1Rim. 1 - BUKO SIPUNENAN

Rimata David kateteret pubabajaknia

¹ Kineneiget Rimata David amakopean bajaknia. Kenanen tusobbeijinia pasamba komak simakeppu, ia leuet malopotnia.

² Kalulut nenda sia sipugagalainia masikua, “Tuan Rimata, simaerunia kugaba le kai sara siokko masipasikeli tuan rimata. Nia merep pasamba Tuan, bule imaoloi tubut tuan rimata.”

³ Iageti gabarangan sara sioko simalainge tubu ka sangaliot Israel, samba seserangan si Abisag, siokko sibara ka Sunem, lepa ambitrangannia katubut rimata.

⁴ Siokko nenda bulat malainge tubunia, samba bailiunangannia sipuuku rimata, tapoi ta aipaperepakenia si rimata.

Si Adonia masibesiake ibailiunia rimata

⁵ Lepa si Adonia, togat ka sinanalepnia katubut Hagit, masikua, “Kuoba ibailiu aku rimata.” Iageti tareknangan addeat tubunia piga pa kereta pasaggak samba tai saladdu sipukukuro samba leu lima pulu sipasijajagonia.

⁶ Ka burut puririmanuan Adonia, tapei aigolunia ukkuinia ke igalaiake puseleat. Putubuatnia leu malainge samba nia iate toga David lepat si Absalom.

⁷ Lepa ei nia patibo katubut Joab, togat Zeruya samba leu katubut Abyatar samba raoba masiropake siisiakenen Adonia.

⁸ Tapoi imam Zadok, Benaya togat Joyada, nabi Natan, Simei, Rei samba sipasijago rimata David ta raoba masitut si Adonia.

⁹ Ka sara gogoi ka kudduat sipuoni Bukku Ulou legret bubuakat oinan ka legret En-Rogel, si Adonia masipanguruatnake buluakenen biribiri, jaui simanteu samba togat jaui sangamberi simamo'mo'. Sogainangan sangamberi togat rimata David simanteu sabagei, samba sangamberi sipugagalai ka lalep purimataat sibara ka suku Jehuda ka punen pasibuluakenen nenda.

¹⁰ Tapoi si Salomo, baginia, samba nabi Natan samba leu si Benaya samba sipasijajago rimata David ta aisogai sia.

Salomo ibailiu rimata

¹¹ Iageti ei si nabi Natan masiailiake si Batsyeba, inan Salomo, lepa kuanangan katubunia, “Ina, ta pei pa anuarep si Adonia, togat Hagit simanteu, airioakean tubunia ibailiu rimata, mandean Rimata David ta iagai sangamberi pagalaiatnia nenda?

¹² Ke nuoba maarau bule si Salomo samba inania, kuake enungan,

¹³ kenan simaruei nupatiboake Rimata David, samba masikua kisene katubunia: “Ta' pa tubut Tuanku amusuppa katubukku aipoi togakku simanteu si Salomo ibailiu geti rimata masisailiake Tuanku? Kineneiget angoian le si Adonia ibailiu rimata?”

¹⁴ Riuriuakenangannia masikua si Natan, “Ke aiat geti sia patitibo pasamba rimata, guru' aku masironnake apa sikuam.”

¹⁵ Iageti ei si Batsyeba masipatiboake rimata ka bagat biliknia. Rimata kateteret nenda bulat amabaja'annia samba si Abisag, siokko sibara ka Sunem nenda aipuukunia.

¹⁶ Purekkuknangan si Batsyeba ka matat rimata, lepa rerenangannia rimata, “Apa kiddietnu?”

¹⁷ Aleginangan si Batsyeba, “Siboiki Tuanku Rimata amusuppangan katubukku ka onin Taikamanuan Tuanku, togakku simanteu si Salomo ibailiu geti rimata masisailiake Tuanku.

¹⁸ Tapoi kineneiget sitaiagaiet Tuanku, si Adonia aibailiuan rimata.

¹⁹ Aipanguruatnakean maigi biribiri, jaui simanteu samba togat jaui sangamberi simamo'mo'. Aisogaian leu ka punen nenda sangamberi tatogat Tuanku simanteu samba imam Abyatar samba lei si Joab, utet saladdu Tuanku. Tapoi ta aisogai si Salomo.

²⁰ Tuanku Rimata, kineneiget sangamberi tai Israel masingenaake siteuaknenen sibara ka Tuanku pagalaiat kasei sipasisasailiake geti Tuanku ibailiu rimata.

²¹ Ke Tuanku ta nuake katakkikat nenda, bulat ta mabuburu lepat ilango tuanku, addeakerangan te geti aku samba togakku simanteu simapajoat.”

²² Aipeileu mainiibo si Batsyeba pasamba rimata, sege nabi Natan ka kudduat purimataat.

²³ Lepa segeakerangan sapagugulet Rimata pagalaiat kaooi Natan. Bela si Batsyeba, samba guru' si Natan, lepa purekkuknangan ka matat rimata.

²⁴ Kuanangannia si Natan, “Tuanku Rimata, taleu anupaagaian si Adonia le geti ibailiu rimata masisailiake Tuanku?

²⁵ Gogoi nene leuet aipanguruatakean buluakenen maigi biribiri, jaui simanteu samba togat jaui sangamberi simamo'mo. Sangamberi togat Tuanku simanteu, aisogaian. Kisedda leuet sautet pasaggangan Tuanku, samba imam Abyatar. Kineneiget ai sia mupunen pasamba nia samba masigereiake, ‘Amurimatangan si Adonia!’

²⁶ Tapoi ta aisogai aku. Imam Zadok samba si Benaya samba leu si Salomo ta aisogainia.

²⁷ Taleu tuanku le amasikoiniake aragalaiake sangamberi nene, sitaipaagaiakenen katubut sangamberi sipugagalai Tuanku, kasei sisailiake geti Tuanku?”

²⁸ Kuanangan Rimata David, “Sogai si Batsyeba.” Iageti bela nabi Natan samba si Batsyeba masipatiboake minca rimata.

²⁹ Lepa kuanangan rimata katubunia, “Ka onin Tuhan sipuririmanua siarauake engangku ka sangamberi pangoringan,

³⁰ kineneiget kususunake te geti palelenganku katubum, ka onin Tuhan, Taikamanuan Israel, pasamba suppa nene, “Togam si Salomo ibailiu le nia geti rimata masisailiake aku.”

³¹ Iageti rekkuk te si Batsyeba aikukua, “Bule imaburu puririmanuan Tuanku!”

³² Lepa koiniakenangan Rimata David masisogai imam Zadok, si Natan samba si Benaya. Kele araoi,

³³ kuanangan rimata katubutda, “Sogai kam sipugagalaiku samba kenan kam sambamui katubut togakku simanteu si Salomo. Sakaiake kam togakku ka uddut kalideiku sinanalep samba ambit kamnia ka bubuakat oinan Gihon.

³⁴ Sedda si Zadok samba si Natan buita masirioakenia ibailiu rimata Israel. Lepat nenda sangamberimui buita masipiau pipiau samba musigereiake, “Amurimatangan si Salomo!”

³⁵ Lepa geti paenungake kamnia minca sene addeat masikudduiji kudduat purimataatku, kalulut nia te sipiliku ibailiu rimata masisailiake aku addeat masiparenta Israel samba Jehuda.”

³⁶ Aleginangan si Benaya, “Maeru Tuan,” Bule Tuhan Taikamanuan Tuanku, masironnake parentat Tuanku nenda.

³⁷ Kele leuet si Tuhan masipaalei Tuanku, bule Nia leuet masipaalei si Salomo. Bule si Tuhan masigalai puparentaatnia sabeu peile sibara ka puparentaat Tuanku.

³⁸ Iageti imam Zadok samba nabi Natan, si Benaya samba sijago rimata masisakaiake si Salomo ka uddut kalidei sinanalep, lepa ambitrangannia ka bubuakat oinan Gihon.

³⁹ Lepa geti imam Zadok ambitnangan ban sibara tula ka bagania, lepa uruakenangan tula nenda ka utet Salomo lepa nauakerangan leu pipiau samba sangamberi sirimanua sedda mugerei. “Bule ituppai nantat puririmanuan Rimata Salomo.”

⁴⁰ Lepa geti sangamberitda muenung kateitei Salomo ratoili pasamba masinauake suling, bailiu polak kelean le masisila kalulut iginia sirimanua sipuangka baga nenda.

⁴¹ Kateteret si Adonia samba tai raumania simauei le ailepa arapukom, areprangan gaugau sirimanua sipuangka baga. Kateteret aiarep si Joab nau pipiau parerenangan, “Apa sibabara ka lagai bailiu makope gaugau?”

⁴² Ta' pei leu alepa ipanibo si Joab, tulut bara si Jonatan, togat imam Abyatar, “Konan guruake ekeu,” ngangan Adonia. “Ekeu sirimanua simatopit, bulatnia katuareman simaeru le anuambit.”

⁴³ Aleginangan si Jonatan, “Bojoi, ta katuareman simaeru,” Rimata David airioakean si Salomo ibailiu rimata!

⁴⁴ Imam Zadok, nabi Natan, si Benaya samba sijago rimata masisakaiake si Salomo ka uddut kalidei sinanalep,

⁴⁵ samba imam Zadok samba leu nabi Natan alepaan aratulaijinia kabubuakat oinan Gihon ibailiunia rimata. Samba toili sia baratda sedda kabagat angkat baga, bailiu magaugaunangan laggai, nenda gaugau siarepnu simaruei.

⁴⁶ Kineneiget si Salomo aibailiuan rimata.

⁴⁷ Samba sia leuet sipugagalai rimata ameian sia masikua paroroiat katubut Rimata David. Kuarangan, “Bule Taikamanuan Tuanku masibailiuake si Salomo simakope beunan bele peile Tuanku, bule puparentaat Salomo makope eru peile bele peiler ka puparentaat Tuanku.” Lepa geti ka kudduat peremannia, purekkuknangan Rimata David masipanindogi Taikamanua,

⁴⁸ samba manindou, “Tuumunnake Ekeu, oi Tuhan Taikamanua panidogiet paamian Israel. Gogoi nene sara sirimanua sibara ka muntogatku anurioakean ibailiu rimata masisailiake aku, samba Ekeu masiobaake aku murimanua bule kuitconia!”

⁴⁹ Sia tai raumania si Adonia bailiu maloto, bailiu puriorangan sangamberitda lepa tutui sia.

⁵⁰ Iageti makope le loto si Adonia katubut Salomo, bailiu pabalaunangan ka Sapou Tuhan samba ukkaakenangan tu'tut kudduat pasibuluat.

⁵¹ Sirimanua masisegeake pagalaiat nenda katubut Rimata Salomo. Sia masisegeake aipoi kalulut kopet lotot Adonia katubut Salomo, iageti ei nia ka kudduat pasibuluat samba masiukkaake ngungun kudduat pasibuluat nenda samba leu masikua, “Ta' mututuitui aku sene ke ta pei musuppa si Salomo katubukku ta imamateiake aku.”

⁵² Aleginangan si Salomo, “Ke igalaiake simaeru, ta tuukumnia geti, tapoi ke igalai sikatai, buita tumateiakenia.”

⁵³ Lepa koiniakenangan rimata sirimanua sieei masiala si Adonia ka kudduat pasibuluat nenda. Iageti oi si Adonia masipatiboake rimata samba purekkuknangan ka matania. Lepa kuanangan rimata, “Momoi nutoili!”