1Sam. 14 - BUKO SIPUNENAN

Si Jonatan sibailiu simagege

¹ Ka sara tetere kuanangan si Jonatan katubut silainge sipasiabbit pamateinia, “Kauan mei sita ka sila ka kudduatda saladdu sipasijajago tai Filistin!” Tapoi ta aipaagai ka ukkuinia.

² Kateteret nenda si Saul ainia ka tei loinat delima ka Migron, ta mareunannia ka Gibea. Siberikabaga sipasitututnia enem ngotu sia igitda.

³ Imam sipasipapakei efod iate si Ahya togat Ahitub, iate sarainan Ikabod samba Pinehas, samba Pinehas togat Eli, imam Tuhan ka Silo. Tapoi ta raagai pututuituinia si Jonatan.

⁴ Masiailiake kudduatda saladdu sipasijajago tai Filistin nenda, buita ienungi si Jonatan sara polou leleu ailalaptip rua bukku bulak sipuririkdingan, oninda pasasaradra Bozes samba Sene.

⁵ Bukku bulak saigit ka bare masimatai ka Mikhmas, samba saigit ka kaiaman masimatai ka Geba.

⁶ Iageti kuanangan si Jonatan katubut silainge nenda, “Konan mei sita ka kudduatda saladdu sipasijago Filistin sitaipususunat nenda. Bule ioba si Tuhan masiropake sita. Aipoi si Tuhan momoi iake kamanangan, simigi samba goiso sirimanua.”

⁷ Aleiginangan silainge nenda, “Apa le sipinatum galaiakean, kaku geti masitut le.”

⁸ Kuanangannia si Jonatan, “Maeruan leu, kateteret taputalipo, patoilatangan tubutta katubutdra tai Filistin nenda.

⁹ Ke rakua tapuari samba masingena teret raoi ka tubutta, iageti sita riuriu takuddu geti sedda leu et samba ta leu et mutatalipo.

¹⁰ Tapoi ke rasogai sita mei ka tubutdra, eitangan sedda, kalulut nenda toggaiatnia sia aisegeakean si Tuhan ka tubutta.”

¹¹ Kateteret sia ruadra masitoilaake tubu ka tai Filistin ka pos pujagoat nenda, kuarangan te tai Filistin nenda, “Itco kam tai Ibrani sibebela sibara ka lobok kudduatdra mulipput!”

¹² Lepa geti pusogarangan katubut Jonatan samba paguguletnia, “Sakaiake le sene bule katubut masitoilaake apapa ka tubum!” Lepa kuanangan te si Jonatan katubut silainge nenda, “Tut le aku kalulut si Tuhan aisegeakean sia ka tubutdra tai Israel.”

¹³ Iageti sakai si Jonatan sipugugurui ka pata, aitututnia siabbit pamateinia. Kele aisege sedda si Jonatan, mateiakenangan sia, oto ka sia silainge nenda ainia kateitei Jonatan aimamateiake tai Filistin leu et.

¹⁴ Kapasaggangan siboiki nenda, si Jonatan samba silainge nenda masimateiake iaili rua pulu sia ka kupkumen laggai lionia samba nantania sitenga pa'pa.

¹⁵ Tugegerangan tai Filistin ka pusapougatda kalulut sipuaaili nenda. Sangamberi tai Filistin pasamba sangamberi saladdu sipujajago samba leu sangamberi mungkuat sipasiraurau ibailiu muloto, samba polak leu et mugeret, samba bara pugaugaupat bulat simakope.

Katukalaatda tai Filistin

¹⁶ Kateteret nenda saladdut Saul sipujajago ka Gibea ka kupkumen lagggai Benjamin, masiitco tai Filistin sipaole tubunia pabalau kalulut ingo.

¹⁷ Iageti kuanangan si Saul ka saladdunia, “Adde kam sia saladdu samba pulelek kam kasei ta'anai.” Galaiakerangan parenta nenda, lepa agairangannia, si Jonatan samba silainge siabbit pamateinia ta'anai sia.

¹⁸ Kuanangan si Saul katubut imam Ahia, “Abbit kam efod nenda sene.” Kateteret nenda Ahia masiabbit efod nenda kamatatda tai Israel.

¹⁹ Kateteret aipeile si Saul patitibo pasamba imam nenda, pugaugaupat ka sapoura tai Filistin itutuppai le, bailiu kuanangan si Saul katubut imam nenda, “Ta'an anai oggakta masitiddou enungan katubut Tuhan!”

²⁰ Lepa si Saul samba sangamberi sirimanua sikere raei ka kudduat pasaggangan. Sedda raitco ai pulamagat ka talagatdra tai Filistin, pasasambadrangan le pasasaggak samba pamatei.

²¹ Tai Ibrani sikukuddu ka kupkumen laggaira tai Filistin, samba sipasitutut pasamba si Saul samba si Jonatan.

²² Ialeu et tai Israel sipulilipput ka sangamberi leleu Efraim, sipasiarep aipoi tai Filistin amutuituian sia leu et patadde samba masisaggangi tai Filistin nenda.

²³ Pasaggakrangan sanganantat enungan teret saliu Bet-Awen. Si Tuhan masiarauake tai Israel ka gogoi nenda.

Sipuaaili lepat pasaggangan

²⁴ Ka gogoi nenda tai Israel aisia ka bagat saggo kalulut laje, aipoi si Saul, musuppania kise, “Tutelei le sirimanua sipasikokom apapa ka gogoi nene kepei kuala lumun ka saggakku.” Kalulut nenda beri sia sara sipukokom sangagogoi nenda.

²⁵ Lepa geti sangamberitda sege ka sara leleu samba seserangan simakope igi suat mani,

²⁶ tapoi ta'anai sia sara sikom suat mani nenda, kalulut maloto sia iorak sia pateleiat sikuat Saul.

²⁷ Tapoi si Jonatan ta iagai, kokoiniakena siberikabaga ukkuinia bule rapusuppa. Kalulut nenda totoiakenangan tuturania siabbitnia, samba punuakenangannia kabagat kudduat suat mani, lepa alanangannia suat mani nenda samba komnangannia. Ruei le aimaarau tubunia samba aituppai ronnia.

²⁸ Lepa geti sara sia sibara ka tai saladdu nenda masikua ka tubunia, “Sangamberimai ta'anai ron kalulut laje. Tapoi Tuan amasiloto kai pasamba suppa, kuanangannia, “Tutelei le sirimanua sipasikokom apapa ka gogoi nene.”

²⁹ Aleginangan si Jonatan, “Bulat makopean le sigalaiakenen ukkuiku nenda ka bangsatta! Itco putubuatku kineneiget amaeruan lepat akukom goiso suat mani.

³⁰ Ke ka gogoi nene sarakyat tuobaake mukom komen sirauraunia kateteret masikalaake saggak, bulat makope igi peile tai Filistin sioi tumateiake!”

³¹ Ka gogoi nenda tai Israel masikalaake tai Filistin lepat pasaggangan sanganantat enungan sibara ka Mikhmas teret ka Ayalon. Tapoi lepat nenda masaggonangantubutda,

³² bailiunangan rapaalau bibilet siraurauraura ka saggak, raala biribiri samba jaui lepa ja'jarangan ka kudduat nenda leu et, samba riuriu masikom akkula aipeile logaunia.

³³ Lepa paagairangannia katubut Saul, “Itco pei, amajongan siberikabaga katubut Tuhan kalulut arakom akkula samba logaunia.” Pugereinangan si Saul, “Bulat sikatai le kam ka matat Tuhan! Guiluake kam sara bukku sabeu sene.”

³⁴ Iageti kuanangan minca ka sangamberi sirimanua sipasiabbit katuareman nenda, “Pasaragai kam tubumui ka talagat siberikabaga samba koiniake kam sia masiabbit jaui samba biribiritda sene, bule tuja'ja ka uddut bukku nene samba tukom sene, kele kisedda ta rakokom akkula pasamba logaunia samba ta'an majojo minca katubut Tuhan.” Soibot nenda leu et sangamberi sarakyat masiabbit tarimeu sirauraura samba masija'jania sedda.

³⁵ Lepa si Saul masirioake kudduat pasibuluat addeat Tuhan, nenda kudduat pasibuluat siboiki sirioakenennia.

³⁶ Lepa geti kuanangan si Saul ka tubutda sipasitututnia, “Konan kam tasaggangi tai Filistin ka soibo nene lepa masiraurau sia aili simancep samba masimateiake sia sangamberitdra.” Alegitdrangannia, “Maeruan, galaiakean apa sibailiu simaeru sipinatum.” Tapoi kuanangan imam, “Konan le boiki tatiddou galaiakenen sibara ka Taikamanua.”

³⁷ Lepa parerenangan te si Saul ka Taikamanua, “Momoi leu kusaggangi tai Filistin? Nusesegeake leu pa sia geti kakabeira tai Israel?” Tapoi ka gogoi nenda Taikamanua ta aialeginia.

³⁸ Lulut nenda kuanangan si Saul ka sikebbukat laggai, “Konan kam sene sangamberimui samba pulelek kam jo apa sigalaiakenen gogoi nene.

³⁹ Ka onin Tuhan sipuririmmanua, siake kamanangan ka tubutda tai Israel, sirimanua sigalai sele tuukumake simateiakenen, kenanen si Jonatan togakku.” Tapoi ta'anai sia sara simagege masialegi.

⁴⁰ Lepa kuanangan si Saul ka sangamberi tai Israel, “Sangamberimui murio ka saigit sene.” Alegirangannia, “Kau le nugalaiake simaeru siripot sipinatum.”

⁴¹ Lepa panindounangan si Saul, “Tuhan, Taikamanuan Israel, angoi gogoi nene Ekeu ta masialegi aku? Tuhan, alegi le aku, ka sangamberi bukku sipunenan nene. Ke puseleat nenda ai katubukku ele katubut Jonatan, alegi le pasamba bukku Urim, tapoi ke puseleat nenda ai ka paamianNu Israel, alegi le pasamba bukku Tumim.” Iageti si Tuhan masialegi masisau'sau katubut Jonatan samba si Saul, kele kisedda te tupakoinong taimaseletda siberikabaga.

⁴² Lepa kuanangan si Saul, “Oi Tuhan teuake le kasei simasele, aku ele si Jonatan.” Iageti si Jonatan le tupatoila simasele.

⁴³ Lepa kuanangan si Saul katubut Jonatan, “Apa sigalaiakenennu?” Aleginangannia si Jonatan, “Akukom goiso suat mani ka buttet tuturaku, matarek aku matei.”

⁴⁴ Kuanangan si Saul katubunia, “Bule Taikamanua masiukum aku ke tatuukum si Jonatan ukum simateiakenen.”

⁴⁵ Tapoi kuarangan sarakyat katubut Saul, “Bulat tuukum pa si Jonatan ukum matei? Nia le te siabbit kamanangan sabeu nene ka Israel! Ta' Pakere bagamai ka onin Tuhan sipuririmanua, aipoi si Jonatan ta momoi imapepe sangantaili alainia sibara ka utenia. Kalulut pasamba paroman Tuhan le, aisese kamanangan ka gogoi nene.” Kisedda te araaranake si Jonatan ka ukum matei.

⁴⁶ Lepat nenda tai Filistin toili sia ka kupkumen laggaira kalulut ta'an aikukru sia si Saul.

Puparentaat samba sikauman Saul

⁴⁷ Kele aibailiu rimata Israel si Saul, kaipa le nia pasaggak masisaggangi sangamberi saggakdra tai Israel, iate tai Moab, tai Amon samba tai Edom, sarimatat tobbou laggai Zoba, samba tai Filistin. Kaipa le ipasaggak, sarat mamanang le nia.

⁴⁸ Ipasaggak ka gege samba masikalaake tai Amalek, samba leu masiujaake tai Israel sibara ka kabeira sangamberi sirimanua siraurau sia.

⁴⁹ Tatogat Saul iate si Jonatan, Jiswi samba si Malkisua. Togania sinanalep sikebbukat sipuoni si Merab, samba sikarua oninia si Mikhal.

⁵⁰ Sinanalepnia sipuoni Ahinoam, togat Ahmaas, utera saladdunia iate si Abner togat Ner, iate kamaman Saul.

⁵¹ Kish ukkui Saul, samba Ner ukkui Abner, iate tatogat Abiel.

⁵² Burut purimanuaiatnia si Saul sarat pasaggangan simaoloi masisaggangi tai Filistin. Lulut nenda, ke si Saul masiitco sirimanua simaron ele simagege, ruruakenangan sia masibailiuake sia saladdunia.