1Rim. 4 - BUKO SIPUNENAN

Sipugagalai ka purimataat Salomo

¹ Si Salomo aibailiuannia rimata ka sangaliot tobbou laggai Israel.

² Nene te sangamberi sipugagalai kapurimataat Salomo siabeu tiboi tubu sirioakenen Salomo: Azarya togat Zadok sibailiu imam;

³ Elihoref samba Ahia, tatogat Sisa sibailiu sipanunurat; Josafat togat Ahilud sibailiu sipasikeli pubulaganan;

⁴ Benaya togat Joyada sibailiu ute saladdu, si Zadok samba Abyatar sibailiu imam.

⁵ Azarya togat Natan sipasijago sautet lagga; si Zabut togat Natan, sara imam, sibailiu suruak rimata;

⁶ Ahisar sibailiu ute kudduat purimataat; Adoniram togat Abda sibailiu ute ka galajet roddi.

⁷ Si Salomo masirioake pulurua sautet laggai ka sangaliot tobbou laggai Israel. Galaiakenenda iate masiruruake komen addeat rimata samba sibabara ka kudduat purimataatnia sibara ka kupkumen pasikelietda senesenenda. Senen siuteake laggai pasailisaili le sia rapasikeli komen ka senen laggo kabagat sangarura.

⁸ Nene te oninda sautet laggai samba kupkumen laggai pasikelietda: si Ben-Hur ka leleu Efraim;

⁹ Ben-Deker ka Makas, ka Saalbim, ka Bet-Semes samba ka Elon-Bet-Hanan,

¹⁰ Ben-Hesed ka Arubot; kupkumennia iate Sokho samba sangaliot laggai Hefer;

¹¹ Ben-Abinadab, kupkumennia iate sangaliot polak leleu Dor, samba Tafat togat Salomo sibailiu sinanalepnia;

¹² Baana togat Ahilud kupkumennia iate Taanakh, Megido samba sangaliot Bet-Sean ka bebet Sartan ka bebet taggurat Jizreel, sibara ka Bet-Sean aili ka Abel-Mehola aili ka silat Jokmeam.

¹³ Ben-Geber ka Ramot-Gilead; kupkumennia iate Hawot-Jair ka Gilead; Jair iate togat Manasye kupkumen laggai Argob ka Basan, enem pulu laggai sabeu, sipuirip bukku samba silitengan matatbaliu tembaga;

¹⁴ Ahinadab togat Ido masikupkupake Mahanaim.

¹⁵ Ahimaas ka Naftali; nia leuet masiala sara togat Salomo sibailiu sinanalepnia, iate si Basmat.

¹⁶ Baana togat Husai ka Asyer samba ka Alot.

¹⁷ Lepa si Josafat togat Paruah ka Isakhar

¹⁸ samba si Simei togat Ela ka Benjamin.

¹⁹ Geber togat Uri ka laggai Gilead masikupkuake laggai Sihon, rimatatda tai Amori, samba laggai Og, rimatatda tai Basan; samba sarania utet laggai ka polak nenda.

²⁰ Tai Jehuda samba tai Israel igitda kele ngai ka bebet koat. Mukom, mulo samba leu muangka baga sia.

²¹ Iageti puparentanangan si Salomo ka sangamberi purimataat barania ka bagat oinan Efrat aili ka laggaira tai Filistin samba aili ka pasongan Misir. Kaurangan leu juran samba mariuriu ramareddet katubut Salomo burut purimanuaiatnia.

²² Komen sinarekngakenen katubut Salomo kabagat sangagogoi iate lima ngaribu liter tapung simakope eru samba pulu ngaribu liter tapung simatukle,

²³ pulu ngamuneng jaui simamo'mo samba rua pulu jaui sipuuja samba sangotu ngamuneng biribiri, ta'pei atuadde simatsura, samba pumauma,

²⁴ kalulut nia muparenta ka sangaliot laggai ka bebet bagat oinan Efrat, barania ka Tifsah aili ka Gaza, samba ka sangamberi rimata ka bebet oinan Efrat; sangaliot laggai maaban kateteret puparentaat Salomo,

²⁵ bailiu tai Jehuda samba tai Israel mukuddu sia ka bagat angkat baga, sene-senenda ka tei loinat anggur samba sileu barania ka Dan aili ka Bersyeba, ka burut purimanuaiat Salomo.

²⁶ Saladdut Salomo sipukukuro pulurua ngaribu sia samba epatpulu ngaribu geli kudduat sangamberi kuro sigirit keretania.

²⁷ Sautet laggai leuet masikau komen Rimata Salomo samba leu sia sipukokom pasambania ka kudduat purimataat. Senen sautet laggai nenda masiambit komen senen laggo sipasasaili, bailiu komenda taanai simagulai.

²⁸ Ka senen sautet laggai nenda masikau leuet gandum samba singitinan komen sangamberi kurot Salomo. Komen tarimeu nenda tuambit ka sangamberi gelit kuro siripot igit bairanenda.

²⁹ Taikamanua masikau katubut Salomo sikut patuat, samba puaagai simakope, samba leu puaagai kolou simakope.

³⁰ Sangamberi sirimanua sibara ka kabelaiat sulu pat aili ka Misir ta'anai siaili puaagai Rimata Salomo.

³¹ Bulat simakope agai ka sangamberi sirimanua le nia, sisaliu agai Etan tai Ezrahi, Heman, Kalkol samba Darda tatogat Mahol. Makakranangan onin Salomo ka sangamberi tobbou laggai sibokko purimataatnia.

³² Si Salomo masigalai telu ribu nganturat samba sangaribu legei urai sigalainia.

³³ Momoi ipupasikat pagalaiat loina samba sangambei siureman sibara ka loinat pinilok Libanon pat aili ka romot sipututu'tu ka bulak. Mupasikat leu nia pagalaiat sangamberi leiti, uma, samba leu pagalaiat iba.

³⁴ Iageti sangamberi sirimanua ka sangamberi bangsa moi masiarep sikut patuat Salomo, samba silonangan leu juran si Salomo sibara ka sangamberi rimata ka polak sipasiarep pagalaiat sikut patutatnia.