1Rim. 16 - BUKO SIPUNENAN

¹ Iageti panibonangan si Tuhan katubut Jehu togat Hanani, kuanangannia, “Segeake katubut Baesa patonekatKu nene,

² ‘Siboiki ta anai tiboi tubum apapa, tapoi Aku masiuddetnake ekeu ibailiu ute ka paamianKu Israel. Kineneiget anugalaian jo kele si Jerobeam samba sibailiuake paamianKu Israel masigalai jo, bailiu nene te sibaraake goluKu.

³ Kalulut nenda Kusubuake le ekeu samba muntogatnu makere kele sigalaiakenenKu katubut Jerobeam, togat Nebat.

⁴ Laddou muntogatnu simamatei ka laggai, jojo masikokom sia, samba simamatei ka ujat laggai, uma' masikokom sia. Repdem, Tuhan amasikua!’ ”

⁵ Tiboinia bagei pagalaiat si Baesa samba sangamberi sigalaiakenennia, gegenia pasaggak, sangamberi atusuratan ka buko Pumumuan pagalaiat rimata Israel.

⁶ Iageti tata' si Baesa lepe turateiake ka Tirza. Si Ela togania, masisailiakenia ibailiu rimata.

⁷ Patonekat Tuhan segeakenangannia si Jehu togat Hanani katubut Baesa samba muntogatnia kalulut si Baesa aigalaiakean sikatai ka matat Tuhan, bailiu si Baesa masibaraake pugolukat Tuhan, kele si Jerobeam, ta leu sarat kalulut aipamatei sangamberi muntogat Jerobeam. Tiboinia bagei pagalaiat si Baesa, samba leu gegenia pasaggak samba ron pupaatuanannia atusuratnan ka buko Pumumuan pagalaiat rimata Israel.

Ela, rimata Israel

⁸ Ka rura si karua puluenem puparentaat Rimata Asa ka Jehuda, si Ela togat Baesa murimata ka Israel. Ipupaparenta ka Tirza rua ngarura burunia.

⁹ Si Zimri, sara utet saladdu siuteake iletalaga saladdu sipukekereta, mukere baga masisaggangi si Ela. Ka sara gogoi pulonangan si Ela Tirza, pat puineng ka lalep Arza, ute kudduat uma purimataat rimata.

¹⁰ Lepa tugurunangan si Zimri samba mateiakenangan si Ela, lepa geti purimatanangan masisailiake si Ela. Aipuaili nenda ka rura si karua pulupitu puparentaat Rimata Asa ka Jehuda.

¹¹ Ta'pei amaburu aipurimata, mateiakenangan sangamberi muntogat Rimata Baesa. Beringan saepput Baesa taimanteu, sangamberi saaleinia samba leu muntogatnia ta anai berisara sibebela.

¹² Siripot sikuat Tuhan ka pagalaiat si Baesa sisege ka Nabi Jehu, sangamberi muntogat Baesa tumamateiake.

¹³ Si Baesa samba si Ela, togania, masibuluiji sangamberi sabulungan sitakatukolobat samba sibailiuake tai Israel masigalai jo. Kalulut nenda te aibara golut Tuhan, Taikamanua panindogietda tai Israel.

¹⁴ Tiboinia bagei pagalaiat si Ela atusuratnan ka buko Pumumuan pagalaiat rimata Israel.

Zimri, rimata Israel

¹⁵ Ka rura si karua pulu pitu puparentaat Rimata Asa ka Jehuda, purimatanangan si Zimri ka Israel, samba aipupaparenta ka Tirza burunia pitu ngagogoi. Kateteret nenda saladdut Israel ai sia masialou laggai Gibeton, laggaira tai Filistin.

¹⁶ Kateteret araarepnia, si Zimri amakerean bagatda masisaggangi rimata samba aramateiakeannia, ka gogoi nenda leuet ka pusapougatda nenda, sangamberi tai Israel masirioake si Omri utet saladdut nenda sibailiu rimata Israel.

¹⁷ Lepa geti si Omri samba sangamberi tai Israel kaddiuakerangan Gibeton, lepa ei sia masialou Tirza.

¹⁸ Kateteret aiitconia si Zimri, laggai nenda araoppungan, guru'nia ka kudduat purimataat samba labonangan kudduat purimataat nenda samba malabonangan leu ka sia, iageti mateinia.

¹⁹ Aipuaili nenda kalulut aigalai sikatai ka matat Tuhan. Makere kele Rimata Jerobeam, si Zimri leuet aigalai jo katubut Tuhan bailiu paamian Israel masigalai jo leuet.

²⁰ Tiboinia bagei pagalaiat si Zimri, samba leu pukerekat baga sipinaatunia masisaggangi rimata, atusuratnakean ka buko Pumumuan pagalaiat Rimata Israel.

Omri, rimata Israel

²¹ Kateteret nenda tai Israel turubei bailiu rua. Sangarubeiat tai Israel nenda masitut si Tibni togat Ginat, samba ai pinatutda masirioakenia ibailiu rimata, tapoi ai leuet sangarubeiat sioba masitut si Omri murimata.

²² Kalepakatnia sia simare're katubut Omri manang. Matei si Tibni samba purimatanangan si Omri.

²³ Aipuaili nenda ka rura telu pulu sara puparentaat Rimata Asa ka Jehuda. Si Omri muparenta sibailiu rimata ka Israel pulurua ngarura burunia. Enem ngarura burunia siboiki ipupaparenta ka Tirza.

²⁴ Tapoi lepa geti sakinangan sara leleu sakinia enem ngaribu bulagat perak ka sara sirimanua sipuoni Semer. Lepa galainangan sara laggai ka leleu nenda samba kaunangan oninia Samaria, masitut onin Semer, sibakkat leleu nenda siburu.

²⁵ Si Omri masigalaiake sangamberi jo sabeu, bele peile sigalaiakenenda sangamberi rimata sipupaparenta kepeinia.

²⁶ Kele si Jerobeam, togat Nebat, si Omri masigalai jo samba leu bailiu tai Israel masigalai jo samba masipanindogi sabulungan simanteu sitakatukolobat. Oto kalulut nenda te aibarake golut Tuhan, Taikamanua panindogietda tai Israel.

²⁷ Tiboinia bagei pagalaiat Rimata Omri, samba sangamberi sigalaiakenennia atusuratnakean ka buko Pumumuan pagalaiat rimata Israel.

²⁸ Lepa tata si Omri samba turateiake ka Samaria, si Ahab, togania ibailiu rimata masisailiakenia.

Ahab, rimata Israel

²⁹ Ka rura telu pulu balu puparentaat Rimata Asa ka Jehuda, si Ahab togat Omri murimata ka Israel samba ipuparenta ka Samaria rua pulu ngarura burunia.

³⁰ Galaiakenangan maigi jo ka matat Tuhan sisaliu beunan peile ka sangamberi rimata kepeinia.

³¹ Kele ta sesege bagania murimanua kabagat jo kele Rimata Jerobeam, togat Nebat, itatalimouake peile si Izebel togat Rimata Etbaal sibara ka Sidon, samba masibuluiji sabulungan.

³² Rioakenangan meja samba uma pasibuluat ka Samaria sibailiu kuduat pasibuluat ka sabulungan.

³³ Galainangan leuet tularat Dewi Asyera sabulungan sinanalep. Galaiakenangan maigi jo sisaliu beunan peile sigalaiakenenda sangamberi Rimata Israel sipupaparenta kepeinia. Kalulut nenda te aibaraake pugolukat Tuhan, Taikamanua bulat panindogietda tai Israel.

³⁴ Kateteret puparentaat Ahab, si Hiel sibara ka Betel, masigalai minca laggai Jerikho. Tapoi kele sikuat Tuhan katubut Josua togat Nun, tata le rua togat Hiel iate si Abiram sikebbukat, tata' kateteret si Hiel masigalakngake bongan laggai, samba si Segub sisuleket tata kateteret si Hiel masiottotnake sangamberi matatbaliu gugurukat laggai nenda.