1Sam. 10 - BUKO SIPUNENAN

¹ Iageti si Samuel masiala buli-buli sibara ka bagania tulat zaitun, lepa uruakenangan tula nenda ka utet Saul, samba aisisigguk si Saul kuanangan, “Si Tuhan le amasiuddetnake ekeu ibailiu rimata ka sangaliot Israel paamianNia. Ekeu te geti masiparenta paamianNia samba masikunemi sia ka sangamberi saggakda. Nene te toggaiatnu, aipilingan ekeu si Tuhan ibailiu rimata ka sangamberi paamianNia.

² Ke nukaddiuake aku ka gogoi nene, nuaaili te rua sia taimanteu ka bebet ratei Rahel ka Zelzah ka kupkumen laggai Benjamin. Rakukua te ka tubum kisene, “Sangamberi kalidei gabaetnu nenda atusesengan. Kineneiget ukkuinu ta'an makarat bagania ka sangamberi tarimeu nenda, tapoi sarat parere le nia kipa igagalai bule isese ekeu.”

³ Kuanangan minca si Samuel, “Baram sedda riuriuakenungan puenunganannu teret ka loina kudduat pasibuluat ka Tabor. Oto sedda ailinungan geti telu sia taimanteu siei ka Betel sipasingunguruatnake buluakenen ka Taikamanua. Sara sia sipasigigirit telu ngamuneng togat kambing, sara minca masiabbit telu ngambua roti, samba sara masiabit suppit kulit sibara ka baga anggur.

⁴ Raake te paroroiat katubum samba raake te rua ngambua roti, oto buita' nusilo.

⁵ Kapplu nenda buita' mei ekeu ka leleu Taikamanua ka Gibea, kudduat pusapougatda tai Fiistin. Ka matatbaliu gugurukat laggai, pasasabau te kam sangamungkuat nabi situgogorosot sibara ka leleu pasibuluat. Putururangan samba pugereirangan, masinauake gambus, rebana suling samba kecapi.

⁶ Kateteret nenda leu et kupkupnangan ekeu geti Ketsat Tuhan samba tutnakenungan geti turu samba pugegereira nenda, lepa tuake kekeu galai tubu sibau ibailiu sirimanua bagei.

⁷ Ke sangamberinia nenda muaili, galaiake le apa le sibabagai bagam simaeru, kalulut Taikamanua masipaalei ekeu.

⁸ Lepat nenda buita' mei ekeu ka Gilgal samba masingena sedda pitu ngagogoi. Aileu kuoi masipanguruatnake buluakenen rarangen samba buluakenen paabanan, samba leu masipaagai ka tubum apa sibulat galaiakenen.”

⁹ Simaruei le si Saul aikaddiuake si Samuel, silonangan galai tubu sibau sibara ka Taikamanua. Samba sangamberi sipaagaiakenen Samuel katubunia puailinangan leu et ka gogoi nenda.

¹⁰ Kateteret si Saul samba paguguletnia arasege ka Gibea, paailirangan pasamba sangamungkuat nabi. Tetere nenda leu et kupkupnangan si Saul Ketsat Taikamanua, samba tutnakenangan leu turu samba gereira tai nabi nenda.

¹¹ Sangamberi sirimanua siagai puparaboanannia siburu, makiseinangan kabagatda araitconia, lepa parererangan ka pasasambatda, “Aponia sibabara katubut togat Kish nenda? Taleu pa nabi le si Saul?”

¹² Lepa aleginangannia sara sirimanua sikuddu sedda,: “Kasei ukkuira?” Nenda te lulunia aibailiu pasikat: Taleu pa nabi le si Saul?

¹³ Kele ailepa aiputuru si Saul samba mugerei, einia ka kudduat pasibuluat ka uddut leleu.

¹⁴ Kuangangan kamman Saul ka paguguletnia, “Kaipa anubara?” Aleginangannia si Saul, “Masigaba kalidei simapepepe nenda, tapoi kalulut ta akusese kai, ei kai masiailiake si Samuel.”

¹⁵ Iageti kuanangan minca kamman Saul, “Aponia aikua katubum?”

¹⁶ Aleginangannia si Saul, “Aikua kamatamai, atusesengan sangamberi tarimeu nenda.” Tapoi si Saul ta aipoiliat katubut kammannia, tutulaijinania si Samuel sibailiu rimata.

Si Saul tupili ibailiu rimata

¹⁷ Iageti si Samuel masisogai tai Israel bule raparuru ka Mizpa,

¹⁸ samba kuanangan katubutda, “Nene te sikuat Tuhan, Taikamanuan Israel, Akuambitnan kam bela ka Misir samba masibelaake kam ka kupkumenda tai Misir samba ka sirimanua sabagei sipasioreji kam.

¹⁹ Akubelaakean kam ka sangamberi pangoringan samba paoreat, tapoi kineneiget anukeraake kam Aku, Taikamanuamui, kalulut anutiddou kam bule Kuuddetnake sara sirimanua sibailiu rimatamui. Oto, paruru kam ka matakKu, Tuhanmui, siripot suku samba muntogatmui!”

²⁰ Lepa geti si Samuel masikoiniake sangamberi suku raei kamata, samba muntogat Benjamin aiorak tupili.

²¹ Lepa nenda si Samuel maskoiniake suku Benjamin raei kamata siripot muntogatda, oto muntogat Matri aiorak tupili. Kalepakatnia ei sia kamata taimanteu kabagat muntogat Matri, samba si Saul togat Kish aiorak tupili. Lepa gabarangan si Saul, tapoi taanainia.

²² Lulut nenda sangamberi sirimanua perere katubut Tuhan, “Oi Tuhan, amoian leu pa sene sirimanua nenda?” Alegnangannia si Tuhan, “Si Saul ainia mulilipput ka kudduat pangoirikat bibilet.”

²³ Lepa ei sia simaola masiala si Saul sedda, samba abbitdrangannia ka talagatdra sarakyat. Iageti purionangan te si Saul ka oggakdra samba nia le simakope nanta, sirimanua sabagei sarat teret ta'tania.

²⁴ Lepa geti kuanangan si Samuel ka siberikabaga, “Sirimanua nene te sipilit Tuhan ta anai siailinia ka talagatta sangamberitta.” Sangamberi sirimanua nenda masisogaake, “Murimanua le te rimata!”

²⁵ Lepa geti kolouakenangan si Samuel ka tai Israel pagalaiat rubeiatda samba galaiakenen rimata, lepa nenda suratnakenangannia kabagat buko samba koiriakenangannia ka kudduat sipunenan. Lepat nenda koiniakenangan si Samuel sangamberi bangsa nenda toili sene-senendra ka lalepra.

²⁶ Si Saul leu et toili ka lalepnia ka Gibea, airapaaleinia piga pa sia sirimanua simagege, sia nenda aitubbuian paatuatda si Tuhan.

²⁷ Tapoi piga pa sia sirimanua sikatai masikua, “Kipangan iooi sirimanua nene ibara katukaunannia geti ka sita?” Raputata' si Saul samba ta arakau panguruat ka tubunia. Tapoi aigalai le kele ta iagai.