuel, “Kirenangan amajongan aku. Akupasabauan parentat Tuhan samba ta akupeletsei sikuam. Maloto aku ka siberikabaga, kalulut nenda arepikungan panindogatda.

²⁵ Oto kineneiget, kutiddou ka tubum, appeake le jokku samba toili le sita simakere ka Gilgal, bule ioi kupanindou katubut Tuhan.”

²⁶ Tapoi aleginangan si Samuel, “Ta' koba tatoili simakere, ta anureddet parentat Tuhan, samba kineneiget taan aisilo ekeu si Tuhan sibailiu rimata Israel.”

²⁷ Lepa teiteinangannia si Samuel bule ituitui, tapoi si Saul masikerania miongnangan leppeinia nenda pat birit.

²⁸ Lepa kuanangan si Samuel katubunia, “Ka gogoi nene aibiritakean si Tuhan purimataat Israel sibara ka tubum samba ikaunia ka sirimanua sabagei simaeru bele peile ekeu.

²⁹ Sipunenan Taikamanuan Israel ta maboko samba leu et ta iolei bagaNia, kalulut Nia ta sirimanua.

³⁰ Aleginangannia si Saul, “Amajongan aku. Tapoi ropake toili le sita simakere bule ioi kupanindou katubut Tuhan Taikamanuam, kalulut kele kisedda te, nusuru aku ka matadra saute bangsaku samba ka sangamberitda tai Israel.”

³¹ Iageti toili si Samuel pasamba si Saul ka Gilgal, samba si Saul manindou katubut Tuhan.

³² Iageti kuanangan si Samuel, “Abbit kam rimata Agag sene,” Oi si Agag katubunia, amatoneman bagania kalulut ipaatu, kalotoakenen kamamatei atusabauan.”

³³ Lepa kuanangan si Samuel, “Kele palitteinu sikau simigi saina tata' tatogatdra, kisedda leu te geti inam itata' togania.” Lepa gotgotnangan si Agag si Samuel ka matat kudduat pasibuluat ka Gilgal.

³⁴ Lepa nenda ei si Samuel ka Rama, samba rimata Saul toilinia ka lalepnia ka Gibea.

³⁵ Aili teteret kalepakat purimanuaiatnia ta'an apaaili si Samuel minca pasamba si Saul. Tapoi si Samuel mureureu baga kalulut si Saul, kalulut aiolei bagat Tuhan aiuddetnake si Saul ibailiu rimata Israel.