1Ptr. 2 - BUKO SIPUNENAN

Bukku sipuririmanua samba bangsa sipunenan

¹ Oto ribbaiake le kam sangamberi pukataikat, sangamberi pajoat samba patajuat, sisit baga samba pakataikat nganga.

² Kau ibailiu kam kele tatoga sibau mututu mata, simaoggou suat tottot puketsanan simalina, bule nupuurau kam samba nusilo kam puaragat,

³ ke bulatnia bai anunanaman kam anggai bagat Tuhan.

⁴ Konan kam ka tubunia, bukku sipuririmanua, siribbaiakenenda sirimanua, tapoi ka matat Taikamanua geti sipili samba simakeppu saki le.

⁵ Kam leu, kau tupakei kam kele bukku sipuririmanua pasiriot lalep puketsanan, bailiu kam imam sipunenan, masibuluake buluakenen puketsanan obaket Taikamanua kalulut Jesus Kristus.

⁶ Atusuratnan ka Surat Sipunenan, “Bulatnia kugalakngake ka Sion sara bukku sipili, bukkut taiming simakeppu saki, samba kasei sikatonemi nia, ta tupakakaila.”

⁷ Oto ka kam simatonem baga, makeppu saki nia, ka sia sitaimatonem baga geti, “Bukku siribbaiakenenda tai tukang aibailiuan bukkut taiming,”

⁸ samba “Bailiu bukku tuluiet, samba bukku katusoksongan.” Tusoksok sia sedda kalulut ta mareddet sia ka tiboiet Taikamanua; kisedda te aiteuake Taikamanua ka tubuda.

⁹ Kam geti bangsa sipili le, imam rimata, bangsa sipunenan, bangsa bakkat Taikamanua, bule nupaarep kam beunan sigalainia sipasisosogai kam bela ka gepgep tuguru ka patonia kiseiakenen.

¹⁰ Siburu ta bangsat Taikamanua kam, kineneiget aibailiuan bangsania; siburu ta pukatekiet baga, kineneiget pukatekiet bagangan le.

Repdemen ka siripokat pagugulet Taikamanua

¹¹ Sasaraina kilibet baga, kunganturu kam, kam sitoi sipueekpak, bule nuareuake kam tubumui ka pubotbonan siobat akkula sipasasaggak ka ketsat.

¹² Kau imaeru paraboatmui ka talagada sipuarat sabulungan, bule kenanen ratiboi kam rakua kam sirimanua sikatai, tapoi kalulut raitco sigalaimui simaeru, umunakerangan Taikamanua ka gogoi kaoijanannia.

¹³ Pusum kam ka sangamberi saute sibaraakenen sirimanua kalulut si Tuhan, ele ka rimata, nia poi siukkaake gege simabuak,

¹⁴ ele kai gubernur sikoiniakenen rimata masiukum sigalai sikatai samba masiumun sigalai simaeru.

¹⁵ Aipoi obaket Taikamanua ia te bule kalulut gagalaimui simaeru, petpetnakemuian ngungunda sitaiagai paatuat.

¹⁶ Kau siripot sirimanua sipuuja nupurimanua kam; tapoi bui nupakei kam puujaatmui masitabbo katai, kau le kele pagugulet Taikamanua.

¹⁷ Suru kam sangamberi sirimanua, pununtuki kam baga sasaraina, kalotoake kam Taikamanua, suru kam rimata.

Pangoringan Kristus bailiu uluiet

¹⁸ Kam sapagugulet, kau numareddet kam ka bagat loto ka tai tuanmui, ta sarat ka tubuda simatopit samba simaeru baga, tapoi samba leu ka simagolu.

¹⁹ Panukanan le poi nene ka tubut sirimanua ke kalulut aagaina obaket Taikamanua ibairat gejat baga sitaipasesese sigalaira sirimanua.

²⁰ Aipoi katuumun pa oniakenen ke kalulut jomui nuorik kam bobobo? Tapoi ke kalulut gagalaimui simaeru nuomake kam masiorik paoreat, nene te panukanan Taikamanua.

²¹ Ia poi lulunia aitusogai kam, aipoi Kristus leu amasiorikngan lulumui, aigalakngakean uluietmui, bule nutut kam siperakatnia.

²² Ta anai aigalai jo, samba pajoat ta anai ka ngungunia.

²³ Ka teteret tupaloloi nia, ta aisiliake paloloiat; ka teteret aipasiorik, ta ailumunake, tapoi ka Taikamanua sipasiukum simaroipo le aisegeake nia.

²⁴ Nia le amasibairat jota ka bagat tubunia ka loina siliktenga, bule sita simamatei ka jo, murimanua ka puroipoat. Kalulut maujunia le anumale kam.

²⁵ Amapepengan poi kam siburu kele biribiri, tapoi kineneiget atoilingan kam ka Sipasijajago samba Sipasikeli ketsatmui.