1Rim. 22 - BUKO SIPUNENAN

Nabi Mikha masiparepdep si Ahab

¹ Telu ngarura burunia ta anai pasagganganda tai Israel samba tai Aram.

² Ka rura sikatelu, si Josafat rimata ka Jehuda mei masiailiake si Ahab Rimata Israel.

³ Kuanangan Ahab ka siabeu tiboi tubu, “Anuagaian kam, laggai Ramot ka Gilead nenda sita sibakkatnia! Angoian le ta taooppunia minca ka rimata Aram?”

⁴ Iageti kele aioi si Josafat, parerenangan si Ahab, “Noba leu taei simakere masisaggangi Ramot-Gilead?” Aleginangannia si Josafat, “Kauan maeru! Taei simakere tai saladdu samba saladduku sipukukuro patadde geti pasamba saladdum sipukukuro.

⁵ Tapoi simaerunia tarereake le boiki katubut Tuhan.”

⁶ Iageti ruruakenangan epat ngotu tai nabi si Ahab, lepa parerenangan katubutda, “Momoi leu pa kuei masisaggangi Ramot ele taa'?” Alegirangannia, “Momoi, si Tuhan masiake geti laggai nenda katubum.”

⁷ Tapoi parerenangan si Josafat minca, “Taan pa anai sara nabi sene sioi masirereake katubut Tuhan punutubutta?”

⁸ Aleginangannia si Ahab, “Ai peile sara, si Mikha togat Jimla. Tapoi malaga bagakku katubunia, kalulut ta pei anai pamoilianannia simaeru addeatku sarat sitaimaeru le.” Aleginangan si Josafat, “Ta' leu, bui' nukua kisedda!”

⁹ Iageti sogainangan sara sipugagalai ka kudduat purimataat si Ahab, lepa koiniakenangannia iei simaruei masisogai si Mikha.

¹⁰ Kateteret nenda si Ahab samba si Josafat, masileppeiake leppei pubebeunan, mukuddu ka udenan purimataat ka kudduat pasingitinan gandum ka ipot matatbaliu gugurukat Samaria, aiat sia tai nabi momoi masipatiboake samba masisegeake pamoiliananda.

¹¹ Ai sara sia katalagat tai nabi nenda, sipuoni si Zedekia togat Kenaana, masigalai paban-ban laba lepa, kuanangan katubut Ahab, “Nene te sikuat Tuhan, “Pasamba pabanban nene, ekeu masisukkaiake Aram samba masisappruake sia.” ”

¹² Sangamberi nabi sabagei masibulatake samba masikua, “Saggangingan Ramot-Gilead, aiakean kamanangan katubum.”

¹³ Ta'pei kele aisege sikoiniakenen nenda katubut Mikha, kuanangannia, “Sangamberi tai nabi sabagei arapoiliatan kamanangan addeat rimata. Bule ekeu leu masipoiliat simaeru kele sia.”

¹⁴ Tapoi aleginangan si Mikha, “Ka onin Tuhan sipuririmanua, sarat sikuat Tuhan katubukku le kukua katubum!”

¹⁵ Kele aisege si Mikha ka matat Ahab, parerenangan rimata, “Mikha, momoi leu aku samba Rimata Josafat mei masisaggangi Ramot, ele taa?” Aleginangannia si Mikha, “Saggangingan! Bulat tueedet te. Si Tuhan masiake kamanangan katubum.”

¹⁶ Aleginangan si Ahab, “Ke manibo ekeu ka onin Tuhan, kua le sibulatnia. Piga ngamincaat kuparepdep ekeu pagalaiat nenda?”

¹⁷ Aleginangan si Mikha, “Kuitco saladdut Israel masaragai ka sangamberi leleu. Kele biribiri le sia sita'anai sipasijajago, samba si Tuhan masikua pagalaiat sia, “Sia sirimanua nene ta anai siuteake sia. Eddangan ratoili ka lalepda kabagat aban.” ”

¹⁸ Lepa kuanangan si Ahab katubut Josafat, “Aisesengan sikuakku katubum? Ta'pei anai aipoiliat simaeru katubukku! Sarat sitaimaeru le!”

¹⁹ Kuanangan minca si Mikha, “Kineneiget arepmake apa sikuat Tuhan! Akuitco si Tuhan mukuddu ka uddenan purimataatNia ka manua, samba samalaikania murio kaikatoet samba katciuNia.

²⁰ Parerenangan si Tuhan, “Kasei masina'na geti si Ahab bule ioba mei pasaggak samba imatei ka Ramot ka Gilead?” Alegiatda samalaika nenda ta makere.”

²¹ Kalepakatnia bela sara ketsat. Legreakenangan tubunia katubut Tuhan samba kuanangan, ‘Aku le masinanania geti.’

²² Kuanangan si Tuhan, ‘Kipa enungannia?’ Aleginangan ketsat nenda, ‘Memei aku samba kugalai sangamberit nabi Ahab rapaboko.’ Kuanangan si Tuhan, ‘Maeru, galaiake le nenda, tuedet te nuna'nania.’ ”

²³ Kuanangan minca si Mikha, “Kauan, nenda te sipuaaili! Aigalaian si Tuhan tai nabim paboko katubum kalulut aiteuakean si Tuhan bule isaksakngake pugejaat baga katubum!”

²⁴ Iageti bela nabi Zedekia masilegreake tubunia katubut Mikha lepa lippatnangan bailatnia samba kuanangan, “Kaipa iooi Ketsat Tuhan masikaddiuake aku samba patibo katubum?”

²⁵ Aleginangan si Mikha, “Aile nuitco katutoilakatnia kateteret nutuguru' ka sara bilik pulippunan.”

²⁶ Kuanangan Rimata Ahab, “Laba kamnia! Samba ambit kamnia katubut Amon, utet laggai, samba katubut Joas, togat rimata.

²⁷ Koiniake kam sia masiguruakenia ka bagat tangsi, samba bui raigiake kan samba lo'nia teret kutoili kabagat aban.”

²⁸ Kuanangan si Mikha, “Ke Tuan toili kabagat aban, katukolobatnia, ta amanibo si Tuhan katubukku! Sangamberi siooi sene ibailiu sipasimumuneng.”

Kamateiat Ahab

²⁹ Lepa geti ei si Ahab rimatatda tai Israel, samba si Josafat rimata Jehuda masisaggangi laggai Ramot-Gilead.

³⁰ Kuanangan si Ahab katubut Josafar, “Aile kugalai tubuku kele ta aku kuoi pasaggak, tapoi ekeu geti leppeiake le leppei pubebeunan tiboi tubu.” Kisedda te aipakele tubunia Rimata Israel aiei pasaggak.

³¹ Kateteret nenda telu pulurua utet saladdu Aram sipukekereta pasaggak aiparentaakean sia rimatatda masisaggangi sarat rimata Israel.

³² Oto, kateteret araitco rimata Josafat, kabagatda le te nia rimata Israel, bailiu saggangirangania. Tapoi pugereinangan si Josafat,

³³ iageti agairangannia leuet, ta nia rimata Israel. Lepa ariakerangan masisagganginia.

³⁴ Sara saladdu katalagat saladdu Aram masipanaake siloguinia samba taanai iipoake ka bulat panaennia. Tapoi silogui sipanaakenennia nenda oraknangan si Ahab pukpuknangan patuppaijat leppei pasaggaknia. Iageti kuanangan ka simuriake kereta pasaggaknia, “Aiorakngan aku, olaake samba ambit aku bela kabagat pasaggangan nene!”

³⁵ Tapoi kalulut pasaggangan aile makokope oloi, Rimata Ahab aipeilenia muririo sisopo ka bagat keretania isaggangi saladdu Aram. Belanangan logau ka maujunia punemnemnangan kabagat kereta. Iageti ka soibokat matei si Ahab.

³⁶ Malegre ibele sulu sangamberi saladdut Israel tuparentaake toili ka laggai samba ka kupkumen laggaira sene-senenda,

³⁷ kalulut amateian rimata. Lepa toili sia samba rateiakerangan si Ahab ka Samaria.

³⁸ Aitupalilina keretania ka paot Samaria, sia tainanalep sigalai puoloman tubu ai sia murarau sedda, samba jo'jo masibolot logau Ahab ka kereta nenda. Kise te aipuaili kele sikuat Tuhan.

³⁹ Tiboinia bagei pagalaiat Rimata Ahab, pagalaiat kudduat purimataat sigalainia ka sikla samba sangamberi laggai sirioakenennia, atusuratnakean ka bagat buko pumumuan sangamberi Rimata Israel.

⁴⁰ Kele aitata' si Ahab, iageti togania, si Ahazia ibailiu rimata masisailiakenia.

Josafat, rimata Jehuda

⁴¹ Ka rura sikaepat puparentaat Ahab rimata Israel, si Josafat togat Asa ibailiu rimata ka Jehuda.

⁴² Kateteret nenda rurat Josafat telu pulu lima ngarurania. Aipuparenta ka Jerusalem rua pulu lima ngarura burunia. Inania iate si Azuba togat Silhi.

⁴³ Kele si Asa, ukkuinia, si Josafat masigalaiake simaeru obaket bagat Tuhan.

⁴⁴ Tapoi kudduat pasibuluat ka sabulungan ka sangamberi leleu ta aipakatai, bailiu aipeile rapangunguruatake buluakenen ka leleu nenda.

⁴⁵ Samba si Josafat murimanua ka bagat aban pasamba rimata Israel.

⁴⁶ Tiboinia bagei pagalaiat si Josafat samba gegenia ka kabagat pasaggangan, atusuratakean ka buko Pumumuan sangamberi rimata Jehuda.

⁴⁷ Samba sirimanua sipulelegei sigalaiake puoloman tubu kateteret si Asa, tataakenangannia ka kupkumen laggai nenda.

⁴⁸ Taanai rimata ka Edom, kalulut nenda sibailiu rimata iate siuteake laggai.

⁴⁹ Si Josafat masigalai kapa' Tarsis pasialat mas ka Ofir, tapoi kapa' nenda ta amuriuriu ituitui kalulut amakatai ka Ezion-Geber.

⁵⁰ Kateteret nenda si Ahazia, togat Ahab, masikua katubut Josafat: “Eddangan raei simakere sipugagalai ka kapa'ku sambatda sipugagalai ka kapat'nu, tapoi ta ioba si Josafat.

⁵¹ Iageti tata si Josafat samba rateiakerangannnia ka puariatda tai rimata ka Laggai David. Iageti togania si Joram masisailiakenia sibailiu rimata.

Si Ahazia, rimata Israel

⁵² Kabagat rura sikapulu pitu ka puparentaat rimata Josafat ka Jehuda, si Ahazia togat Ahab ibailiu rimata Israel samba puparentanangan ka Israel rua ngarura burunia.

⁵³ Si Ahazia masigalaiake jo ka matat Tuhan, itutake kele sigalai ukkui samba inania samba leu Rimata Jerobeam togat Nebat sibailiuake tai Israel masigalai jo.

⁵⁴ Buluijinangan sabulungan si Ahazia samba paguguletakenangan tubunia, bailiu baraakenangan golut Tuhan, Taikamanuan Israel, kele sigalaiakenen ukkuinia.