1Rim. 2 - BUKO SIPUNENAN

Patonekat David sikateitei katubut Salomo

¹ Kateteret amalegrengan teteret purimanuaiatnia, si David masisogai si Salomo, togania, samba masikau sangamberi patonekatnia sikateitei. Kuanangan si David,

² “Iaailingan le teterenia ilango aku, oto kau imatonem bagam samba kau numagege.

³ Galaiake apa siparentaakenen Tuhan Taikamanuam katubum. Reddet sangamberi surukat samba sangamberi parentaNia sitususurat ka bukot Mose, bule kaipa le nuei mariuriu numauktuk ka senen galaiakenennu.

⁴ Ke mareddet ekeu katubut Tuhan, igagalaiake geti palelenganNia. Palelengannia nenda, iate: Sangamberi muntogatnu masiparenta geti Israel, ke sibulatnia mariuriu ragalaiake sangamberi parentaKu.

⁵ Samba leu minca anuagaian sigalaiakenen Joab, togat Zeruya, katubukku, aimateiake rua utet saladdut Israel, iate si Abner togat Ner samba si Amasa togat Jeter. Aimateiake sia kateteret simaaman addeat masilumunake pamamateira kateteret ka pasaggangan. Si Joab masimateiake sirimanua sitaigalai puseleat, tapoi kineneiget aku le masibairat samba masiorik sigalainia.

⁶ Kineneiget, togakku, buita nugalaiake katubunia siripot addeakenennu simaeru, sarat bui' nuobaake ilangonia ka enungan simateu.

⁷ Tapoi katubutda tatogat Barzilai sibara ka Gilead, buita nugalaiake simaeru katubutda. Buita nupasikeli purimanuaiatda senen gogoi, kalulut aragalaian simaeru katubukku kateteret akutuituiake tubukku ka kebbunu, katubut Absalom.

⁸ Pagalaiat si Simei togat Gera sibara ka laggai Bahurim ka kupkumen suku Benjamin, ai leuet patonekatku katubum. Ka puenungananku ka Mahanaim siburu, si Simei nenda masipateleiji aku simakope katai. Tapoi lepa geti, kateteteret aioi masiamiake aku ka bagat oinan Jordan, pusuppakungan katubunia ka onin Tuhan, ta kumamateiakenia.

⁹ Tapoi nene te patonekatku katubum: Bui' nuobaake ibela ka ukuman. Kuagai masiku patuatnu, oto kenanen poi amabaja'annia, besiake le bule tuukumnia ukum simateiakenen.”

Kamateiat David

¹⁰ Lepa geti matei si David samba turateiake ka Laggai David.

¹¹ Burut aipurimata ka Israel epat pulu ngarura, pitu ngarura ipukuddu ka Hebron, samba telu pulu telu ngarura ka Jerusalem.

¹² Lepa geti bailiu si Salomo rimata masisailiake si David, ukkuinia. Salomo samba purimataatnia bulat maron.

Kamateiat Adonia

¹³ Ka sara gogoi, ei si Adonia katubut Batsyeba. Parerenangan si Batsyeba katubut Adonia, “Kaooinu nene ka pupatuanan simaeru leu?” Aleginangan si Adonia, “Oo,”

¹⁴ Lepa kuanangan si Adonia, “Ai sara tiddogetku katubum ina.” Aleginangannia si Batsyeba, “Kauan, kuangan!”

¹⁵ Kuanangannia si Adonia, “Ina, nuagai aku te simateu ibailiu rimata, nenda arakatonemingan sangaliot Isarel. Tapoi amuaili geti iate bailoknia, aibailiu rimata iate bagikku, kalulut kisedda le poi siobat Tuhan.

¹⁶ Kineneiget ai sara tiddogetku, buita nusilo.”

¹⁷ Parerenangan si Batsyeba, “Apa tiddogetnu?” Kuanangan si Adonia, “Kutiddou, bule nusegeake katubut Rimata Salomo, iobaake kutalimouake si Abisag, siokko sibara ka Sunem nenda. Matonem bagakku isisilo le panindogatnu.”

¹⁸ Aleginangan si Batsyeba, “Kauan.” Kusesegeake te pagalaiat nenda katubut rimata.”

¹⁹ Iageti ei si Batsyeba katubut rimata masisegeake pagalaiat tidodget Adonia. Purionangan rimata masiamiake inania samba purekkuknangan kamatania, lepa pukuddunangan minca ka uddenan purimataatnia. Lepa geti koiniakenangan sirimanua masitarekngake korosi uddenan inania ka saigit kaikattoetnia.

²⁰ Lepa puutdetnangan si Batsyeba samba kuanangan, “Ai segeakenenku katubum. Kukatonemi buita nusilo.” Parerenangan si Salomo, “Apa nenda, Ina?” Kusisilo le.”

²¹ Aleginangan si Batsyeba, “Obaakean le kebbunu si Adonia italimouake si Abisag.”

²² Kuanangan si Salomo, “Angoian le nutitiddounia katubukku? Nenda makere le masitiddou bule kukau uddenan purimataat nene katubunia. Kebbuku te nia! Ia leuet minca Imam Abyatar samba si Joab masiroropnia!”

²³ Lepat aikua kisedda pusuppanangan si Salomo ka onin Tuhan, “Eddangan iorak aku pateleijat Tuhan, ke ta kuukum simateiakeneni si Adonia kalulut panindogatnia nenda!

²⁴ Ai ronakean si Tuhan pukukudduku ka uddenan purimataat ukkuiku, si David. Aigalaiakean palelengannia si Tuhan samba aiaakean purimataat nene katubukku samba ka sapunuteteuku. Musuppa aku ka onin Tuhan sipuririmanua: Gogogi nene leuet Si Adonia buita matei!”

²⁵ Iageti Rimata Salomo masikau parenta katubut Benaya, togat Joyada; lepa ei si Benaya masimateiake si Adonia.

Si Abyatar tuariake sibailiu imam samba si Joab matei

²⁶ Iageti kuanangan Rimata Salomo katubut Imam Abyatar, “Kenan ka laggai pututukat matam ka Anatot. Mateu tuukum ekeu ukum simateiakenen, tapoi gogoi nene ta kumamateiake ekeu, kalulut kateteret ai ekeu pasamba ukkuiku, anuorikngan leuet pangoringannia. Samba ekeu leuet amasipasikeli Peti Pakerekat Bagat Tuhan.”

²⁷ Lepa si Salomo masiariake si Abyatar sibailiu imam. Kisedda te isutake si Salomo sikuat Tuhan ka Silo pagalaiat sapunuteteu Imam Eli.

²⁸ Kele aiarepnia si Joab sangamberi sipuaaili nenda. Bailiu malotonangan kalulut mare'renia katubut Adonia. Tapoi, siburu ta mare'renia katubut Absalom. Iageti tuituinia iei ka Sapou Tuhan samba masiukkaake tu'tut kudduat pasibuluat.

²⁹ Katuareman nene tusegeake katubut Rimata Salomo. Iageti rimata masikoiniake si Benaya masimateiake si Joab.

³⁰ Lepa ei si Benaya ka Sapou Tuhan kuanangan katubut Joab, “Aikua rimata belaake ekeu sedda!” Aleginangan si Joab, “Taa'. Sene le kuoba matei.” Lepa toili si Benaya samba segeakenangan pagalaiat nenda katubut rimata.

³¹ Masiarep nenda kuanangan rimata, “Kenannan samba galaiakeat apa sikuania nenda. Mateiake samba rateiakenia, bule aku samba sapunuteteu ukkuiku taan masibabairat sangamberi pamamatei sigalaiakenen Joab katubut sirimanua sita'anai sele.

³² Iukumake le geti nia si Tuhan kalulut pamamatei sigalaiakenennia sitaiagaiet ukkuiku. Si Abner togat Ner utet saladdut Israel, samba si Amasa togat Jeter utet saladdut Jehuda, ruatda ta anai aragalai sele. Sia pei leu maeru bele peile katubut Joab, tapoi aimateiake le sia.

³³ Ukuman kalulut kamateiat rua utet saladdu nenda masibabairat geti iate si Joab le samba sapunuteteunia teret buru-buru. Tapoi sangamberi sapunuteteu ukkuiku sibailiu rimata, mariuriu le ipanukani sia Tuhan teret buruburu.”

³⁴ Iageti ei si Benaya ka Sapou Tuhan samba masimateiake si Joab sedda. Lepa si Joab turateiake ka lalepnia ka bebet laggai.

³⁵ Lepa geti rimata masirioake si Benaya togat Joyada ibailiu utet saladdu masisailiake si Joab, samba rioakenangan si Zadok ibailiu imam masisailiake si Abyatar.

Kamateiat Simei

³⁶ Lepat nenda rimata masisogai si Simei samba kuanangan katubunia, “Galaiat lalepnu ka Jerusalem nene. Kuddu ekeu samba bui' nubela sedda.

³⁷ Ke bela bai ekeu sedda samba nutalipoki bagat oinan Kidron, buita tumateiake ekeu, samba saram le masibabairat puseleat nenda.”

³⁸ Aleginangan si Simei, “Maeruat Tuanku Rimata, kureddet le geti parentat Tuanku.” Iageti kuddu si Simei ka Jerusalem piga lepa ujunia.

³⁹ Kapplu telu ngarura, rua sia pagugulet Simei mutuitui ka Gat, katubut Rimata Akhis togat Maakha. Kateteret tupaagai pagalaiat nenda katubut Simei, patareknangan tubunia,

⁴⁰ kaunangan apot teitei kalideinia lepa ei nia katubut Rimata Akhis ka Gat masigaba rua paguguletnia nenda. Sesenangan sia lepa ambitnangan sia toili.

⁴¹ Kele aiarep si Salomo apa sigalaiakenen Simei,

⁴² iageti koiniakenangan sia rimata masisogai si Simei samba kuanangan kamatania, “Amusuppangan ekeu ka onin Tuhan, ta nukakaddiuake Jerusalem. Samba akuparepdepan ekeu, ke bela ekeu ka Jerusalem, buita matei ekeu.

⁴³ Oto anuobaan masireddet parentaku nenda. Tapoi kineneiget angoi nupasabau palelengan nenda samba parentaku?

⁴⁴ Bulat nuagai le sangamberinia katainu katubut ukkuiku. Lulut nenda iukum le geti ekeu si Tuhan,

⁴⁵ tapoi aku samba purimataat ukkuiku ipanukani le si Tuhan teret buru-buru.”

⁴⁶ Lepat aikua kisedda, kaunangan parenta rimata katubut Benaya togat Joyada masimateiake si Simei, iageti ei si Benaya mateiakenangan si Simei. Kineneiget makopenangan purimataat Salomo.