1Rim. 10 - BUKO SIPUNENAN

Kaooi rimata sinanalep laggai Syeba

¹ Rimata sinanalep laggai Syeba masiarep pagalaiat katuareman pubebeunan Salomo. Iageti einia ka Jerusalem masisibo si Salomo ka parerekat pasikat.

² Aioi ka Jerusalem rapaaleinia saladdu simigi samba unta sipasiabbit pusinginan, bukku simakirisau, samba mas bulat simakope igi. Kele aisege katubut Salomo, rimata nenda masikau maigi ngamataat parerekat siripot sibabara kapatuatnia.

³ Sangamberi pererekat nenda momoi ialeginia si Salomo, ta anai berisara ta amoi aialegi panounougat rimata sinanalep nenda.

⁴ Rimata sinanalep nenda masiitco kopet sikut patuatnia si Salomo. Itconangan kudduat purimataat sigalai Salomo,

⁵ komen ka mejania, enung pukukuddu sipugagalainia, enung pugagalaira sapaguguletnia samba leppeira simakere, Lot Salomo samba buluakenen sipanguruatakenen Salomo ka Uman Tuhan. Sangamberinia nenda bulat makisei bagania rimata sinanalep laggai Syeba samba ioba bagania

⁶ Iageti kuanangan katubut Rimata Salomo, “Sangamberi siarepku ka laggai pututukat matakku pagalaiat ekeu samba sikut paatuatnu, bulat aisesengan!

⁷ Siboiki ta matonem bagaku, tapoi kele akuoi samba akulelekngake sangamberinia, iapei te matonemnangan bagaku. Sibulatnia sangamberi siarepku nenda ta'pei aiaili sitenga siitcoku kineneiget. Sikut patuat pukayoatnu bulat makope beunan bele peile kele siarepku.

⁸ Bulat makope uktukda tainanalepnu! Samba bulat mauktuk sia sangamberi sipugagalai simariuriu katubum, bailiu oinangan raarep sangamberi gelaiakenen pusikuat patuat kekeu!

⁹ Tuumun le Tuhan Taikamanuam! Airioake ekeu ibailiu Rimata Israel, aipatoilaan kopet nuntut bagaNia katubum. Ta'anai katukappulatnia ipukateki baga paamian Israel, nenda te lulunia airioake ekeu ibailiu rimatatda, bule ioi nugalaiake surukat samba katuroipoat.

¹⁰ Lepa geti rimata sinanalep tobbou laggai Syeba nenda masikau katubut Salomo sangamberi panguruat siambitnia, iate mas epat ngaribu ngakilo legei, bukku simakirisau samba leu pusinginan. Taan aisilo si Salomo pusinginan simakope igi kele sikau rimata sinanalep tobbou laggai Syeba nenda katubunia.

¹¹ Sangamberi kapat Hiram siambit mas sibara ka Ofir addeat Salomo, ialeuet masiambit simakope igi bukku simakirisau samba loina pinilok.

¹² Loina nenda ipakei si Salomo masigalai kekret jandela ka Uman Tuhan samba ka kudduat purimataat, masigalai leuet kecapi samba gambus ka sipuurai. Sangamberi loina nenda iate loina pinilok simakope eru sikaura ka Israel, samba taan tusesese kele erut loina nenda teret kineiget.

¹³ Kaunangan Rimata Salomo katubut rimata sinanalep laggai Syeba nenda sangamberi siobat bagania samba sinindounia, samba kaunangan leu panguruat kele simatukle kaunennia ka tai rimata sabagei. Lepa geti toili rimata sinanalep nenda ka laggainia sambatda saladdunia.

Pukayoat Rimata Salomo

¹⁴ Senen rura Rimata Salomo masisilo malegre ruapulu telungaribu ngakilo mas,

¹⁵ ta'pei atuadde uktuk sibara ka sipasisasaki, samba sangamberi juran sibara ka sipujajaga, sangamberi rimata Arab samba leu sangamberi sautet laggai ka Israel.

¹⁶ Galainangan si Salomo rua ngotu korabbi sabeu sibara ka mas sipaddai. Ka senen korabbi nenda tukau mas pitu ngakilo legei.

¹⁷ Galainangan leuet telu ngotu korabbi mas sigoiso samba ka senen korabbi sigoiso nenda tukau mas rua ngakilo legei, sangamberinia mas sipaddai. Sangamberi korabbi nenda kaunangannia ka uma sipuoni Uma Leleu Libanon.

¹⁸ Galainangan leuet sara korosi purimataat sabeu silakkeki sikkla samba tupalainge pasamba mas simalina.

¹⁹ Korosi nenda ai pasigalangan kabei, samba karua silat korosi nenda ai tularat singa. Kateitei korosi nenda ai tularat utet jaui. Korosi nenda leuet ai enem takat orat.

²⁰ Ka ngungunia katubut katciu samba katubut kattoet senen takkat orat nenda ai tularat singa, sangamberinia pulurua ngambua. Ta' anai korosi purimataat kele nenda ka purimataat bagei.

²¹ Sangamberi pulokat Salomo tugalai sibara ka mas samba sangamberi pugalai ka uma “Leleu Libanon” tugalai sibara ka mas simalina. Ta' anai tugalai sibara ka perak, aipoi kateteret Salomo, sirimanua masiaddeake perak nenda ta'anai katukaunannia.

²² Si Salomo maigi kapania sabeu sipulalajo simakere kapat Rimata Hiram. Telu ngarura sangaminca sangamberi kapa nenda itoili masiambit mas, perak, sikla, siteut samba uma' kailaba.

²³ Rimata Salomo simakope kayo samba simakope sikut patuat ka bele pei sangamberi rimata ka polak.

²⁴ Sangamberi sirimanua ka sangaliot polak masibesiake paaili katubut Salomo addeat masiarep samba masiitso pusisikut patuatnia sikau Taikamanua katubunia.

²⁵ Senen siooi masikau panguruat katubut Salomo. Kaurangan bibilet perak, mas paleppei-leppei, pamatei, pusinginan, kuro samba bagal. Kisedda te ka senen rura.

²⁶ Si Salomo ai saladdunia pulurua ribu sia sipukukuro samba sangaribu epat ngotu kereta pasaggak. Sangarubeiat sikukuddu ka Jerusalem samba legeinia ka laggai-laggai bagei.

²⁷ Kateteret puparentaat Salomo ka Jerusalem perak makere le kele bukku, samba loina pinilok Libanon amusukkrangan kele loinat sileu simaturere.

²⁸ Sipasasaki bakkat rimata ambitrangan kuro sisakitda sibara ka Misir samba Kilikia, sakit kuro nenda kele sakinia simareirei,

²⁹ samba sangamberi kereta pasaggak tuambit sibara ka Misir. Sakit sara kuro sangotu lima puluh bulagat perak, samba sakit sara kereta pasaggak enem ngotu bulagat perak. Lepa geti sipasisasaki bakkat rimata nenda, sakiakerangan minca sangamberi kuro samba kereta pasaggak katubut rimatatda tai Het samba rimatatda tai Siria.