1Ptr. 3 - BUKO SIPUNENAN

Pagalaiat pulalalep

¹ Kisedda leu kam tainanalep, pusum kam ka taimanteumui, bule ke ai ka talagada sitaimareddet ka tiboiet Taikamanua, kalulut paraboatda tainanalepda bailiu sia mutonem baga, kenanen ta anai tukua apa pa ka matada,

² kalulut iitcora paraboatmui simalina samba simasuru.

³ Bui sarat masipalainge tubu ka uddut nugalai kam, kele masitikai alai, muinu mas ele muleppei palatsatlatsat.

⁴ Pulaingeatmui geti ia te sirimanua ka baga simalilipput, masipakei pulaingeat sitaimasususu sibara ka ketsat leppet baga samba simaaban, ia te simakeppu saki ka matat Taikamanua.

⁵ Kisedda poi tainanalep sipunenan siburu, sipukakaronan ka Taikamanua; rapalainge tubuda ka bagat mureddet ka taimanteura.

⁶ Kele si Sara ireddet si Abraham samba ioniake nia tuannia. Kam leu bailiu tatogat Sara ke nugalai kam simaeru samba ta nukalotoake kam apa pa.

⁷ Kisedda leu kam taimanteu, palalepmake kam tainanalepmui ka bagat agai paatuat, nuagai poi kam sipuaakkula simaluluk le sia. Suru kam sia, aipoi aleimui masiikepmake purimanuaiat panguruat Taikamanua le sia, bui isaila panindogatmui.

Masiorik kalulut pasigagalaiake simaeru

⁸ Ia geti pasilepania, kau sisara paatuat kam sangamberimui, sikere masiorik, mununtu baga ka saalei, mukate baga samba muepe paatuat.

⁹ Bui nusiliake kam sikatai silit sikatai, ele paloloiat silit paloloiat; bailoknia sukatnake le kam, ia poi lulunia aitusogai kam, bule nuikepmake kam panukanan.

¹⁰ Aipoi aikua ka Surat Sipunenan, “Kasei sioba murimanua samba masiitco gogoi simaeru, kau ijago lilania ka sikatai samba bibonia bui itiboake pajoat.

¹¹ Kau iareuake tubunia ka sikatai samba igalaiake simaeru; kau igaba paabanan samba ibesiake isese nia.

¹² Aipoi matat Tuhan riuriu le masikinere simaroipo baga samba talingania masiarepi panindogatda sipaninindou paroman, tapoi sigalai sikatai geti isasaggangi le sia si Tuhan.”

¹³ Samba kasei te igagalai sikatai ka tubumui ke mangamang kam masigalai simaeru?

¹⁴ Tapoi ke bai masiorik kam kalulut puroipoat, mauktuk le kam. Oto bui nukalotoake kam kalotoakenenda samba bui imakarat bagamui.

¹⁵ Tapoi puneni le kam Kristus si Tuhan ka bagat paatuatmui. Samba matarek ka senen tetere masialegi senen sipasinonounou kam pagalaiat karoniet bagamui,

¹⁶ tapoi ka leppet baga samba loto le nualegi kam nia. Kau imalina paatuatmui, bule sia sipaloloi kam kalulut paraboatmui simaeru ka bagat Kristus, bailiu maila sia kalulut paloloiatda.

¹⁷ Aipoi masiorik kalulut pasigagalai simaeru pei le maeru, ke iteuake bai Taikamanua, ka pasioorik kalulut mugalai sikatai.

¹⁸ Aipoi Kristus leu matei sangaminca kalulut sangamberi jota, nia simaroipo punu tubut sitaimaroipo, bule iambit sita ka Taikamanua. Tumateiake nia ka bagat pusisirimanua, tapoi tusuruake ka bagat Ketsat.

¹⁹ Samba ka bagat Ketsat nenda leu ei nia masipaarep Katuareman Simaeru ka tubuda saketsat sikuddu ka ukuman,

²⁰ ia te ketsatda sitaimareddet siburu ka teteret aiomake bagania Taikamanua masingena ujut igalai kinapat si Noak; bailiu goiso le, ia te balu le sia amurimanua ka eba.

²¹ Nenda te sibailiu pasikat pasiraukat sipunenan siarauake kam kineneiget; ta pasigolok lolit tubu, tapoi pasitiddou paatuat simaeru le ka Taikamanua kalulut katususurut Jesus Kristus,

²² situsasakai ka sorga samba mukuddu kai kattoet Taikamanua; sangamberi samalaika samba gege samba ron musum ka tubunia.