1Sam. 13 - BUKO SIPUNENAN

Pasaggangan masisaggangi tai Filistin

¹ Si Saul aiat piga ngarura pa nia, kateteret aibailunia rimata, samba rua ngarura burunia aipuparenta ka Israel.

² Ka sara gogoi pilinangan saladdunia telu ribu sia tai Israel, samba rua ribu sia mukuddu pasambania ka Mikhmas ka kupkumen laggai leleu Betel. Oto sisangaribu sia nenda masitut si Jonatan ka Gibea ka laggai Benjamin. Tapoi siberikabaga sipulelegei nenda koiniakenangan sia ratoili ka lalepda senenda.

³ Lepa geti mateiakenangan si Jonatan siuteake saladdutda tai Filistin sikuddu ka Geba, samba tai Filistin masiarep pagalaiat nenda. Lepa koiniakenangan sia si Saul ranauake pipiau ka sangaliot tobbou laggai masisogai tai Ibrani bule rabela pasaggak.

⁴ Kisedda te araarepnia tai Israel, aikalaake si Saul saladdutda tai Filistin. Oto kalulut nenda malaganangan bagatda tai Filistin katubutda tai Israel. Iageti koiniakerangan tai Israel bule ratut si Saul ka Gilgal.

⁵ Kateteret nenda leu et tai Filistin nenda aparuruan sia bule rasaggangi tai Israel, ai telu pulu ribu kereta pasaggakda, enem ngaribu sia sipukukuro, samba saladdu kele igit ngai ka bebet koat. Pusapourangan ka Mikhmas ka saigit kabelaiat sulu Bet-Awen.

⁶ Lepa geti riuriuakerangan pasaggangan rasaggangi tai Israel, bailiu taoinangan tubutda tai Israel. Oto putuituirangan tai Israel raei mulipput ka ngaliu samba ka lobok leleu ele ka paoggangan bulak, ele kabagat uggungan ka polak,

⁷ ai leu et sitalipoki bagat oinan Jordan siei ka laggai Gad samba Gilead. Ai peile si Saul ka Gilgal, samba sarakyat sipasitututnia geret le tubutdra loto.

⁸ Si Saul masingena si samuel pitu ngagogoi burunia, siripokat patonekat Samuel ka tubunia, tapoi si Samuel ta'pei leu et sege ka Gilgal, oto ka sia si Saul arataddangan rakaddiuakenia sarakyat.

⁹ Lulut nenda kuanangan ka tubutdra, “Abbit kam sene buluakenen rarangen paabanan nenda.”

¹⁰ Tapoi simaruei le ailepa igalaiakenia, bara si Samuel. Si Saul masipaseseakenia bule iroroinia,

¹¹ tapoi parerenangan si Samuel, “Apa sigalaiakenen Rimata?” Aleginangan si Saul, “Akuitco aipoi sarakyat arakaddiuakean aku, oto ukkui ta abara kateteret siteuakenen ukkui, aipei bagei, tai Filistin aparuruan ka Mikhmas.

¹² Lepa akupaatu, ta'an mauuju minca tai Filistin masisaggangi geti aku ka Gilgal, oto aku ta'pei masitiddou pununtuat bagat Tuhan. Lulut nenda teakekungan addeat masipanguruatnake buluakenen nenda.”

¹³ Masiarep nenda kuanangan si Samuel katubut Saul, “Sigalaiakenen rimata nenda bulat taiagai patuat. Ke nureddet bai parentat Tuhan Taikamanua, bulatnia riuriuakenangan iparon ekeu samba muntogatnu si Tuhan sibailiu rimata ka Israel teret buruburu.

¹⁴ Tapoi kineiget taan matotom puririmatam. Kalulut ta anureddet parentat Tuhan, oto aipilingan sabagei si Tuhan siripot siobaNia ibailiunia rimata ka paamianNia.”

¹⁵ Iageti kaddiuakenangan Gilgal si Samuel samba riuriuakenangan pusilaiatnia iei ka Gibea ka laggai Benjamin. Kateteret nenda leu et si Saul aipasisikeli saladdunia, igitda enem ngotu sia.

¹⁶ Kisedda te si Saul samba si Jonatan togania, samba saanak buadra musapou ka Geba kupkumen laggai Benjamin, oto ka tai Filistin musapou ka Mikhmas.

¹⁷ Ka teteret nenda leu et telu ngarombongan perampok Filistin bela sibara ka pusapougatdra tai Filistin masiraurau, rombongan sara mei ka ipot Ofra ka kupkumen laggai Syual,

¹⁸ rombongan sikarua masiailiake Bet-Horon, samba rombongan sara minca masiailiake pasongan simatai ka su'sut Zeboim samba ka simatangeu.

¹⁹ Ka sangaliot Israel ta anai siagai masipaddai laba', kalulut tai Filistin ta raoobaake tai Ibrani masigalai palittei samba sosoat.

²⁰ Oto tai Israel buita' mei katubutda tai Filistin ke masiajat sot papakrutdra, baliokra kampakra samba sasabi'ra,

²¹ upania iate sangaba'ba bulagat sigoiso addeat masiajat kampak samba masipaeru pugalai masiabbit jaui, samba rua ngaba'ba bulagat sigoiso addeat masiajat sot bajak ele papakkru.

²² Nenda lulunia, ka gogoi pasaggangan ka Mikhmas nenda berisara sia leu et sibara ka sarakyat Israel sibara palittei ele sosoat, sarat si Saul samba si Jonatan togania.

²³ Tai Filistin masigalai sara pos pujagoat addeat masijago sara polou leleu ka Mikhmas.