1Rim. 8 - BUKO SIPUNENAN

Peti Pakerekat Bagat Tuhan tuambit ka Uman

¹ Lepat nenda Rimata Salomo masikoiniake sangamberi sautet suku samba muntogat sibara ka tai Israel, moi katubunia ka Jerusalem bule raotcaake Peti Pakerekat Baga ka Sion, Laggai David, ka Uman Tuhan.

² Iageti oi sia sangamberi ka gogoi punen Sapou Buluk ka laggo Etanim laggo sikapitu.

³ Kele araparuru sangamberi saute nenda, tai imam masiangkatnake Peti Pakerekat Baga nenda,

⁴ samba ambitrangannia ka Uman Tuhan. Sapou Tuhan samba leu sangamberi bibiletnia tuotcaake leuet ka Uman Tuhan.

⁵ Rimata Salomo samba sangamberi paamian Israel paruru ka matat Peti Pakerekat Baga nenda, lepa panguruatnakerangan katubut Tuhan biribiri samba jaui, sitaoi tuadde iginia.

⁶ Lepa nenda tai imam masiambit Peti Pakerekat Baga nenda ka bagat Uman Tuhan samba galakngakerangannia ka tei tularat malaika ka bagat Kudduat Bulat Sipunenan.

⁷ Kappot sangamberi tularat malaika nenda aitububuka ka uddut peti nenda, bailiu tabbonangan peti nenda samba sangamberi loina pasibairatnia.

⁸ Loina babairat nenda makope nanta, bailiu matoilanangan ngungun loina nenda ka Bilik Sabeu ka matat Kudduat Bulat Sipunenan, tapoi ta matotoila ka uja samba sedda te kudduatnia teret kineneiget.

⁹ Ka bagat Peti Pakerekat Baga nenda ta anai apapa bagei sarat rua bukku lei le. Bukku lei nenda aiguruakean ka Peti Pekerekat Baga si Mose ka leleu Sinai, kateteret aigalai si Tuhan palelengan pasamba tai Israel kateteret pusilaiatda baratda ka Misir masiailiake tobbou laggai Kanaan.

¹⁰ Kateteret arabela tai imam ka Uman Tuhan nenda, sinulut lalep nenda sunnakenangannia tanai rusa.

¹¹ Tanai rusa nenda aimukikinam masipatoila pubebeunan samba kababarat Tuhan bailiunangan tai imam nenda ta momoi ratuguru' minca masiriuriuake galajetda.

¹² Iageti panindounangan si Salomo, kuanangan, “Oi Tuhan, Ekeu le amasikau sulu ka manua. Tapoi Nuoba peile mukuddu ka bagat tanai rusa simagepgep.

¹³ Kineneiget akugalaian umam simalainge, kudduatNu teret buru-buru.”

Tiboiet Rimata Salomo ka sapaamian

¹⁴ Lepat aipanindou Rimata Salomo, mattainangan sangamberi paamian sipuririo sedda, lepa tiddounangan bule ipanukani sia Taikamanua.

¹⁵ Kuanangannia, “Tuumun le si Tuhan Taikamanuan Israel sigalai palelenganNia nenda katubut David, ukkuiku kise:

¹⁶ Baranangan akupalulu paamianKu bela ka Misir, ta anai berisara laggai ka Israel Akupili ibailiu uma kudduat panindogat katubukKu. Tapoi ekeu, David, Akupili masiparenta paamianKu.”

¹⁷ Kuanangan minca si Salomo, “Ukkuiku si David aipaatungan masigalai uma kudduat panindogat katubut Tuhan Taikamanuan Israel.

¹⁸ Tapoi aikua le Tuhan katubunia, “Pinatum nenda maeru.

¹⁹ Tapoi, ta ekeu masigagalai umangKu, togam le masigagalai umangKu nenda'.

²⁰ Kineneiget aigalaiakean si Tuhan palelenganNia. Aibailiuan aku rimata Israel masisailiake ukkuiku, samba akugalaian leuet uma kudduat panindogat katubut Tuhan, Taikamanuan Israel.

²¹ Ka bagat Uman Tuhan nenda akupatarekan kudduat Peti Pakerekat Baga sibara bukku lei ka bagania. Bukku lei nenda iate palelengan Tuhan pasamba taikebbukatta kateteret aipalulu sia bela ka Misir.”

Panindogat Salomo

²² Kapplu nenda, ka matatda sapaamian siooi, purionangan si Salomo masimatai kudduat pasibuluat lepa angkatnakenangan ruangasilat kabeinia

²³ samba panindounangan, “Tuhan Taikamanuan Israel! Taanai kele Ekeu, ka manua kisedda leuet ka polak. Anugalaian palelengan samba anupatoilaan nuntut bagam ka paamianNu simariuriu topit samba reddet ka muinet paatuat katubum.

²⁴ Anugalaiakean palelengan katubut ukkuiku si David. Apa sipalelekNu nenda anugalaiakean ka gogoi nene.

²⁵ Kineneiget, oi Tuhan Taikamanuan Israel, pasikeli sipalelekNu katubut ukkuiku si David, paguguletNu nenda, kise: SapunuteteuNu ta masususu kamatakKu samba sia mariuriu masikudduiji purimataat Israel, ke mariuriu ramatopit murimanua katubukKu kele ekeu.

²⁶ Kineneiget, oi Tuhan Taikamanuan Israel, patoilaan sipalelekNu katubut ukkuiku si David, paguguletNu.

²⁷ Tapoi, oi Taikamanua, bulatnia pa nuoba mukuddu ka polak nene? Sangaliot manua ta isisiripoki ekeu, sarapei Uma panindogat sigalaiku nene!

²⁸ Oi Tuhan, Taikamanuangku, aku paguguletNu! Tapoi arepmake le panindogatku, samba sunnake sitiddouku ka gogoi nene.

²⁹ Bule sinago samba sinoibo Ekeu masipuletsei uma nene sipilim sibailiu kudduat panindogat katubum. Arepi panindogat paguguletnu nene.

³⁰ Samba arepi panindogat pagugulet samba paamianNu Israel sinegeakenenmai katubum ka kudduat nene; bule ka kudduatNu ka manua Nuarepi aku samba nuappeake paamianNu nene, ke manindou katubut ka uma nene.

³¹ Ke sara sirimanua masigalai sele katubut sirimanua sabagei, samba tuambitnia ka kudduat pasibuluatNu ka uma nene bule ipusuppa taanai aigalai sele.

³² Oi Tuhan Taikamanua, arepmake samba takkiake pakaroatda sapaguguletNu, ukum le sigalai sele siripot sigalaiakenennia samba belaake le sitaigalai sele.

³³ Ke paamianNu Israel rakalaake sia tai saggakda kalulut aragalaian jo, lepa oi sia katubum samba masisuru Ekeu sibailiu Tuhan, lepa geti oi ka uma parurukat nene samba leu manindou masitiddou katuappekat katubum,

³⁴ bule nuarepi sia ka manua. Bule Nuapppeake jot paamianNu nene, samba masitoiliake sia minca ka tobbou laggai sikauNu ka taikebbukatda.

³⁵ Ke paamianNu masigalai jo katubum samba, Ekeu masiukum sia ta nubebeleake urat, lepa bauakerangan patuatda samba masisuru' Ekeu sibailiu Tuhan, lepa geti oi sia ka uma panindogat nene samba manindou katubum,

³⁶ bule nuarepi sia ka manua. Samba appeake le jot paamianNu Israel samba rimatatda. Gelaiake le sia masigalaiake apa simaeru. Lepa nenda, oi Tuhan, beleake le urat ka tobbou laggai nene, tobbou laggai sikauNu ka paamianNu bule ibailiu bakkatda teret buru-buru.

³⁷ Ke tobbou laggai nene isaksak pulajeat ele besi simasappo, samba imantei sangamberi siureman kalulut legeu, sipakokom ele ipakatainia sit, ele ke rasaggangi paamianNu tai saggak, ele iorak sia besi,

³⁸ bule Nuarepi panindogatda. Ke katalagat paamianNu Israel ai simareureu baga manindou katubum aitototoiake kabeinia ka ipot uma panindogat nene,

³⁹ bule nuarepi, nuappeake samba nuropake sia. Sarat Ekeu le siagai patuat sirimanua. Kalulut nenda galaiake le ka senen sirimanua siripot sangamberi sigalainia,

⁴⁰ bule paamianNu mariuriu ramareddet katubum ujut rakuddu ka tobbou laggai sikauNu ka taikebbukatmai.

⁴¹ Ke sara sirimanua siooiake, ta tai Israel, sibara ka tobbou laggai kasareunan moi kalulut Ekeu, –

⁴² kalulut raarep te geti pubebeunan samba pukerengan sigalaiakenenNu ka paamianNu, – lepa oinia samba manindou ka uma panindogat nene,

⁴³ bule ka kudduatNu ka manua Nuarepmake panindogatnia samba masisunnake tiddogetnia. Kalulut kisedda te sangamberi purimatat ka sangaliot polak masiagai Ekeu samba masireddet Ekeu kele paamianNu Israel. Agairangan geti aipoi uma sigalaiku nene iate kudduat panindogat katubum.

⁴⁴ Ke Nuparentaake paamianNu mei pasaggak masisaggangi saggak, samba kenanen kaipa rakuddu samba ke manindou sia ka Taikamanua ka ipot laggai sipilim samba ka ipot uma panindogat sigalaiku kabagat onim,

⁴⁵ bule ka kudduatNu manua, Nuarepmake panindogatda nenda samba masiake kamanangan katubutda.

⁴⁶ Ke paamianNu masigalai jo katubum – kalulut taanai sirimanua sitaigalai jo, – iageti kalulut goluNu obaakenungan rakalaake sia tai saggak, samba tuambit sia ukumakenen ka sara tobbou laggai simareunan ele simalegre,

⁴⁷ bule Nuarepi panindogatda. Ke ka tobbou laggai nenda ragalakngake sangamberi jotda, samba manindou katubum kalulut seseakera jotda, arepmake le panindogatda, oi Tuhan.

⁴⁸ Ke ka tobbou laggai nenda ka linat paatuat samba bulat sibulatnia ragalakake sangamberi jotda, samba manindou katubum masimatai ka tobbou laggai nene siakeNu ka taikebbukatmai, ka ipot laggai sipilim samba uma panindogat musuru ka umam sigalaiaku addeatNu nene,

⁴⁹ iageti ka kudduatNu ka manua buita nuarepmake le panindogatda samba nupununtuki sia baga.

⁵⁰ Appeake le sangamberi jo samba pukakataira katubum, samba galai le sangamberi saggakda ragalaiake simaeru katubutda.

⁵¹ Sia iate paamianNu saram sipalulum bela ka Misir ka tobbou laggai aitupaoreiji sia.

⁵² Bule Ekeu, oi Tuhan Taikamanua mariuriu nupasikeli paamianNu Israel samba leu rimatania. Samba kau le nuarepmake panindogatda ka senen rapusoga masitiddou paroman katubum.

⁵³ Ekeu, oi Tuhan Taikamanua, anukokoiaakean sia katalagat sangamberi purimataat bule ibailiu paamianNu saram, kele sikuam katubutda sisege ka paguguletNu katubut Mose, kateteret anupalulu taikebbukatmai bela ka Misir.”

Panindogat pasilepa

⁵⁴ Kise te aigalai manindou si Salomo: Purekkuknangan ka matat kudduat pasibuluat pasamba kabei sitotoiakenen ka pata. Lepat nenda purionangan

⁵⁵ samba ka nganga sabeu itiddou panukanan Taikamanua addeat sangamberi sirimanua siparururu sedda, kuanangan,

⁵⁶ “Tuumun le si Tuhan sipasiaake riuriu puririmanua ka paamianNia kele sipalelekNia katubut Mose paguguletNia. Sangamberi simaeru sipalelekNia aigalaiakean.

⁵⁷ Bule Tuhan Taikamanuanta masipaalei sita kele ipaalei taikebbukatta buian ikaddiuake sita samba iribbaiake sita.

⁵⁸ Bule ibailiuake sita sangamberitta simariuriu topit katubuNia, bule mariuriu tapurimanua ka siobat bagaNia samba masireddet sangamberi surukat samba parenta sikauNia ka taikebbukatta.

⁵⁹ Bule Tuhan, Taikamanuanta, mariuriu irepdem panindogat samba patiddouakenen sisegeakenenku nene katubuNia. Bule mariuriu ipatoila anggai bagaNia ka paamian Israel samba ka rimatania samba ikau katubutda siripot besiakenenda senen gogoi,

⁶⁰ bule sangamberi purimataat ka polak raagai, iate Tuhan le Taikamanua, taanai bagei.

⁶¹ Kau imariuriu topitmui katubut Tuhan Taikamanuanta mureddet ka sangamberi surukat samba parentaNia kele sigalaiakenenmui ka gogoi nene.”

Punen Uman Tuhan

⁶² Lepa nenda Rimata Salomo samba sangamberi tai Israel siparururu sedda masipangurutnake buluakenen katubut Tuhan.

⁶³ Sibailiu buluakenen paabanan, panguruatnakenangan si Salomo rua pulurua ngaribu ngamuneng jaui samba sangotu rua pulu ngaribu ngamuneng sangotu rua pulu ngaribu ngamuneng biribiri. Kisedda te rimata samba sangamberi paamian arapuneni Uman Tuhan.

⁶⁴ Gogoi nenda leuet puneninangan si Salomo rubeiat ka talaga laibokat ka matat Uman Tuhan nenda. Lepa geti ka laibokat nenda panguruatnakenangan buluakenen rarangen, buluakenen gandum, samba tabet tarimeu addeat buluakenen paabanan. Sangamberinia nenda ipanguruatnakenia sedda kalulut kudduat pasibuluat tembaga makope goiso addeat sangamberi panguruat nenda.

⁶⁵ Ka Uman Tuhan nenda si Salomo samba sangamberi paamian Israel masibaraake punen Pusasapou Buluk burunia pitu ngagogoi. Bulat maigi sirimanua siparururu sedda. Moi sia baratda ka kupkumen laggai barania ka enungan siei ka Hamat ka bare pat aili ka pasongan Misir ka kaiaman.

⁶⁶ Ka gogoi sikabalu koiniakenangan si Salomo sangamberi sirimanua nenda toili. Sangamberitda masiumunnakenia lepa toili sia ka lalepda ka angkat baga, kalulut sangamberi panukanan siaket Tuhan ka paguguletNia si David samba ka tai Israel paamianNia.