1Rim. 13 - BUKO SIPUNENAN

¹ Kateteret nenda ai sara nabi ka Jehuda, koiniakenangannia si Tuhan mei ka Betel. Kateteret aisege nabi nenda aimuririo si Jerobeam ka matat kudduat pasibuluat masipanguruatnake buluakenen.

² Kalulut parentat Tuhan pusoganangan nabi nenda ka kudduat pasibuluat nenda, “Ale kudduat pasibuluat, ale kudduat pasibuluat! Kise le ngangan Tuhan, “Sara toga sipuoni Josia mututu mata geti ka muntogat David. Ka uddutnu, ale kudduat pasibuluat, pamateinangan geti tai imam sipugagalai ka sangamberi kudduat pasibuluat ka sabulungan, samba sia leuet sipanguruatnake buluakenen ka uddutnu. Samba ka uddutnu leuet ilabo geti sangamberi tolat sirimanua.” ”

³ Kuanangan minca nabi nenda, “Kudduat pasibuluat nene mararagat te, samba marurugut te abu ka uddutnia. Nenda te muaaili sibailiu toggaiat kokoiniakena aku Tuhan.”

⁴ Kateteret aiarep si Jerobeam sangamberi tiboiet nenda, sausaunangan katubut nabi nenda lepa pugereinangan, “Laba kam sirimanua nenda!” Tapoi kateteret nenda kabei Jerobeam pusiro'nangan bailiu ta'an amoi itiktik minca kabeinia.

⁵ Sinulut maragatnangan kudduat pasibuluat nenda samba abu ka uddutnia rugut ka polak, kele sikuat nabi nenda kalulut parentat Tuhan.

⁶ Lepa kuanangan Rimata Jerobeam katubut nabi nenda, “Ropmake nupanindou katubut Tuhan Taikamanuam addeatku. Tiddou le pukatekat bagaNia bule ialeake kabeiku!” Panindounangan leu nabi nenda katubut Tuhan, lepa maalenangan kabei rimata.

⁷ Lepa geti kuanangan rimata katubut nabi nenda, “Konan mukom ka lalepku. Kuoba kuake panguruat katubum.”

⁸ Aleginangannia nabi nenda, “Kenanen poi nuake kaku iletalaga sibara ka pukayoatnu, tamomoi aku mukom samba muloka lalepnu.

⁹ Akusilo parenta sibara katubut Tuhan tamomoi kupukom samba mulo, samba kutoili leu ta kuenungi enungan sienungingku kateteret akuoi.”

¹⁰ Kisedda te aitoili nabi nenda ka enungan bagei.

Sara nabi simabaja' ka Betel

¹¹ Kateteret nenda ai sara nabi simabaja' sikuddu ka Betel. Tatogania masipaagai katubunia pagalaiat nabi sibara ka Jehuda nenda. Tiboirangan tatogania pagalaiat sigalaiakenennia ka Betel ka gogoi nenda, samba sikuania katubut Rimata Jerobeam.

¹² Lepa parerenangan ukkuira, “Kateteret aitoili enungan kaipa aienungi?” Iageti sausau'rangan tatogania enungan nenda ka tubunia.

¹³ Lepa koiniakenangan sia masikau apot teitei kalideinia. Lepa nenda sakainia ka teitei kalideinia samba tuituinia

¹⁴ masikukru nabi sibara ka Jehuda nenda. Ailinangan nabi nenda ainia mukukuddu ka tei sara loina sabeu. Parerenangan nabi simabaja' nenda, “Taleu ekeu nene nabi sibara ka Jehuda?” Aleginangan sirimanua nenda, “Bulatnia.”

¹⁵ Kuanangan nabi simabaja' nenda, “Konan mukom ka lalepku.”

¹⁶ Tapoi aleginangannia nabi sibara ka Jehuda, “Bojoi! Ta' momoi kusilo pasogaiatnu ukkui masitut ekeu, samba tamomoi kupukom samba mulo pasamba ekeu.

¹⁷ Aiparentaakean aku si Tuhan ta kupukom samba mulo samba kutoili ta kuenungi enungan sienungingku kateteret akuoi.”

¹⁸ Iageti nabi simabaja' sibara ka Betel nenda leuet masibokoinia, kalulut aikua, “Aku leuet nabi kele ekeu. Kalulut parentat Tuhan, sara malaika amasikoiniake aku masisogai samba masirauma ekeu ka lalepku.”

¹⁹ Iageti nabi sibara ka Jehuda nenda tutnangan nabi simabaja' nenda ka lalepnia mukom samba mulo pasambania.

²⁰ Aipeile sia mukokom, panibonangan si Tuhan katubut nabi simabaja nenda,

²¹ bailiu tekanangan nabi sibara ka Jehuda nenda, kuanangan, “Aikua si Tuhan ta mareddet ekeu katubuNia. Ta anugalaiake siparentaakenenNia katubum,

²² Anuoleake le minca samba mukom mulo. Aikerangan tebai ekeu masigalaiake pagalaiat nenda. Kalulut nenda matei le ekeu samba tubum simamatei ta turarateiake ka rateira taikebbukatnu.”

²³ Kele ailepa rapukom, nabi simabaja' nenda masikau apot teitei kalidei nabi sibara ka Jehuda nenda,

²⁴ lepa putuituinangan nabi nenda. Ka tengan enungan sabbaknangannia sangamuneng singa pat matei. Lepa tubunia simamatei tagguilu ka enungan, samba kalidenia murio ka bebenia. Singa nenda leuet murio sedda.

²⁵ Sangamberi sirimanua situsasabau, masiitco tubunia simamatei samba singa leu ai sedda. Lepa ei sia ka Betel samba masipaagai apa siitcora.

²⁶ Kateteret nabi simabaja masiarep pagalaiat nenda, kuanangan, “Simamatei nenda bulatnia nabi sitaimareddet ka parentat Tuhan! Nenda te lulunia aikoiniake singa nenda si Tuhan masisabbak samba masimateiakenia kele sikuat Tuhan siboiki peile.”

²⁷ Lepa kuanangan nabi simabaja nenda ka tatogania, “Kau kam apot teitei ka kalideiku.” Kele aitusakai ka teitei kalideinia tuituinia.

²⁸ Sesenangan tubut nabi simamatei nenda aipeile mutatagguilu enungan pasamba kalidei samba leu singa ka bebenia. Singa nenda ta aisabbak kalidei samba leu ta aikom tubu simamatei nenda.

²⁹ Akkatnakenangan tubu simamatei nenda samba galakngakenangannia ka teitei kalideinia, lepa ambitnangannia toili ka Betel bule tusoibi samba turateiake.

³⁰ Nabi simabaja' nenda te amasirateiake tubu simamatei nenda ka puariatda samuntogatnia, lepa soibirangannia, kuarangan, “Ale saraina, apate nuntut bagatta katubum!”

³¹ Lepa geti kuanangan nabi simabaja' nenda ka tatogania, “Ke iaili teterenia kumatei, rateiake kam aku ka puariat nene ka bebet nabi nene.

³² Kalulut tiboiet Taikamanua sisegeakenen nabi ini pagalaiat kudduat pasibuluat ka Betel samba sangamberi leleu kudduat pasibuluat ka sangamberi laggai Samaria, bulatnia muaaili.”

Si Jerobeam masigalai jo

³³ Rimata Jerobeam ta ioba igalakake mugalai jo. Kabagat masipasikeli sangamberi kudduat pasibuluat sirioakenennia ka leleu nenda, mariuriu le irioake imam ta sibara ka muntogat Lewi. Kasei le siobania ibailiu imam sukatakenangan.

³⁴ Jo sigalaiakenennia nenda sikau ramatei samba ramasubu sapunuteteunia.