1Rim. 3 - BUKO SIPUNENAN

Panindogat Rimata Salomo itiddou sikut patuat

¹ Rimata Salomo ibailiu talikut Parao, rimata Misir. Ambitnangan sinanalepnia si Salomo ka Laggai David rapukuddu sedda teret lepa itugalai kudduat purimataatnia, uman Tuhan samba leu irip laggai Jerusalem.

² Kalulut kateteret nenda tapei atugalai Uman Tuhan, tai Israel aipei le rapangunguruatnake buluakenen ka senen-senen kudduat.

³ Si Salomo manuntu bagania katubut Tuhan samba itunake sangamberi enungan siteuakenen David, ukkuinia, tapoi aipeile nia masija'ja'ja samba masipanguruatnake tarimeu ka senen-senen kudduat.

⁴ Kudduat pasibuluat bulat sabeu ai ka Gibeon. Si Salomo mareirei masipanguruatnake buluakenen sedda. Ka sara gogoi, ei rimata sedda masipangurutake sangaribu tarimeu.

⁵ Soibot nenda leuet patoilanangan tubunia si Tuhan katubut Salomo ka pangamutet samba kuanangan, “Salomo, tiddou le apa kiddiet bagam akenenKu katubum!”

⁶ Aleginangannia si Salomo, “Tuhan, anupununtukingan baga ukkuiku si David, paguguletnu, mariuriu le eru, roipo samba topitnia katubum samba sibailiu toggaiat riuriu nupukatekinia baga, kaunungan katubunia sara toga simanteu sipupaparenta kineneigegt masisailiakenia.

⁷ Oto, Tuhan, Taikamanuangku, Ekeu le amasiuddetake aku ibaliu rimata masisailiake ukkuiku, kenanen poi bulat mabau peile tubukku samba ta kuagai kipa enungannia muparenta.

⁸ Kineneiget aiaku katalagat paamianNu, sara paamian sabeu, sitaioi tuadde iginia.

⁹ Lulut nenda, Tuhan, ake katubukku sikut patuat bule ioi kupaneinei paamianNu nene kabagat katuroipoat samba bule ioi kubaggeiake kaipa simaeru samba kaipa sikatai. Ke ta kisedda, kipa ioi kupaneinei paamianNu simigi sabeu nene?”

¹⁰ Maangka le bagat Tuhan ka sitiddou Salomo nenda

¹¹ samba kuanangan katubunia, “Kalulut anutiddou poi sikut patuat mupaneinei kabagat katuroipoat, ta burut puririmanua, pukayoatnu samba kamateiat sangamberit saggaknu,

¹² oto Kuake le geti sitiddounu nenda. Bailiuakekungan leu ekeu geti bulat simasiku patuat samba sisaliu puaagai bele peile puaagaira kasei pa, ele ka gogoi situsasabau samba leu ka gogoi sibabara.

¹³ Samba sitaititiddougetnu leuet Kuake leu geti katubum: pukayoat ele pubebeunan, bailiu kaburut purimanuaiatnu taanai berisara sirimanua kele ekeu katalagatda tai rimata.

¹⁴ Samba ke murimanua bai ekeu kele ukkuinu si David, mareddet katubukKu samba leu masitut sangamberi surukatKu, akekungan leu katubum burut puririmanua.”

¹⁵ Lepa tuge'genangan si Salomo samba againangannnia, Taikamanua le amanibo katubunia kabagat pangamutet. Iageti toilinia ka Jerusalem lepa purionangan ka matat Peti Pakerekat Baga Tuhan samba masipanguruatnake buluakenen rarangen samba buluakenen paabanan. Lepa geti baraakenangan punen addeat sangamberi sipugagalai ka uman purimataatnia.

Sikut patuat Salomo ka sara pakaroat

¹⁶ Ka sara gogoi, rua tainanalep simaolop tubu moi ka matat Rimata Salomo.

¹⁷ Kuanangan sara sinanalep, “Tuanku Rimata, aku samba sinanalep nene mukuddu sangalalep. Kateteret akupusule sinanalep nene ainia ka lalep nenda.

¹⁸ Telu ngagogoi sibabara pusulenangan leu ka sia sinanalep nene. Taanai sabagei ka lalep nenda, sarat ruamai le ka lalep nenda. Rua ngagogoi sikateitei sinanalep nene leuet masitu'tuake sara toga simanteu leuet.

¹⁹ Ka sara soibo kateteret ai katubut memerep, sinanalep nene kasitaipapaliket baga reddetnangan togania pat matei.

²⁰ Tengamoi, tusurunangan sinanalep nene, lepa alanangan togaku nenda kaunangannia ka peremannia, samba togania simamatei nenda akenangannia peremanku.

²¹ Simanseman, kele akutusuru samba kutottotnake togakku nenda, itsokungannia amateiatnia. Kele akupuleleknia, ta togakku nenda.”

²² Kuanangan leu sinanalep bagei, “Bokoi!” Sipuririmanua nene togaku, simamatei nenda togam!” Aleginangan sinanalep siboiki nenda, “Taa Simamatei nene togam sipuririmanua nenda togakku!” Kisedda te rapaukkle ka matat rimata.

²³ Lepa kuanangan Rimata Salomo, “Ka ruamui masikua: Toga sipuririmanua nene togaku samba simamatei nenda iate togam.”

²⁴ Lepat aikua kisedda rimata koiniakenangan sirimanua masiala lanjau. Lepa ambitrangan lanjau nenda ka matat rimata.

²⁵ Lepa kuanangan rimata, “Sila kam toga sipuririmanua nenda ibailiu rua ngarubeiat samba kaumuiannia katubutda patsangasila sia.”

²⁶ Masiarep parenta nenda, bulat inan toga sipuririmanua nenda masikua, “Bojoi Tuanku, bui' numateiake toga nenda. Kauan le katubunia.” Aikua nenda kopet nuntut bagania ka togania. Tapoi ina bagei nenda masikua bule ta ibailiu uktukku samba uktunu, sila le toga nenda!

²⁷ Iageti kuanangan si Salomo, “Bui' numateiake kam toga nenda! Kau le kam toga sipuririmanua nenda ka sinanalep nenda katubut iate inania.”

²⁸ Kele araarep nenda tai Israel, malotorangan katubut rimata kalulut kakauna Taikamanua sikut patuat katubut Salomo addeat masigalaiake katuroipoat.