1Rim. 21 - BUKO SIPUNENAN

Monen anggur Nabot

¹ Legret kudduat purimataat Rimata Ahab ka Jizreel ai sangamata monen anggur sibakkatnia sara sirimanua sipuoni si Nabot.

² Ka sara gogoi kuanangan si Ahab katubut Nabot, “Akean le monen anggurnu nenda katubukku, aipoi monen nenda malegre ka kudduat purimataatku. Kuoba masipanguremi pagulei-gulei sedda. Kuaake te geti monen anggur simaeru peile sibailiu sailinia, ele ke nuoba, kusakina geti ka saki simateu.”

³ Aleginangan si Nabot, “Monen anggur nene sibara ka taikebbukatku. Ka onin Taikamanua, ta momoi kuakenia katubum!”

⁴ Ka ngoingoi baga samba ka golu kalulut aiarep sikuat Nabot katubunia. Toili si Ahab lepa perepnangan ka peremannia aiat ipipisikngake matania samba ta ioba mukom.

⁵ Ei si Izebel sinanalepnia katubunia samba rerenangannia, “Angoian le ta imamangka bagam? Angoi ta nuoba mukom?”

⁶ Aleginangannia si Ahab, “Ta' mangka bagakku katubut Nabot, tai Jizreel. Akutiddou katubunia bule isakiake monen anggurnia katubukku, ele kusailinia pasamba monen anggur bagei, ke nenda le simakiddi ka bagania, tapoi ta ioba!”

⁷ Aleginangan si Izebel, “Rimata ka Israel ekeu le! Suruakean ekeu kineneiget samba pukomman. Angkaake bagam, aipoi aku masiake geti monen anggur Nabot tai Jizreel nenda katubum!”

⁸ Iageti galainangan surat si Izebel ka onin Ahab samba kaunangan toggaiat rimata ka surat nenda. Kaunangan surat nenda katubut sangamberi saute samba sikebbukat laggai ka Jizreel.

⁹ Nene te ngangan surat nenda, “Paagai kam bule siberikabaga mupuaso samba koiniake kam sia raparuru! Ka bagat paailiat nenda kau kam katubut Nabot uddenan siabeu tiboi tubu.

¹⁰ Koiniake kam rua sia sikatai mukuddu masimattainia samba masisusunia aipoi aipateleijingan Taikamanua samba rimata. Lepa ambitmuiannia ka ulau laggai, samba baijukmuiannia bukku teret matei!”

¹¹ Galaiakerangan sikebbukat laggai samba sautet laggai Jizreel parentat Izebel.

¹² Paagairangannia bule siberikabaga mupuaso. Lepa geti koiniakerangan sia paruru samba si Nabot tukau kudduat siabeu tiboi tubu.

¹³ Rua sigalai sikatai mukuddu sipamamatai pasamba si Nabot, samba ka matat sirimanua simigi rasusunia aipateleiji Taikamanua samba rimata. Kalulut nenda tuambitnia ka ulau laggai lepa turibbai pasamba bukku teret matei.

¹⁴ Katuareman pagalaiat pasimamateiake si Nabot tusegeake katubut Izebel.

¹⁵ Ta' amauju lepat aisilo katuareman nenda si Izebel kuanangan katubut Ahab, “Si Nabot tai Jizreel nenda amateiannia. Kineneiget kenannan ala monen anggur nenda, sitaiobaketnia isakiake katubum.”

¹⁶ Ei si Ahab simaola masiala monen anggur nenda ibailiu bakkatnia.

¹⁷ Lepa kuanangan si Tuhan katubut Elia, nabi sibara ka Tisbe nenda,

¹⁸ “Si Ahab, rimata Samaria nenda kineneiget ai nia ka monen anggur Nabot iaala mone nenda ibakkatinia. Oto kenan le sedda,

¹⁹ samba segeake katubunia Aku, Tuhan masikua kisene, ‘Apamatei ekeu, samba masiraurau peile! Kalulut nenda logaunu ibobolot geti jo'jo ka kudduat aibolot jo'jo logau Nabot!’ ”

²⁰ Kele si Ahab masiitco si Elia, kuanangan, “Ale saggak, kalepakatnia aku leu nuaailiake!” Aleginangannia si Elia, “Bulatnia.” Kalulut anugalaiake sikatai ka muinet paatuat ka matat Tuhan,

²¹ iageti nene te sikuaNia si Tuhan katubum, “Kubabaraake te geti pugejaat baga katubum. Kukakaritnake te ekeu geti, samba senen sibaeu tiboi tubu ka Israel samba sigoiso tiboi tubu, Kusubuake le geti.

²² Muntogatnu ibailiu geti kele muntogat Rimata Jerobeam togat Nebat samba kele muntogat Rimata Baesa togat Ahia, kalulut anubailiuake tai Israel masigalai jo bailiunangan bara goluKu.”

²³ Samba pagalaiat si Izebel, si Tuhan masikua, ikokom te geti tubunia jojo ka ujat irip laggai Jizreel.

²⁴ Kasei katalagat laddou muntogatnu simamatei ka laggai ikom le jo'jo, samba simamatei ka ulau laggai ikokom le uma.”

²⁵ Ta'pei anai sirimanua ka muinet patuat masigalaiake sikatai ka matat Tuhan kele sigalaiakenennia si Ahab. Sangamberi pukakatai nenda igalaiakenia kalulut patubbuijat Izebel, sinanalepnia.

²⁶ Maigi aigalaiake jo sabeu si Ahab, ipanindogi buluat kele sigaiakenenda tai Amon iate sikeklet Tuhan sikuddu ka laggai nenda kateteret araguruki laggai nenda tai Israel.

²⁷ Kapplu aipanibo si Elia, biritnakenangan leppeinia si Ahab samba leppeiakenangan goni sibailiu toggaiat olei baga, lepa pupuasonangan. Kateteret merep leuet ileppeiake leuet goni, samba ke muenungnia simamoile.

²⁸ Kuanangan si Tuhan katubut nabi Elia tai Tisbe nenda,

²⁹ “Anuitcoan leu si Ahab masiepeake tubu ka mataKu? Kalulut nenda, ta Kubabaraake geti pugejaat baga, kateteret aipeilenia muririmanua. Kateteret togania geti baraakekungan pugejaat baga ka muntogatnia.”