1Rim. 19 - BUKO SIPUNENAN

Si Elia ka leleu Sinai

¹ Tiboinangan Ahab katubut Izebel sinanalepnia, sangamberi sigalaiakenen Elia, kisedda leuet kipa si Elia aimateiake sangamberi nabi sabulungan pasamba lanjau.

² Iageti koiniakenangan pakoiniennia si Izebel mei katubut Elia masikua, “Bule sabulungan masiukum, ele masimateiake aku, ke ka mansepnia kele tetere nene, ta kugalaiake mansep katubum kele sigalaiakenennu ka tai nabi sabulungan nenda.”

³ Lepa malotonangan si Elia samba tuituinia bule bui imateiakenia. Einia pasamba sipuukunia ka Bersyeba ka Jehuda. Sedda kaddiuakenangan sipuukunia nenda,

⁴ lepa pusilanangan ka simatangeu burunia sangagogoi samba puarinangan leu ka tei sara loina sabeu samba kiddinangan matei. Kuanangan katubut Tuhan, “Ta'an amoi katubukku, Tuhan. Alaan le engangku. Kalulut ta leu masaliu topitku bele pei ka taikebbukatku!”

⁵ Lepa perepnia ka tei loina nenda samba laulaunangannia. Sinulut rapenangan nia sara malaika samba kuanangan, “Suruake ekeu Elia, pukom!”

⁶ Kele aiitco si Elia kabebenia, itconangan kabebet utenia sangajaja roti samba lalaisu sibara oinan kabagania. Pukomnangan samba pulonangan leuet, lepa perepnia minca.

⁷ Tapoi sikarua ngamincania moi malaikat Tuhan masirapenia samba kuanangan, “Suru Elia, pukom, bule imaron tubum nusilaiji ka simareunan.”

⁸ Tusurunangan si Elia, lepa pukomnangan samba mulo'. Iageti maronnangan tubunia samba momoi ipusila epat pulu ngagogoi samba epat pulu ngasoibo burunia ka leleu Sinai, kudduat aipatoila tubunia Taikamanua.

⁹ Sedda pugogoinangan si Elia ka bagat ngaliu. Lepa kuanangan si Tuhan katubunia, “Elia, apa nugagalai sene?”

¹⁰ Aleginangannia si Elia, “Oi Tuhan, Taikamanua Sipulugege, pugagalaiku sarat katubum le. Tapoi paamian Israel masipasabau palelenganda pasamba Ekeu. Bukkatakerangan sangamberi kudduat pasibuluatNu samba masipamatei tai nabim pasamba lanjau. Sarat sarakkungan le amulegei, samba kineneiget raoba masimateiake aku!”

¹¹ Kuanangan si Tuhan katubunia, “Belaake ekeu ka ngaliu nenda, samba purio kamatakKu ka uddut leleu.” Kepei tusabau si Tuhan, amuboikian rusa simakope ron pat masilanangan sangamberi tinambu samba sangamberi leleu bukku ragat. Tapoi ta ipatoila tubunia Tuhan ka rusa nenda. Lepat aimalebak rusa nenda, bara ngeungeu polak, tapoi ka ngeungeu polak nenda leuet ta aipatoila tubunia si Tuhan.

¹² Iageti bara obengan, tapoi si Tuhan leuet ta anai Nia ka obengan nenda. Kapplu obengan nenda maarepnangan ngangan rusa sipuboboroi simamoile.

¹³ Kateteret aiarep si Elia nganga nenda, tabbonangan matania pasamba jubania, lepa belania samba murio ka matat ngaliu nenda. Iageti arepnangan nganga sipasikukua, “Elia apa nugagalai sene?”

¹⁴ Aleginangannia si Elia, “Oi Tuhan, Taikamanua Sipulugege, pugagalaiku sarat katubum le. Tapoi paamian Israel masipasabau palelenganda pasamba Ekeu. Araragat sangamberi kudduat pasibuluatNu samba masipamatei tai nabim pasamba lanjau. Sarat sarakkungan le sipulelegei, samba kineneiget raoba masimateiake aku!”

¹⁵ Kuanangan si Tuhan, “Toiliake ekeu ka simatangeu legret Damsyik! Lepa ei ekeu ka laggai samba uruakenungan tula ka utet Hazael sibailiu toggaiat aiturioakenia murimata ka Aram.

¹⁶ Galaiake leu kisedda katubut Jehu, punuteteu Nimsi, bule ibaliunia Rimata Israel, samba katubut Elisa togat Safat sibara ka Abel-Mehola, bule ibailiunia nabi masisailiake ekeu.

¹⁷ Kasei ta aimateiake si Hazael, mateiakenangan sia si Jehu, samba sia sibebela katubut Jehu mateiakenangan sia si Elisa.

¹⁸ Tapoi si pitu ngaribu tai Israel Kuarauake geti sia, iate sangamberi sirimamnua simariuriu mutopit katubukKu samba bulat ta arapanindogi tularat sabulungan ele rasigguknia.”

Si Tuhan masipili si Elisa

¹⁹ Iageti tuitui si Elia samba ailinangan si Elisa togat Safat ainia masikukuilu. Ai pulu rua ngarara jaui ka matania, senen rara ai parurua ngamuneng, samba si Elisa masikuilu pasamba jaui sipararara sikateitei. Kele aitusabau si Elia ka bebet Elisa, goloknangan jubania si Elia samba kaunangannia katubut Elisa.

²⁰ Iageti kaddiuakenangan sangamberi jauinia si Elisa samba pabalaunangan masikukru si Elia, samba leu kuanangan, “Obaake le aku kuei masisegeake tubu ka saeppuku lepa geti tutkungan ekeu.” Aleginangan si Elia, “Kauan. Ta' kukekera ekeu, tapoi repdep le apa sigaaiakenenku katubum.”

²¹ Iageti toili si Elisa ka monenia, lepa ja'janangan sangamberi jauinia nenda. Loina pasikuilunia kaunangannia sibailiu loinat pasiseu akkulat sangamberi jaui nenda. Lepa geti parubeinangan akkula nenda katubutda sapaguguletnia samba komrangan leunia. Kapplu nenda ei si Elisa masitut si Elia samba bailiunangannia sipasiroropnia.