1Rim. 14 - BUKO SIPUNENAN

Kamateiat togat Jerobeam

¹ Kateteret nenda mabesinangan togat Jerobeam simanteu sipuoni Abia.

² Kuanangan si Jerobeam ka sinanalepnia, “Patarek tubum mei ka Silo ka lalep nabi Ahia sipasikukua suburu, ibailiu geti aku Rimata Israel. Tapoi galai le tubum kele ta ekeu bule ta raagai ekeu sirimanua.

³ Ambit pulu roti katubunia, kue samba suat mani sangabulibuli. Parereake katubunia apa sipuaaili geti katubut Abia, togatta. Nabi nenda ipaagai geti katubum.”

⁴ Iageti ei sinanalep Jerobeam ka lalep Ahia ka Silo. Nabi nenda ta'an amaitco matania kalulut amakopean baja'nia.

⁵ Tapoi si Tuhan masipaagai katubunia, kaooi sinanalep Jerobeam masirereake pagalaiat togania simabesi', samba si Tuhan leuet masipaagai katubut nabi Ahia sangamberi kuanennia. Kele aisege sinanalep Jerobeam sedda, galainangan galai tubunia kele sirimanua sabagei.

⁶ Tapoi kele aiarep nau bakkou si Nabi Ahia ka matatbaliu, kuanangan, “Guruake ekeu, kuagai ekeu sinanalep Jerobeam. Bagagalai tubum kele ta ekeu. Ai katuareman sitaimaeru segeakenenku katubum.

⁷ Toiliake ekeu samba paagai katubut Jerobeam, nene te aikua si Tuhan, Taikamanuan Israel, ‘Akupilingan ekeu ka katalagat siberikabaga samba Akubailiuakean ekeu sikupkup sangamberi paamianKu Israel.

⁸ Akuakean purimataat sialaKu sibara ka sapunuteteu David. Tapoi ekeu ta kele paguguletKu si David. Bulat mariuriu topitnia katubukKu samba mareddetnia ka parentaKu. Sarat siobat bagaKu le igagalaiake.

⁹ Tapoi anugalaiakean pukakatai sisaliu beunan bele pei sigalaiakenenda tai rimata sipupaparenta kepei muparenta ekeu. Ekeu masikaddiuake aku samba anubaraake Kupugolu ka pasigagalai taikamanua bagei samba leu sangamberi tularat sigalai ka logam sibailiu panindogiet.

¹⁰ Kalulut nenda baraakekungan geti kamateiat ka sangamberi muntogatnu. Sangamberi sapunuteteunu simanteu, apa poi tiboi tubunia, tumateiake le geti. Kusabuiake le geti muntogatnu, kele kusabuiake kasitsitakenen pat sappru.

¹¹ Laddou muntogatnu simamatei ka laggai, jojo masikokom sia, samba simamatei ka ujat laggai, uma' masikokom sia. Repdem, Tuhan amasikua!’ ”

¹² Tuppaiakenangan tiboietnia Nabi Ahia ka sinanalep Jerobeam, “Kauan, toiliake ekeu kineneiget! Kateteret ainuguguki laggai, tata geti togam nenda.

¹³ Sangamberi tai Israel mureureu baga le geti samba masirateiakenia. Nia te sarania laddou muntogat Jerobeam sirateiakenen geti ka enungan simaeru, aipoi sarania le sipasesese ka matat Tuhan, Taikamanuan Israel.

¹⁴ Iake te geti si Tuhan sara rimata ka Israel sisubuake sapunuteteu Jerobeam sibailiu rimata – kele sipuaaili kineneiget.

¹⁵ Lepa geti ukumnangan tai Israel si Tuhan bailiu paritcainangan sia kele labbaet ka bagat oinan. Si Tuhan masiburau geti tai Israel ka tobbou laggai simaeru nene sikauNia ka taikebbukatda; pasaragainangan leu sia ka silat bagat oinan Efrat, kalulut arabarake poi golut Tuhan aragalai sangamberi tularat Asyera sabulungan sinanalep.

¹⁶ Kaddiuakenangan te geti tai Israel si Tuhan kalulut gagalaina jo si Jerobeam samba leu sibailiuake tai Israel masigalai jo.”

¹⁷ Kapplu nenda tuitui te sinanalep Jerobeam ka Tirza. Kateteret aituguru' ka lalepnia, tata' togania.

¹⁸ Tai Israel mureureu baga samba leu rateiakerangannia kele sikuat Tuhan sisege ka Nabi Ahia, paguguletNia.

Kamateiat Jerobeam

¹⁹ Tiboinia bagei pagalaiat Rimata Jerobeam, iate pupaparentania samba pasaggangan siuteakenennia, atusuratnan ka bagat buko pumumuan sangamberi Rimata Israel.

²⁰ Rua pulurua ngarura burunia si Jerobeam aipuparenta sibailiu rimata, lepa geti tata'nia samba turateiake. Iageti togania masisailiakenia sibailiu rimata.

Rimata Rehabeam sibara Jehuda

²¹ Kateteret si Rehabeam, togat Salomo, ibailiu rimata Jehuda ainia epat pulu sara ngarura. Aipuparenta pulupitu ngarura burunia ka Jerusalem. Ka sangaliot Israel, laggai nenda le aikokoiake si Tuhan sibailiu kudduat panindogat katubuNia. Inan Rehabeam iate Naama sibara ka tai Amon.

²² Bangsa Jehuda masigalaiake sikatai ka matat Tuhan. Kalulut katai sigalaira sisaliu sangamberi sigalaiakenen taikebbukatda.

²³ Ka uddut sangamberinia leleu samba ka tei sangamberi loina sabeu, galairangan sangamberi kudduat masibuluiji sabulungan samba masirioake sangamberi toggaiat samba leu sangamberi tularat Asyera sabulungan sinanalep sibailiu panindogietda.

²⁴ Ka sangamberi kudduat nenda baraakerangan puoloman tubu sibailiu pasibubuluijitda sabulungan simanteu. Tai Jehuda masigalaiake sangamberi sigalaiakenda tai Kanaan sikeklet Tuhan kateteret araguruki laggai nenda tai Israel.

²⁵ Ka rura sikalima puparentaat Rehabeam, si Sisak, rimata Misir sagganginangan Jerusalem.

²⁶ Rauraunangan sangamberi bibilet simakeppu saki sibabara ka Uman Tuhan samba ka uma samba ka kudduat purimataat rimata, samba leu sangamberi korabbi mas sigalai Salomo.

²⁷ Iageti sibailiu sailinia galainangan Rimata Rehabeam sangamberi korabbi perunggu samba kauanangannia ka sautet saladdu sipasijago matatbaliu gugurukat ka kudduat purimataat rimata.

²⁸ Senen iei rimata ka Uman Tuhan, sipasijajago masiambit korabbi nenda, lepa geti toiliakerangannia ka kudduat pujagoat.

²⁹ Tiboinia bagei pagalaiat Rimata Rehabeam atusuratnakean ka buko pumumuan sangamberi rimata Jehuda.

³⁰ Kateteret puparentaat Rehabeam, sarat pasaggak le si Rehabeam samba si Jerobeam.

³¹ Lepa geti tata' si Rehabeam samba rateiakerangannia ka puariatda tai rimata ka Laggai David. Onin inania iate Naama, sibara ka Amon. Si Abiam, togania simanteu, masisailiakenia sibailiu rimata.