1Rim. 15 - BUKO SIPUNENAN

Abiam, rimata Jehuda

¹ Ka rura sikapulu balu puparentaat Rimata Jerobeam, togat Nebat, ka Israel, purimatanangan si Abiam ka Jehuda

² samba aipuparenta telu ngarura burunia ka Jerusalem. Inania iate si Maakha, togat Abisalom.

³ Maigi jo aigalai si Abiam kele ukkuinia. Ta' mamuine patuatnia mutopit katubut Tuhan Taikamanuania, ta makere kele si David nini'nia.

⁴ Tapoi, kalulut Rimata David, kaunangan Tuhan Taikamanua, panindogiet David, sara toga katubut Abiam addeat masisailiakenia muparenta ka Jerusalem samba masikupkupake laggai nenda.

⁵ Aigalaiake si Tuhan pagalaiat nenda katubut David kalulut aigalaiake simaroipo kamataNia. Ta anai aipasabau sangamberi surukat Tuhan. Sarat sara pakarot Uria tai Het le.

⁶ Ka sanganantat puparentaat Abim, pasaggangan muntogat si Rehabeam samba si Jerobeam, aipeile muriuriu.

⁷ Tiboinia bagei pagalaiat si Abiam atusuratnakean ka buko Pumumuan sangamberi rimata Jehuda.

⁸ Iageti tata si Abiam samba turateiake ka Laggai David. Si Asa, togania ibailiu rimata masisailiakenia.

Asa, rimata Jehuda

⁹ Ka rura si karuapulu puparentaat Rimata Jerobeam ka Israel, purimatanangan si Asa ka Jehuda.

¹⁰ Aipuparenta si Asa ka Jerusalem epat pulusara ngarura burunia. Onin sibbuania sinanalep iate Maakha, togat Abisalom.

¹¹ Kele si David, taikebbukatnia, si Asa masigalaiake simaroipo ka matat Tuhan.

¹² Sangamberi puoloman tubu galaiakenenda ka sangamberi kudduat pasibuluijiet sabulungan simanteu karitnakenangannia, samba sangamberi tularat buluijiet sirioakenenda tai rimata sipupaparenta kepei nia tataakenangannia ka sangaliot tobbou laggai nenda.

¹³ Beringan sibbuania, sipuoni si Maakha ariakenangannia ka galajetnia sibailiu Inan rimata, kalulut aigalai buluijiet tularat Asyera, sabulungan sinanalep siake pubotbonan akkula samba sibaraake erut polak. Bukkatnakenangannia si Asa buluijiet nenda samba labonangannia ka Su'sut Kidron.

¹⁴ Kenanen ta sangamberi leleu kudduat panindogat buluijiet aipakatai si Asa, tapoi mariuriu le topitnia katubut Tuhan ka burut puririmanuania.

¹⁵ Sangamberi mas samba perak sipanguruatnakenen ukkuinia katubut Tuhan, ambitnangannia ka Uman Tuhan, kisedda leuet mas samba perak, panguruatnia ka sia.

¹⁶ Kateteret puparentaat Rimata Asa ka Jehuda samba Rimata Baesa ka Israel mariuriu le rapasaggak ruadda rimata nenda.

¹⁷ Si Baesa masisaggangi Jehuda samba masiparon laggai Rama bule bui ibara enungan ratuguru samba rabela ka Jehuda.

¹⁸ Kalulut nenda Rimata Asa masiala sangamberi mas samba perak sipulelegei ka Uman Tuhan samba ka kudduat purimataat rimata. Sangamberi bibilet nenda kaunangan raambitnia piga pa sia sipugagalai siabeu tiboi tubu ka kudduat purimataat samba kaurangannia ka katubut Benhadad, togat Tabrimon, teteu Hezion, rimata Aram, ka Damsyik sialei patonekat:

¹⁹ “Kauan taappra pasuruanganta kele sigalaiakenenda saukkuita. Sene ai akuake mas samba perak sibailiu panguruatku katubum. Takkiakean le paaleiatnu katubut Baesa rimata Israel nenda, bule itiktik minca saladdunia ka kupkumen laggai pasikelietku.”

²⁰ Pasese le ka bagania si Benhadad pananakat rimata Asa nenda, lepa koiniakenangan sautet saladdu pasamba saladdutda masisaggangi sangamberi laggai Israel. Kalaakerangan Iyon, Dan, Abel-Bet-Maakha, Kinerot samba leu sangaliot kupkumen laggai Naftali.

²¹ Kateteret aiarepnia si Baesa pagalaiat nenda, ariakenangan masiparon Rama. Einia ka Tirza samba pukuddunangan sedda.

²² Lepa Rimata Asa masiparentaake sangamberi sirimanua ka sangaliot Jehuda ta anai irarasei masiakkatnake bukku samba loina. Siboiki, bukku samba loina nenda iate pakeiet Baesa ka Rama addeat masiparon laggai nenda. Tapoi bukku samba loina nenda pakeinangannia si Asa addeat masiparon laggai Geba-Benjamin samba Mizpa.

²³ Tiboinia bagei pagalaiat Rimata Asa, iate gege samba ron puparentaatnia samba sangamberi laggai siparonnia, atusuratnakean ka Buko Pumumuan sangamberi rimata Jehuda. Kateteret pubajakatnia si Asa mabesinangan ruangasilat rerenia.

²⁴ Lepa tatania samba turateiake ka puariatda tai rimata ka Laggai David. Si Josafat, togania ibailiu rimata masisailiakenia.

Si Nadab, rimata Israel

²⁵ Ka rura sikarua puparentaat Rimata Asa ka Jehuda, si Nadab togat Jerobeam ibailiu rimata ka Israel samba aipuparenta rua ngarura burunia.

²⁶ Makere kele ukkuinia sipuparenta kepeinia, nia leuet masigalaiake sikatai ka matat Tuhan sibailiuake tai Israel mugalai jo.

²⁷ Baesa, togat Ahia, sibara ka suku Isakhar masigalai pukerekat baga pasamba saaleinia masisaggangi si Nadab, lepa mateiakerangannia si Baesa ka Gibeton. Kateteret nenda si Nadab pasamba saladdunia airaalou laggai Gibeton ka kupkumen laggai Filistin.

²⁸ Aipuaili nenda ka rura sikatelu puparentaat Rimata Asa ka Jehuda. Kisedda te si Baesa ibailiu rimata Israel masisailiake si Nadab.

²⁹ Ta'pei amaburu ipurimata si Baesa pamateinangan sangamberi muntogat Jerobeam. Siripot sikuat Tuhan sisege ka paguguletNia, nabi Ahia sibara ka Silo, iageti sangamberi muntogat Jerobeam tumateiake, ta anai berisara sibebela.

³⁰ Si Jerobeam masigalai jo bailiu tai Israel leu masigalai jo. Kalulut kisedda, si Jerobeam masibaraake golut Tuhan Taikamanua panindogietda tai Israel.

³¹ Tiboinia bagei pagalaiat Rimata Nadab atusuratnan ka Buko Pumumuan pagalaiat rimata Israel.

³² Burut puparentaatnia Rimata Baesa ka Israel, mariuriu le pasagganganda Rimata Baesa samba Rimata Asa ka Jehuda.

Baesa, rimata Israel

³³ Ka rura sikatelu puparentaat rimata Asa ka Jehuda, si Baesa togat Ahia ibailiu rimata ka sangaiot Israel. Ipupaparenta ka Tirza ruapulu epat ngarura burunia.

³⁴ Makere kele rimata Jerobeam sipupaparenta kepeinia, Rimata Baesa leuet masigalai jo katubut Tuhan samba bailiu tai Israel leu masigalai jo.