1Rim. 17 - BUKO SIPUNENAN

Elia samba legeu simakope buru

¹ Ai sara nabi sipuoni Elia sibara ka Tisbe, sara laggai ka kupkumen laggai Gilead. Ka sara gogoi einia ka Rimata Ahab samba kuanangan, “Ka onin Tuhan Sipuririmanua, Taikamanua panindogietda tai Israel samba pasikelietku, kupaagainia katubum, kabagat piga ngarura pa sibabara taan babara tinobut samba urat beri goiso, teret kukuania minca.”

² Kapplu nenda kuanangan si Tuhan katubut Elia,

³ “Kaddiuake le kudduat nene, puenung ka isit sikalaut samba pulipput ka bebet bagat oinan kerit ka isit sikalaut bagat oinan Jordan.

⁴ Momoi nupulo ka rubat bagat oinan nenda, samba aile Kukoiniake uma kailea masiambit komennu.”

⁵ Tutnakenangan si Elia parentat Tuhan nenda, samba mei nia ka rubat bagat oinan Kerit samba kuddunia sedda.

⁶ Pulonangan ka rubat bagat oinan nenda, samba mukom roti samba akkula siambit sangamberi uma kailea senen simancep samba senen ka soibokat.

⁷ Tapoi piga pa burunia, magaraknangan rubat bagat oinan nenda kalulut ta anai urat ka laggai nenda.

Elia samba silumang ka Sarfat

⁸ Lepa geti kuanangan si Tuhan katubut Elia,

⁹ “Kineneiget buita mei ekeu ka laggai Sarfat, ka bebet Sidon samba pukuddu sedda. Aku koiniakean sara silumang sedda bule nia masiake komen katubum.”

¹⁰ Iageti ei si Elia ka Sarfat. Kele isege ka matatbaliu laggai nenda, itconangan sara silumang airururuake loina paneu. Lepa kuanangan si Elia katubut silumang nenda, “Ropmake pei nuala oinan goiso lo'ku.”

¹¹ Kateteret ai mueenung silumang nenda masiala oinan lo nenda, pusoganangan si Elia, “Ambit leuet sangajaja.”

¹² Aleginangan si lumang nenda, “Ka onin Tuhan sipuririmanua, Taikamanua panindogietnu, bulatnia, kaku ta anai roti. Tapoi sangarakkut tapung terigu ka bagat mangkok, samba goiso tulat zaitun ka bagat bulibuli. Aiaku masirururuake loina paneu masiseu tapung sangarakkut nenda, bule kupukom katubut togaku.” Sarat nenean le komenmai, lepa nenda katubut masingena matean le.”

¹³ Kuanangan si Elia katubunia, “Bui' makarat bagam! Galaian komenmui ruamui togam. Tapoi kepei nugalai komenmui, galai le boiki sara roti sangajaja sibara ka tapung samba tula nenda, samba ambitnungannia sene.

¹⁴ Aipoi si Tuhan, Taikamanua panindogietda tai Israel, masikua: Ta sasappru tapung kudduatnia nenda samba tula kabagat bulibuli ta ibebeleki, teret iake urat si Tuhan ka polak.”

¹⁵ Lepa ei silumang nenda masigalaiake sikuat Elia. Iageti ka telutda nenda bara komenda piga pa burunia.

¹⁶ Tapung ka kudduatnia ta sasappru samba tula ka bulibuli nenda ta ibebeleki kabagania kele sikuat Tuhan sisegeakenenNia katubut Elia.

¹⁷ Piga pa burunia atusabau bara besit togat silumang nenda. Mabuburu makokope le katai besi'nia toga nenda bailiu tata'nia.

¹⁸ Lepa kuanangan si lumang nenda katubut Elia, “Ale, pagugulet Taikamanua, aponia nuala sene? Ta' leu pa kaooinu sene aibailiu irepdep joku Taikamanua, bailiu matei togakku?”

¹⁹ Aleginangannia si Elia, “Ambitnia togam nenda sene.” Lepa alanangan toga simanteu nenda si Elia ka inania samba ambitnangannia ka bilik kapata ka kudduat Elia. Perepmakenangan toga nenda si Elia ka uddut pereman,

²⁰ lepa panindounangan pasamba nganga sabeu, “Oi Tuhan, Taikamanuangku angoian le Nuake kamateiat nene katubut silumang nene? Aiakean kudduat kaku samba kineneiget anumateiakean togania!”

²¹ Lepa nenda telu ngaminca si Elia ipurappo ka uddut toga nenda ai nia maninindou, “Oi Tuhan, Taikamanuangku, rimanuake le toga nene!”

²² Si Tuhan masiarepmake panindogat Elia, taddanangan ipuenga toga nenda samba purimanuanangan minca.

²³ Lepa gorosot si Elia ka biliknia aiat iambit toga nenda ka inania samba kuanangan, “Aikoi togam ina! Amurimanuangannia minca!”

²⁴ Kuanangan si Lumang nenda, “Kineneiget akuagaian, ekeu nene iate pagugulet Taikamanua samba tiboietnu bulat sibulatnia sibara katubut Tuhan!”