1Rim. 6 - BUKO SIPUNENAN

Igalai Uman Tuhan si Salomo

¹ Si Salomo masitaddaake masigalai Uman Tuhan ka laggo Ziw, iate laggo sikarua, karura sikaepat puparentaatnia, 480 ngarura lepat arakaddiuake laggai Misir

² Kirekat Uman Tuhan, rubeiat ka baga iate kele kisene: Nanta 60 eto, lio 20 eto samba buaknia 30 eto.

³ Ka rubeiat ka matat Uman Tuhan nenda ai laibokatnia nantania 20 eto kele nantat lalep nenda samba lionia 10 eto.

⁴ Rupit Uman Tuhan nenda maigi lobok jandela, saigit ka uja samba ka baga mangaungau.

⁵ Sangaliot rupi kateitei lalep nenda, ka rupit isit ka teiteinia tugalai biliknia sipurereddenan.

⁶ Reddenan siboiki, lionia 5 eto. Ka reddenan sikarua 6 eto samba ka reddenan sikatelu 7 eto. Rupit reddenan siboiki makeppu bele pei rupi ka reddenan ka patania, bailiunangan loina simamuine nenda tuppai nenda momoi tutuppaiake pasamba rupit Uman Tuhan nenda kenanen ta atulobok rupinia.

⁷ Kateteret aiturioake Uman Tuhan nenda, ta amaarep nau panoko ele baliok ele sara laba pugalai, kalulut sangamberi buku pakeiet ka lalep nenda amuboikian aitutarekake.

⁸ Ka isit kaikattoet lalep nenda ai matatbaliu siei ka reddenan siboiki, samba orat siei ka reddenan sikarua samba leu ka reddenan sikatelu.

⁹ Lepat airioake Uman Tuhan nenda, galainangan lappra lalep nenda sibara laisi samba lapprinia sibara ka loina pinilok Libanon.

¹⁰ Galainangan leuet tuppai bilik ka sangaliot Uman Tuhan nenda. Senen reddenannia lima eto buaknia. Samba kele ailepa aigalai tuppai bilik ka sangaliot lalep nenda, iate senen tingkat lima eto buaknia, iageti kaunangan rupinia pinilok.

¹¹ Iageti kuanangan si Tuhan katubut Salomo,

¹² “Ke nutut sangamberi surukat samba parentaKu, galaiakekungan leu katubum kele sipinalelekKu katubut ukkuinu si David.

¹³ Mukuddu le geti Aku ka bagat lalep sigalainu nene katalagat paamianKu Israel. Ta' kukakaddiuake sia.”

Sangamberi sibabara ka Uman Tuhan

¹⁴ Kise te aikappluake si Salomo pugagalai Uman Tuhan nenda:

¹⁵ Sangaliot rupi rubeiat kabaga iate loina pinilok Libanon, barania ka bagat lalep aili ka lappra. Bagania tugalai sibara ka loina pinilok simaturere.

¹⁶ Ka bagat lalep nenda, ka isit ka teitei tugalai bilik pasamba tugalai rupi pasongan sibara ka loina pinilok, barania ka bagat lalep aili ka lappra. Bilik nenda tuoniake Kudduat Bulat Sipunenan.

¹⁷ Kudduat ka matat Kudduat Bulat Sipunenan nenda tuoniake Kudduat Simalio, samba nantania epat pulu eto.

¹⁸ Rupi isit rubeiat ka baga sangaliot lalep nenda tulakkeki pasamba loina pinilok Libanon, bailiu sangamberi bukku rupinia bulat ta matotoila. Lakkekat nenda tupae tugalai tularat buat paku samba senengamata sibotcot ogo.

¹⁹ Kudduat Bulat Sipunenan sigalai ka bagat Uman Tuhan nenda tutarekake addeat Peti Pakerekat Bagat Tuhan.

²⁰ Bilik nenda nanta, lio samba buaknia rua pulu eto. Lakkekinangannia karate mas, lepa galainangan kudduat pasibuluat sibara ka loina pinilok.

²¹ Kele ailepa ailakkeki Uman Tuhan nenda karate mas si Salomo, kilitikakenangan letcut mas ka matatbaliu gugurukat, lepa lakkekinangan rupi Kudduat Bulat Sipunenan pasamba mas.

²² Sangaliot rubeiat ka baga Uman Tuhan nenda samba leu kudduat pasibuluat ka Kudduat Bulat Sipunenan nenda tulakkeki pasamba mas simalina.

²³ Ka bagat Kudduat Bulat Sipunenan nenda tugalakngake leuet rua tularat malaika sigalai sibara ka loinat zaitun. Ruania tularat nenda buaknia pulu eto,

²⁴ Sangasila kappot malaika nantania lima eto samba sangasila minca nantania lima eto, bailiu barania ka tutut kappo sara pat aili ka tutut kapponia ka sila nantania pulu eto.

²⁵ Kisedda leuet tularat kappo malaika sikarua nantania leu pulu eto. Karua tularat kappo malaika nenda makere le kirekat samba putubuatnia.

²⁶ Buak tularat kappo malaika siboiki pulu eto, kisedda leuet buak tularat kappo malaika sikarua.

²⁷ Karua tularat nenda tugalakngake sipabebebe ka Kudduat Bulat Sipunenan, bailiu sara tularat kappo sibara ka senen tularat nenda ibok rupi, samba kappo bagei aile pabobong katalagat kudduat nenda.

²⁸ Ruania tularat kerub nenda tulakkeki pasamba mas.

²⁹ Sangalionia rupit Uman Tuhan rubeiat ka baga samba ka uja tupalainge pasamba tularat malaika, paloina-loinat bai' samba senengamata sibotcot ogo.

³⁰ Bagat Uman Tuhan nenda sangalionia tulakkeki pasamba mas.

³¹ Ka matatbaliu gugurukat ka Kudduat Bulat Sipunenan nenda tuottotnake rua matatbaliu sigalai ka loinat zaitun. Arigit matatbaliunia silima tuddak.

³² Ka ruania matatbaliu nenda tupalainge tularat malaika, loinat bai samba senengamata sibotcot ogo. Matatbaliu, tularat malaika samba bai, sangamberinia tulakkeki pasamba mas.

³³ Ka matatbaliu gugurukat ka isit ka mataia, iate kudduat simalio tuottotnake laplap matatbaliu sibara ka loina zaitun putubuatnia siepat taiming sikere nanta.

³⁴ Tugalai leuet rua matatbaliu sibara ka loina pinilok simaturere, Karua matat baliu nenda momoi tulakkeake.

³⁵ Sangamberi matatbaliu nenda tupalainge pasamba tularat malaika, loinat bai samba senengamata sibotcot ogo. Sangamberi tularat nenda sibara lakket mas.

³⁶ Ka matat Uman Tuhan nenda tugalai pulaibokat ka baga. Laibokat nenda ibokkonia rupi sipalalakke; ka senen uddut telu ngalakke bukku, ai lakkenia pinilok Libanon.

³⁷ Bongen Uman Tuhan nenda tupaottot ka laggo Ziw, iate laggo sikarua, ka bagat rura sikaepat puparentaat Salomo.

³⁸ Samba ka laggo Bul, iate laggo sikabalu, ka bagat rura sikapulu sara puparentaatnia, kapplu Uman Tuhan nenda aigalainia si Salomo, kele siripot sitetreakenen. Pasigagalai Uman Tuhan nenda pitu ngarura burunia.