1Rim. 18 - BUKO SIPUNENAN

Elia samba si Obaja

¹ Pasat piga pa burunia, ka rura sikatelu teteret legeu nenda kuanangan si Tuhan katubut Elia, “Kenan nusegeake katubut Rimata Ahab, ta'an mabuburu Kubeleake urat.”

² Iageti tuitui si Elia. Kateteret nenda pulajeat amakopen katai ka Samaria.

³ Kalulut nenda si Ahab masisogai si Obaja bule ioi rapatibo. (Si Obaja iate utet kudduat uma purimataat. Si Obaja iate sara sirimanua bulat simasuru katubut Tuhan.

⁴ Kateteret si Izebel masimateiake tai nabit Tuhan, si Obaja nene masiropmake sangotu sia tai nabi, lepa lipputnakenangan sia ka bagat ngaliu. Kabagat sara ngaliu lima pulu sia, samba leu ikau komen samba lo'ra.)

⁵ Kuanangan si Ahab katubut Obaja, “Mei sita masigejengi sangaliot tobbou laggai nene masigaba bubuakat samba bagat oinan. Bule taaili parou ka enungan bule tapakom kuro samba bagalta, bailiu taan tumamateiake beri sangamuneng tarimeuta.”

⁶ Kele ailepa ararubei kupkumen laggai gejengienda nenda, tuituirangan leuet. Si Ahab ka sara ipokat, tapoi si Obaja ka ipokat bagei.

⁷ Ka tengan enungan paailirangan si Obaja samba si Elia. Kele aiagai kolou si Obaja aiaili nenda iate si Elia, purekkuknangan lepa parerenangan, “Bulatnia leu ekeu nene Tuanku Elia?”

⁸ Aleginangannia si Elia, “Bulatnia, aku nene si Elia. Kineneiget kenan le katubut Tuannu nusegeake, ai aku sene.”

⁹ Aleginangan si Obaja, “Aponia selekku bailiunangan nuoba masisegeake paguguletnu nene katubut Ahab bule imateiake aku?

¹⁰ Ka onin Tuhan, Taikamanuam sipuririmanua, bulatnia te ta anai tobbou laggai ele purimataat, ta araailiake sapakoinien Tuanku Ahab masigaba ekeu. Samba ke rakua bai sirimanua: Ta anai nia sene, koiniakenangan sia sikuddu ka tobbou laggai samba purimataat musuppa, bulatnia ta anai ekeu sedda.

¹¹ Tapoi kineneiget nukua: Kenan nusegeake katubut Tuannu: Si Elia ainia sene.

¹² Ele muaili kisene, ke mutuitui bai aku sene, kuruk teiteiku akkatnakenangan ekeu Ketsat Tuhan baram sene ka kudduat sitaiaagaijetku! Ke sege bai aku katubut Ahab kupaagai kababaram sene, lepa oinia, tapoi ta anai ekeu, mateiakenangan leu aku. Ta pa anuagaian aku nene simaloto katubut Tuhan le, baranangan ka sigoiso peile aku.

¹³ Ta'pei pa anuarep, kateteret si Izebel masimateiake tai nabit Tuhan, lipputnakekungan sangotu tai nabi ka ngaliu, kabagat sara ngaliu lima pulu sia samba leu kukau komen samba lo'ra?

¹⁴ Kineneiget, angoi nukua: Segeake katubut Tuannu, si Elia ainia sene! Bulat imamateiake te aku!”

¹⁵ Aleginangannia si Elia, “Ka onin Tuhan Sipulugege puukuketku, bulatnia ka gogoi nene leuet kupatoila tubuku katubunia.”

Si Elia samba tai nabi sabulungan

¹⁶ Iageti ei si Obaja masiailiake si Ahab samba masisegeake sangamberi sikuat Elia. Iageti ei si Ahab masiailiake si Elia.

¹⁷ Kateteret si Ahab aiitco si Elia, kuanangan katubut Elia, “Ekeu leu nenda, sibaraake pugejaat baga ka Israel?”

¹⁸ Aleginangannia si Elia, “Ta' aku sibaraake pugejaat baga nenda, tapoi ekeu le samba saeppum. Kalulut anupanindogi sabulungan, samba anupasabau sangamberi parentat Tuhan.

¹⁹ Kalulut nenda, parentaake sangamberi tai Israel kupaaili katubut ka leleu Karmel. Ambit leuet si epat ngotu lima pulu nabi sabulungan samba si epat ngotu nabi Asyera sabulungan sinanalep nenda sabulungan sinanalepnu, si Izebel!”

²⁰ Iageti si Ahab masikoiniake sangamberi tai Israel samba tai nabi sabulungan paruru ka leleu Karmel.

²¹ Lepa legreakenangan tubunia si Elia ka siberikabaga nenda kuanangan, “Pigangan le burunia nuoba mariuriu murua paatuat? Ke Tuhan nenda bulat Taikamanua, panindogi kamnia! Ke sabulungan nenda bulat Taikamanua, panindogi kamnia!” Siberikabaga siparururu sedda tenan le sia mutangeu.

²² Lepa geti kuanangan si Elia, “Katalagat sangamberi nabit Tuhan sarat akungan le amulegei, tapoi sene ai epat ngotu lima pulu nabi sabulungan.

²³ Kineneiget ambit kam sene rua ngamuneng jaui simanteu. Koiniake tai nabi sabulungan nenda masiala sangamuneng samba jajarangannia, pate'terangannia, lepa galakngakerangannia ka uddut loina paneu. Tapoi bui' raobekngake obengan sedda. Kaku leuet kupatarek sangamuneng jaui. Ja'jakungannia samba pate'tekungannia samba leu masipagalakake ka uddut loina paneu. Tapoi ta kuobekake obengan sedda.

²⁴ Eddangan rapanindou nabi sabulungan nenda katubut sabulunganda, samba aku leu manindou katubut Tuhan. Oto taikamanua sipasiarep panindogat pasamba obengan, Nia te Taikamanua.” Sangamberi siberikabaga masialegi ka nganga sabeu, “Maeru le kisedda!”

²⁵ Lepa kuanangan si Elia ka tai nabi sabulungan nenda, “Kalulut maigi kam, konan kam boiki masipili jaui, samba patarekmuiannia, tapoi bui' nuobekngake kam obengan ka loina nenda. Lepat nenda panindoumuian ka taikamanuamui.”

²⁶ Iageti alarangan sangamuneng jaui samba patarekrangannia. Kapplu nenda panindourangan katubut sabulungan barania simancep pat aili sinago, sialei masigereiake, “Alegingan katubut sabulungan!” Ragalaiake nenda sialei muturu simariuriu sibokko kudduat pasibuluatda. Tapoi ta'anai alegiat beri goiso.

²⁷ Kateteret tugge sulu taddaakenangan si Elia masigeigei sia, “Panindou kam simaron peile! Ta pa nia taikamanua? Ele ainia mupatuat, ele ainia ka bebe. Ele ai le nia mugejek! Ele ai le nia merep, oto geugeu le kamnia bule itusuru.”

²⁸ Tai nabi nenda panindourangan simakope ron peile. Samba kele simatukle ragalaiake, pagoronirangan tubutda lanjau samba simuinebakkat pat pugoroknangan logau katubutda.

²⁹ Kisedda te aragalai pat aili kasoibokat, pat kele sirimanua simasaileu. Tapoi taanai sipasiaalegi.

³⁰ Lepa kuanangan si Elia katubutda sangamberi siberikabaga nenda, “Konan legreake kam tubumui!” Parururangan sangamberitda bokkorangannia, lepa geti taddaakenangan masipaeru kudduat pasibuluat Tuhan simararagat.

³¹ Alanangan pulu rua bukku, senen sara bukku ibailiu punutubut sara suku ka sipulu rua suku muntogat Jakob, iate Israel, siripot oni sikau Tuhan katubunia.

³² Ka sangamberi bukku nenda galainangan kudduat pasibuluat katubut Tuhan. Galainangan leu sopak sipasese beunan sibokko kudduat pasibuluat nenda, bailiu momoi tukau kabagania pulu lima ngaliter oinan.

³³ Pagalaknangan loina paneu ka uddut kudduat pasibuluat, lepa sangamuneng jaui sipatetenia nenda galakakenangannia ka uddut loina nenda.

³⁴ Lepa geti kuanangannia, “Kau kam epat ngalalaisu oinan pat sun, lepa subuiakemuian oinan nenda ka uddut panguruat buluakenen samba loina nenda.” Kapplu aragalaiake nenda, kuanangannia, “Aipei sangaminca.” Lepa galaiakerangannia. Kuanangan si Elia, “Aipei leu sangaminca,” samba galaiakerangannia sikatelunia.

³⁵ Iageti puguruknangan oinan sangaliot kudduat pasibuluat nenda bailiu sopak nenda sun le oinan.

³⁶ Kele aiaili teteret masipanguruatnake buluakenen ka soibokat, legreakenangan tubunia si nabi Elia ka kudduat pasibuluat nenda lepa panindounangan, “Oi Tuhan, Taikamanua panindogiet Abraham, Ishak samba Jakob, patoila le kineneiget, Ekeu le Taikamanua ka Israel, samba aku paguguletNu. Patoila leuet, sangamberi sigalaiakenenku nene iate kalulut parentam.

³⁷ Alegingan, Tuhan! Alegingan aku bule raagainia siberikabaga, Ekeu le Tuhan Taikamanua, samba Ekeu le masigalai rabauake patutatda.

³⁸ Lepa akenangan obengan si Tuhan sibara ka manua samba labonangan imakasak buluakenen, loina, sangamberi bukku, polak samba leu oinan ka sopak nenda sappru aijalainia.

³⁹ Kateteret araitconia siberikabaga pagalaiat nenda purekkukrangan ka polak kuarangan, “Tuhan nenda Taikamanua! Bulatnia le Tuhan nenda Taikamanua!”

⁴⁰ Iageti kuanangan si Elia katubutda, “Laba kam tai nabi sabulungan nenda! Bui' nuobaake kam ibara sara sibebela!” Iageti siberikabaga nenda masilaba tai nabi sabulungan nenda, lepa ambitnangan sia si Elia ka bagat oinan Kison samba pajajakinangan sia sedda.

⁴¹ Kapplu nenda kuanangan si Elia katubut Ahab, “Kineneiget kenannan mukom samba mulo! Ta'an mauuju iake urat, aipoi goknia amaarepman.”

⁴² Lepa ei si Ahab mukom, tapoi si Elia tatrania ka uddut leleu Karmel, sedda panindounangan samba purekkuknangan pat aili polak samba utenia aili ka paoggangan bokklonia.

⁴³ Kuanangan ka sipuukunia, “Tatraake ekeu samba itco ka ipot koat.” Panatrangan sipuukunia nenda, lepa toilinia samba kuanangan, “Ta'anai apapa akuitco.” Kuanangan si Elia, “Kenan aipei sangaminca.” Kisedda te aigalaiake pat aili pitu ngaminca.

⁴⁴ Ka sikapitungamincania aitoili sipuukunia nenda samba kuanangan, “Akuitco tanai rusa beunan takep moi sibara ka koat.” Iageti kuanangan si Elia ka sipuukunia, “Kenan ka Ahab, koiniakenia itusakai ka keretania samba itugorosot barania ka leleu bule bui isailania urat.”

⁴⁵ Ka bagat sangapeipeikat mata magepgepnangan manua, akenangan rusa simaron, samba leu urat simatirit leu taddanangan ibele. Sakai si Ahab ka keretania lepa einia ka Jizreel.

⁴⁶ Kateteret nenda si Elia bara puroronnia sibara katubut Tuhan. Purutakenangan jubania samba appraakenangannia ka pukabekatnia lepa pabalaunangan ipuboiki katubut Ahab ka sanganantat enungan pat aili ka matatbaliu gugurukat laggai Jizreel.