1Sam. 1 - BUKO SIPUNENAN

Si Elkana samba sangalalepnia ka Silo

¹ Ai sara simanteu, oninia si Elkana, sibara ka muntogat Efraim. Ipulalaggai ka laggai ka Rama, ka kupkumen laggai simaleleu ka Efraim. Si Elkana iate togat Jeroham, si Jeroham togat Elihu, si Elihu togat Tohu, si Tohu togat Zuf.

² Si Elkana ai rua sinanalepnia si Hana samba si Penina. Si Penina ai togania, tapoi si Hana ta anai togania.

³ Senen rura si Elkana mei ka Rama manindou ka Silo samba masipanguruatnake buluakenen katubut Tuhan Sipulugege. Sibailiu imam Tuhan ka Silo iate si Hofni samba si Pinehas, tatogat Eli.

⁴ Senen ipanguruatnake buluakenen si Elkana katubut Tuhan, kaunangan katubut Penina samba sangamberi tatogania sene-senenda rubeiatda sibara ka buluakenen nenda.

⁵ Tapoi katubut Hana sangarubeiat le ikakau kalulut aipetpetnakean suruketnia si Tuhan. Tapoi kenanen kisedda bulat manuntu bagania si Elkana katubut Hana.

⁶ Si Hana sarat ipaloloi samba ibesiki le paatuatnia si Penina, kalulut ta aikau si Tuhan toga katubunia.

⁷ Ipuaili pagalaiat nenda ka senen rura, ke mei sia ka Uman Tuhan, sarat ibesiki le patuat Hana si Penina. Bulat mareirei ipusou si Hana samba ta ioba mukom kalulut ipaloloinia.

⁸ Lepa parerenangan si Elkana, simanteunia, “Angoian le nupusosou Hana? Angoi ta noba mukom samba angoi mareureu bagam? Ta'pa aku peile makeppu saki ka sipulu tatoga taimanteu?”

Si Hana samba si Eli

⁹ Ka sara gogoi lepat arapukom ka Uman Tuhan Ka Silo purionangan si Hana. Kateteret nenda si Imam Eli ai leu et nia ka Uman Tuhan, ainia mukukuddu ka korosinia ka bebet matatbaliu.

¹⁰ Bulat ka bagat reureu baga panindounangan si Hana katubut Tuhan ainia ipasesekket ipusou.

¹¹ Lepa tiboakenangan palelengania si Hana kuanangan, “Tuhan Sipulugege, lelekngake pei paguguletNu nene! Itcoat pangoringan paguguletNu samba repdep pei katubut paguguletNu, ia leu et bui' nukalipogi paguguletNu. Ke Nuake bai katubukku sara toga simanteu, galaikungan palelengan kuakenia katubum burut purimanuaiatnia, samba ta tusasapu alainia.”

¹² Bulat makope buru ipanindou si Hana, samba si Eli masilelekngake nugungun sinanalep nenda.

¹³ Si Hana ipanindou ka patuat, oto sarat bibonia le mungungupngup, tapoi ngangania ta maarep. Kalulut nenda ikua le te si Eli ainia ipupuinenga.

¹⁴ Iageti kuanangan katubunia si Eli, “Bui nupupuineng sene! Bui' nulo minca anggur!”

¹⁵ Tapoi aleginangannia si Hana, “Ta' anai aku ipupuineng, ukkui, bulat ta kulolo le anggur! Mabele bagakku, samba ai aku maninindou masitiboi sangamberi pangoringanku katubut Tuhan.

¹⁶ Bui' te nuaddeake aku nene sinanalep sitaimakolou. Kupaninindou kele nene kalulut kopet reureu bagakku le.”

¹⁷ Iageti kuanangan si Eli, “Ke kisedda toilingan le ka bagat angkat baga. Bule Taikamanuan Israel masiake katubum apa sitiddounu katubuNia.”

¹⁸ Aleginangannia si Hana, “Bule aku nene masisilo pununtuat bagam.” Lepa geti belania sinanalep nenda, pukomnangan, samba taan mareureu bagania.

Pututukat matat Samuel samba tukau katubut Tuhan

¹⁹ Ka mancepnia si Elkana samba sangalalepnia suru sia simancep, samba kele ailepa rapanindou katubut Tuhan, toili sia ka lalepda ka laggai Rama. Iageti perep sia ruatda si Elkana samba si Hana, sinanalepnia nenda, samba arepinangan si Tuhan panindogat Hana.

²⁰ Pusuruketnangan sinanalep nenda samba tutuakenangan toga simanteu. Oniakenangannia Samuel, aipoi aikua, “Sinindouku le katubut Tuhan.”

²¹ Ailinangan minca teterenia si Elkana samba sangalalepnia raei ka Silo masipanguruatnake buluakenen sisenen rura samba buluakenen sikokoi katubut Tuhan.

²² Tapoi ta amei ka sia si Hana. Aikua le ka simanteunia, “Atugalakngan geti mutottot si Samuel, taroakekungannia ka Uman Tuhan, samba pukuddunangan sedda burut purimanuaiatnia.”

²³ Aleginangannia si Elkana, “Maeruan, galaiakean adeakenennu simaeru, kudduakean ekeu ka lalep teret iaili teterenia nugalakngake mutottot togatta. Samba bule si Tuhan masigalai palelenganNia.” Oto pukuddunangan si Hana ka lalep teret iaili teterenia iputottot togania.

²⁴ Kele aitugalakngake iputottot si Samuel, taroakenangannia inania ka Uman Tuhan ka Silo. Kateteret nenda bulat magoiso peilenia. Abbitnangan leu et sangamuneng jaui simanteu telu ngarura rurania, pulu ngakilo gandum, samba sara suppit kulit sibara ka baga simasut anggur.

²⁵ Ja'jarangan jaui nenda, lepa taroakerangan si Samuel katubut Eli.

²⁶ Kuanangan si Hana katubut Eli, “Bojoian le ukkui, aipeile nurerepdep aku? Aku te nene sinanalep siitconu sipuririo sene, sipaninindou katubut Tuhan.

²⁷ Toga nene te sitiddouku katubut Tuhan. Aiarepingan panindogatku,

²⁸ samba kalulut nenda toga nene kuakenia ibailiunia bakkat Tuhan burut purimanuaiatnia.” Kele ailepa nenda purekkukrangan manindou katubut Tuhan.