1Rim. 7 - BUKO SIPUNENAN

Kudduat Purimataat Salomo

¹ Si Salomo masigalai leuet kudduat purimataatnia. Pasigagalai kudduat purimataat nenda pulu telu ngarura burunia.

² Galainangan leu si Salomo uma sipuoni “Leleu Libanon”, nantania sangotu eto, lionia lima pulu eto sama buaknia telu pulu eto. Uma nenda ai telu arigi loina pinilok sibailiu soponia samba pulanennia sibara ka loina nenda leu.

³ Uma purimataat nenda lapprania tugalai sibara ka loina pinilok Libanon. Igit kalak lappra nenda epat pulu lima ngasiata.

⁴ Rupit uma nenda ai jandelania. Ka rupi isit katubut katciu samba kaikattoet ai telu jandelania sipamamatai.

⁵ Sangamberi matatbaliu samba jendela putubuatnia siepat taiming; telu jandela ka rupi isit kaikatciu samba kaikattoet sipamamatai.

⁶ Si Salomo masigalai leuet uma sipuoni “Uma Arigi”. Nantania lima pulueto samba lionia telu pulueto. Ka matat uma nenda ai laibokat samba oratnia.

⁷ Galainangan leuet uma iate, “Uma Purimataat”, ele “Uma Purapanan.” Uma nene barania ka bagat lalep sege ka sangamberi kasounia tulakkeki pasamba loinat pinilok Libanon. Ka uma nene te ipakaroake samba itakkiake sangamberi pakaroat si Salomo.

⁸ Uma kudduat Salomo tugalai kele sangamberi uma bagei. Kudduatnia kateitei Uma Purapanan. Galainangan leuet si Salomo uma simakere kudduat sinanalepnia, iate togat rimata Misir.

⁹ Sangamberi uma nenda, sambat beunan laibokatnia, barania ka bongen sege ka tobatnia, tugalai sibara ka bukku simaeru. Sangamberi bukku nenda tutarekngake ka pamaekat bukku, samba tutippu siripot kirekat, rubeiat ka baga samba rubeiat ka teiteinia tugaktukngake pasamba gagaji.

¹⁰ Bongen sangamberi uma nenda tugalai sibara ka bukku sabeu simakeppu saki. Sangamberi bukku nenda ai sipulu eto samba sibalu eto beunannia.

¹¹ Ka uddutnia tupaottot bukku bagei simakeppu saki samba tutippu masitut kirekat, lepa tabbo pasamba loina pinilok Libanon.

¹² Irip laibokat uma kudduat purimataat samba irip laibokat ka bagat ka Uman Tuhan samba leu irip laibokat ka rubeiat ka mata Uman Tuhan, sene-senenia sibara lakke loina pinilok Libanon ka uddut senen telu ngalakke bukku.

Galajet Hiram masigalai Uman Tuhan

¹³ Iageti Rimata Salomo masikoniake sirimanua masiala si Hiram ka Tirus.

¹⁴ Nia iate sarat togat silumang sibara ka suku Naftali, ukkuinia tai Tirus, sipasigalai tembaga, maigi siagainia, puagai kolou samba puagaijat masigalai senengamata bibilet sibara tembaga, oi si Hiram ka Rimata Salomo, galaiakenangan sangamberi galajet kele sikuat rimata.

Rua arigi sabeu sigalai ka tembaga

¹⁵ Galainangan si Hiram rua arigi tembaga. Senen arigi buaknia pulu balueto.

¹⁶ Ka arigi nenda galainangan rua utet arigi sibara tembaga, buaknia pasasarania buaknia limanga eto?

¹⁷ Lepa galainangan si Hiram letcu sibara ka tembaga samba kaunangannia ka utet arigi nenda – jarik nenda kele kilikili siputre ele letcu – senen-senen arigi sara jarik.

¹⁸ Senen utet arigi nenda tupalainge pasamba rua ngatut buat delima sigalai ka tembaga, bule ilabbu utet arigi nenda. Kisedda leuet ka arigi sikarua.

¹⁹ Samba loina simuine ka utet arigi malegre kalaibokat nenda, putubuatnia kele ogo kainau. Buaknia epat eto,

²⁰ iate sangamberi loina simuine ka uddut rua arigi nenda, ka isit bulat kapata, ka uddut jarik silailai loina simuine; samba rua ngotu buat delima sipatutut masibokko karua loina simuine nenda.

²¹ Karua arigi nenda tugalai ka bebet Bilik Sabeu. Arigi saigit ka kaiaman tuoniake Jakhin; ka isit bare tuoniake Boas.

²² Kele ailepa aikau si Hiram ogo kainau ka utet arigi nenda, kapplu galajetnia ka arigi.

Simuko sibara ka tembaga

²³ Lepa geti galainangan si Hiram sara simuko simamuine sibara ka tembaga, buaknia lima eto, lionia pulu eto, samba momoi tubolitake tali nantania telu pulu eto.

²⁴ Sangaliot tei ngungun bebenia tupalainge pasamba rua tularat buat paku sipatutut, pulu ngambua tularat buat paku kabagat sangaeto. Tularat buat paku nenda tugalai simakere pasamba simuko nenda.

²⁵ Simuko nenda tugalakngake ka uddut teitei pulu rua ngamuneng jaui tembaga, telu simatai ka bare', telu ka kaiaman, telu ka sikaleleu samba telu ka sikalaut.

²⁶ Kepput simuko kele kepput takep kabei. Kepput bebenia makere bebet pulokat simasikkou kele ogo kainau sibotco. Simuko nenda momoi tukau ka bagania iaili epet pulu ribungaliter oinan.

Sangamberi kereta tembaga

²⁷ Galainangan leuet si Hiram pulu kereta tembaga. Senen kereta nantania epateto, lionia epat eto samba buaknia telueto.

²⁸ Sangamberi kereta nenda ai lapprinia sibara tuddak silaplap.

²⁹ Sangamberi lappri nenda tupalainge pasamba tularat singa, jaui samba tularat malaika. Ka isit kapata samba ka repe tularat singa samba jaui nenda ai mutotoak tularat ogo siappra.

³⁰ Senen kereta nenda ai epat roda tembaga pasamba unou roda sigalai ka tembaga leuet. Ka epat tuddak kereta nenda ai arigi pasitukket simuko sigalai ka tembaga pasamba pulaingeania tularat ogo siappra ka isit ka teiteinia.

³¹ Rubeiat ka pata ka epat arigi pasitukke nenda ipatabbra le nia sara laplap simamuine pasitukket simuko. Sangamberi arigi pasitukke nenda tulogro buaknia saeto ka uddut lappri simatuddak nenda; samba sara sitengaeto ka teinia. Ka ngungun laplap nenda ai tularat.

³² Buak sangamberi rodania sara siteeto; ikukuddu ka tei sangamberi lappri. Unou rodania pasamba keretania ibailiu sangarubeiat.

³³ Sangamberi rodania nenda makere le roda kereta pasaggak; sibokko roda, tailit roda, unou samba patabbarat tailit rodania sangamberinia tugalai sibara ka tembaga.

³⁴ Ai epat arigi pasitukke ka senen taiming rubeiat ka tei kereta nenda. Sangamberi arigi nenda ibailiu sangarubeiat pasamba keretania.

³⁵ Ka sangaliot rubeiat kereta kapata nenda ai letcu lionia siteeto. Arigi pasitukke samba sangamberi lapprinia ibailiu sangarubeiat pasamba keretania.

³⁶ Sangamberi arigi pasitukke samba sangamberi lapprinia nenda tupalainge pasamba tularat malaika, singa, loinat bai samba ogo, kaipa le ai kudduat simaoggak.

³⁷ Kisedda te galainia aitugalai sangamberi kereta nenda. Sangamberinia sikere putubuat samba kirekatnia.

³⁸ Galainangan leuet si Hiram pulu simuko, sara simuko addeat ka kereta. Senen simuko nenda momoi tukau ka bagania balungotu ngaliter oinan, samba beunannia epat eto.

³⁹ Kaunangan si Hiram lima kereta ka saigit ka kaiaman Uman Tuhan, samba lima ka saigit ka bare'. Simuko sigalai ka tembaga galakngakenangannia ka taiming isit sikalaut kaiaman.

Tusuratake onin bibilet ka Uman Tuhan

⁴⁰ Galainangan leuet si Hiram sangamberi koali, sanduk samba mangkok. Lepat nenda kapplu te sangamberi galajetnia ka Rimata Salomo addeat Uman Tuhan. Nene te sangamberi bibilet sigalainia:

⁴¹ Rua arigi sabeu, rua utet arigi putubuatnia kele mangkok tugalakake ka uddut arigi sirua nenda, letcu siputre ka senen utet arigi.

⁴² Epat ngotu delima tembaga silakke ka bagat rua ngatut sigoilik letcu siputre ka senen utet arigi;

⁴³ Pulu kereta, pulu simuko sabeu;

⁴⁴ simuko tembaga, pulurua jaui tembaga situkke simuko nenda;

⁴⁵ Sangamberi koali, sanduk samba mangkok; Sangamberi bibilet ka Uman Tuhan nenda, sigalai Hiram addeat Rimata Salomo, tugalai sibara ka tembaga samba tusasai pat kirisau.

⁴⁶ Rimata masikoiniake sirimanua ragalai sangamberi bibilet nenda ka pasigalaiat logam ka paoggangan Sukot samba Sartan ka Su'sut Jordan.

⁴⁷ Si Salomo ta aikoiniake sirimanua masikilo tembaga nenda, kalulut makope igi. Oto sanenia bibilet nenda ta tuagai igit kilonia.

⁴⁸ Si Salomo leuet masikoiniake ragalai sangamberi bibilet ka Uman Tuhan, iate kudduat pasibulat samba meja kudduat roti panguruatnakenen ka Taikamanua sigalai ka mas;

⁴⁹ Pulu reret alito sikudduakenen ka matat Kudduat Bulat Sipunenan, iate lima saigit ka kaiaman samba lima saigit ka bare', sangamberi ogo, alito samba sangamberi laplap sigalai ka mas

⁵⁰ sangamberi mangkok, tegle, seseilu, pulokat, samba purusuat, sigalai sibara ka mas; sangamberi pasiottot matatbaliu addeat matatbaliu Kudduat Bulat Sipunenan, samba sangamberi matatbaliu laibokat Uman Tuhan.

⁵¹ Kele ailepa aigalai Uman Tuhan Rimata Salomo, koiriakenangan ka bagat pangoirikat ka lalep nenda sangamberi perak, mas samba bibilet bagei sipanguruatnakenennia si David ukkuinia katubut Tuhan.