1Rim. 9 - BUKO SIPUNENAN

Si Tuhan masipatoila minca tubunia katubut Salomo

¹ Kele ailepa aigalai Uman Tuhan si Salomo samba kudduat purimataat samba leu sangamberi sipinaatunia,

² patoilanangan minca tubunia si Tuhan katubut Salomo kele sipuaaili ka Gibeon.

³ Kuanangan si Tuhan katubunia, “Akuarepingan panindogatnu, samba uma sigalainu nene Kubailiuakenia kudduat sipunenan kudduat panindogat katubukKu teret buru-buru. Mariuriu le geti kupasikeli samba Kujago kudduat nene.

⁴ Ke mupagugulet ekeu katubukKu ka muinet patuatnu samba ka topit kele ukkuinu si David, samba mureddet ka surukat samba parentaKu,

⁵ iageti galaiakekungan palelenganKu katubut ukkuinu katubut David: Sapunuteteunu mariuriu le muparenta ka Israel.

⁶ Tapoi ke ekeu ele sapunuteteunu masiteitei Aku samba ta masireddet sangamberi surukat samba parentaKu samba leu nupanindogi taikamanua bagei,

⁷ iageti Aku masikekle geti paamianKu Israel ka tobbou laggai siakeKu katubutda. Aku leuet masikaddiuake geti Uma nene siteuakenenKu ibailiu kudduat parurukat musuru katubukKu bailiu kaipa-kaipa le tai Israel tupaloloi geti samba tuga'gati.

⁸ Uma panindogat nene ibailiu geti sara siragatat bailiu senen sirimanua situsasabau sedda tuge'ge geti samba museret tubu. Kuarangan geti, ‘Angoian le aigalai si Tuhan kisedda ka tobbou laggai samba uma nene?’

⁹ Lepa alegirangan sirimanua geti, ‘Kalulut arakaddiuake Tuhan, Taikamanuanda, sipalulu taikebbukatda bela ka Misir. Arapanindogi taikamanua bagei. Nenda te lulunia si Tuhan masiake pugejaat baga nene ka sia.’ ”

Pukerekat bagat Rimata Salomo samba Rimata Hiram

¹⁰ Aigalai Uman Tuhan si Salomo samba kudduat purimataat rimata rua pulu ngarura burunia.

¹¹ Sangamberi loina pinilok Libanon samba loina pinilok simaturere samba leu sangamberi mas besiakenen Salomo addeat masigalai Uman Tuhan samba kudduat purimataat nenda aikauan Rimata Hiram katubunia. Kele ailepa galajet nenda kaunangan Rimata Salomo katubut Hiram rua pulu laggai ka kupkumen tobbou laggai Galilea.

¹² Iageti ei si Hiram masiitco laggai nenda, tapoi ta masege bagania ka sikau Salomo nenda.

¹³ Kuanangan katubut Salomo, “Saraina, kisene pa galainia sangamberi laggai siakenu katubukku?” Nenda te lulunia kupkumen tobbou laggai nenda aipeile tuoniake Kabul teret kineiget.

¹⁴ Ai Epat ngaribu ngakilo legei mas aikau si Hiram katubut Salomo.

Pabagei-bagei sigalaiakenen Salomo

¹⁵ Rimata Salomo masipakei enungan pugagalai siubbuakenen masigalai Uman Tuhan, kudduat purimataat rimata, irip Jerusalem samba addeat masitabbui polak ka isit ka kaiaman Uman Tuhan. Kisedda leu aigalaiake minca laggai Hazor, Megido samba Gezer.

¹⁶ Laggai Gezer iate laggai sisagganginda siboiki samba sikalaakenennia rimata Misir, lepa sikudduiji laggai nenda tumateiake samba laggaira tulabo. Lepa geti laggai nenda kaunangannia rimata Misir katubut Salomo.

¹⁷ Samba si Salomo te amasigalai minca laggai nenda. Pugagalai siubbuakenen leuet aigalai minca si Salomo masigalai Bet-Horon-Hilir,

¹⁸ Baalat, Tamar, ka leleu simatangeu ka Jehuda,

¹⁹ sangamberi laggai kudduat pangoirikat komen, samba leu sangamberi laggai kudduat kereta pasaggak samba kuronia. Sangamberi sipinaatu masigalai galajet ka Jerusalem, Libanon, samba ka sangaliot kupkumen laggai pasikelatnia aigalaiakean.

²⁰ Sangamberi tai Amori, Het, Feris, Hewi samba Jebus, ta addeakenen tai Israel, iate:

²¹ Sangamberi sirimanua sikuddu sedda iate sapunuteteu tai Kanaan sitaioi ramateiake tai Israel, siate aibailiuake si Salomo sipugagalai siubbuakenen. Pat aili ineneiget sapunuteteura aipeile ibabailiu sia pagugulet.

²² Tai Israel geti ta aibailiuake pagugulet si Salomo; tapoi ibailiuake le sia utet saladdu, utet saladdu, siuteake kereta pasaggak, samba saladdu sipukukuro.

²³ Lima ngotu lima pulu siuteake sipugagalai ikau pasikelatda rapasikeli sipugagalai siubbuakenen ka sangamberi galajet baraakenen Salomo.

²⁴ Kele aiei togat Parao barania ka Laggai David iei ka lalepnia sigalai Salomo ka sia, rioakenangan leu si Salomo Milo.

²⁵ Telu ngaminca ka bagat sangarura ipanguruatnake si Salomo buluakenen rarangen samba buluakenen paabanan ka uddut kudduat pasibuluat sirioakenennia addeat Tuhan. Labonangan leuet kumanyang addeat Tuhan. Kisedda te aikappluake si Salomo pugagalai Uman Tuhan.

²⁶ Galainangan kapa pasaggaknia si Salomo ka Ezion-Geber, legret Elot ka bebet koat Gukguk Akaba, kupkumen laggai Edom.

²⁷ Kaunangan Rimata Hiram sipugagalai ka kapa'nia sibara puagaijat mulajo sambatda mulajo sipugagalai ka kapat Salomo.

²⁸ Pukaparangan masiailiake tobbou laggai Ofir masiala pupu epat ngaribu mas samba ambitrangannia katubut Salomo.