1Sam. 12 - BUKO SIPUNENAN

Patonekat pasaraat Samuel

¹ Lepa kuanangan si Samuel ka tubutdra sangamberi bangsa Israel, “Akusutnakean sangamberi tiddogetmui samba masiuddetnake sara rimata ka sangamberimui.

² Barania kineneiget niangan le sipasiuteake kam geti. Itco kam, aku nene amabajaan samba maubat. Bulat amakopean buru akuuteake kam – baranangan ka sibau tubukku aili kineneiget. Toggaiatnia iate tatogakku sabeu nenda.

³ Kineneiget te, kupurio ka matamui! Ke kugalai puseleat, susui kam aku ka matat Tuhan samba ka matat rimata sipiliNia. Ai pa akuala jaui ele kalideira sabagei? Ai pa akupajo ele masipaorei ele masisilo bulagat sitaimaroipo? Kua kam, bule aponia sialaku momoi kutoiliake.”

⁴ Sangamberi sirimanua nenda masialegi, “Ta' ukkui, ta anupajo ele nupaoreiji kai, samba ta anuala apapa bakkatda kasei pa.”

⁵ Lepa kuanangan si Samuel, “Ka gogoi nene si Tuhan samba rimata sipiliNia ibailiu sipasimuneng, bulatnia ta masele aku beri goiso.” Alegirangannia, “Oo bulatnia si Tuhan le ibailiu sipasimuneng ka sita.”

⁶ Lepa kuanangan minca si Samuel, “Si Tuhan le amasipili si Mose samba si Aron, samba masiabbit taikebbukatmui bela sibara ka Misir.

⁷ Kineneiget bui' nutuitui kam boiki. Kususui matamui geti ka matat Tuhan. Repdem kam sangamberi anggai bagat Tuhan sipatoilaNia katubumui samba katubutda taikebbukatmui.

⁸ Kateteret si Jakob samba sangalalepnia moi ka Misir, samba tai Misir masipaorei sia, taikebbukatmui masitiddou paroman katubut Tuhan, lepa si Tuhan masigugluake si Mose samba si Aron. Ka ruadda nenda, masiabbit taikebbukatmui bela sibara ka Misir samba masiropmake sia mukuddu ka laggai nene.

⁹ Tapoi arakalipogi le si Tuhan, Taikamanuanda, kalulut nenda Nia masiobaake isaggangi samba ikalaake sia si Sisera, utera saladdu ka Hazor, samba tai Filistin samba leu rimatatdra tai Moab.

¹⁰ Lepa geti panindounangan katubut Tuhan samba masiseseake jotdra, kuarangan, ‘Amajongan katubut kalulut katubut masikaddiuake Ekeu, oi Tuhan, samba masibuluiji sangamberi tularat sabulungan samba Asytoret. Tapoi, kineneiget, arauake kai ka tai saggakmai, iageti kai masipaguguletnake tubu ka tubum!’

¹¹ Lepa geti si Tuhan masikoiniake si Gideon, si Barak, si Jefta, samba leu aku. Senemai masibelaake kam ka saggakmui, bailiu oinangan nupurimanua kam ka angkat baga.

¹² Tapoi kateteret anuitco kam si Nahas rimatatda tai Amon, aioi isaggangi kam, keraakemuian si Tuhan sibailiu rimatamui samba kuamuian katubukku, ‘Ta', buita' sara rimata le masiparenta kai, siripokatnia Tuhan, Taikamanua Nia te rimatamui.’ ”

¹³ “Kineneiget, itco, koi te nia, rimata sipilimui nenda. Kam amasitiddounia, samba si Tuhan amasiakenia ka tubumui.

¹⁴ Mauktuk te kam ke nusuru kam si Tuhan, samba ke nupaguguletnake kam tubumui katubuNia, samba nureddet kam tiboietNia, samba sarapei ke kam samba rimatamui nenda mariuriu topit katubut Tuhan Taikamanuamui.

¹⁵ Bailoknia, ke kam ta masiarepmake si Tuhan, tapoi masisaggangi parentaNia, bulatnia kam samba rimatamui isaggangi geti si Tuhan.

¹⁶ Kineneiget, arepmake minca! Lelekngake kam kiseiet sabeu galaiakenen Tuhan ka matamui.

¹⁷ Musoga aku geti katubut Tuhan samba kenanen poi kineneiget malegeu, si Tuhan masiake geti leleggu samba urat sibailiu alegiat sangamberi panindogatku. Ka teteret nenda, seseakemuian geti bulat abeu jomui katubut Tuhan kalulut masitiddou sara rimata.”

¹⁸ Lepa panindounangan te si Samuel, samba ka gogoi nenda leu et si Tuhan masiake leleggu samba urat. Sangamberi banga nenda bailiu maloto katubut Tuhan samba katubut Samuel.

¹⁹ Lepa kuarangan katubut Samuel, “Panindou le addeat sangamberi paguguletnu nene katubut Tuhan, Taikamanuam, bule ta matei kai. Kineneiget akuseseakea kai jomai siburu, tapoi kalulut pasititiddoumai rimata tuppainangan jomai.”

²⁰ Kuanangan leu si Samuel ka tai Israel nenda, bui' numaloto kam, kenanen anugalaiakean kam jo nenda, tapoi riuriuake le kam masitut si Tuhan nupagugulenake kam tubumui katubuNia ka muinet patuatmui.

²¹ Bui' nututnake kam sabulungan sitaiooi masiropmake samba masiarauake kam, kalulut sia nene sitapaluluat le.

²² Amusuppangan si Tuhan, ta ikakaddiuake kam kalulut aiteuakean ibailiuake kam paamianNia.

²³ Pagalaiat tubukku, bule ta majojo aku katubut Tuhan kalulut ta akupatiddouake kam. Tapoi aile kugelaiake kam pagalaiat katubulanan.

²⁴ Suru' kam si Tuhan samba paguguletake kam tubumui ka tubuNia simariuriu samba ka muinet paatuat. Repdem kam sangamberi sigalaiakenen sabeu sigalaiakenenNia kakam.

²⁵ Tapoi ke mariuriu nugalaiake kam jo, masubumuian samba leu rimatamui.”