1Ptr. 1 - BUKO SIPUNENAN

Salam

¹ Sibara kai Petrus, apostel Jesus Kristus, masiailiake taitoi simasasaragai ka Pontus, Galatia, Kapadokia, Asia samba Bitinia,

² ia te sipili siripot isiat Taikamanua, Ukkuita, samba silinaakenen Ketsat Sipunenan, bule masireddet Jesus Kristus, samba tusosoki sia logaunia. Bule memei masusun ka tubumui kiliu baga samba aban.

Pukakaronan sipuririmanua

³ Tuumunake le Taikamanua, Ukkui Tuhanta Jesus Kristus, situtuake sita minca siripot beunan katet bagania, tapukaronan sipuririmanua lulut katususurut Jesus Kristus ka simamatei,

⁴ tasilo ikepmakenen sitaimasusuet, sitaimalololit samba sitaimalalaju, situkokoiri ka sorga ka kam.

⁵ Ia te kam pinasikeli ka geget Taikamanua kalulut tonem baga ujumui masingena puaragat simatatarek patoilaket ka gogoi sialu.

⁶ Pugoraji kam baga pagalaiat nene, kenanen ka oggak nene murereureu pei le kam baga kalulut sene ngamata pasisiboat.

⁷ Sangamberinia nene ia te pasimuneng linania tonem bagamui – sisaliu pei le kepput sakit mas simasusuet, sisibo linania ka api – sikau kam masisilo katuumun samba pulatsanan samba pubeunanan ka gogoi katutoilakat Jesus Kristus.

⁸ Kenanen tapei anuitco kam nia, tapoi nupununtuki kam nia baga. Nukatonemi kam nia, kenanen tapei nuitco kam nia kineneiget. Mugora kam baga kalulut angkat baga simalatsat samba sitaioi tutiboi,

⁹ kalulut anusiloan kam buat tonem bagamui, ia te puaragat ketsatmui.

¹⁰ Puaragat nenda te aragaba samba aralelekngake tai nabi sipasipopoiliat kiliu baga akenen Taikamanua ka kam.

¹¹ Ralelekngake kipa samba pigamoi teterenia ipuaili siniboi Ketsat Kristus, sikuddu ka bagada, ia te Ketsat sipasimumunengake pagalaiat paoreat sipuaaili ka tubut Kristus samba pagalaiat pulatsanan pasat nenda.

¹² Aipoiliatnan Taikamanua ka matada, ta tubuda pasikelietda, kam le, ia te pagalaiat sipaarepda kineneiget ka kam sia sikoiniakenen Ketsat Sipunenan sibara ka sorga, masisegeake Katuareman Simaeru ka kam, ia te katuareman simakiddi ka bagada leu samalaika masiagai.

Pananakat murimanua sipunenan

¹³ Oto patarek kam paatuatmui, mumata samba kau kam pukakaronanmui sangamuinenia ka kiliu baga panguruatnakenen ka kam ka teteret katutoilakat Jesus Kristus.

¹⁴ Siripot tatoga simareddet, buian nututnake kam pubotbonanmui siburu ka teteret pepemui pei le.

¹⁵ Tapoi kele Taikamanua sipasisosogai kam sipunenan le nia, kam leu kau ibailiu kam sipunenan ka bagat sangamberi puparaboananmui,

¹⁶ atusuratnakean poi, “Kau numasipunenan kam, aipoi sipunenan le aku.”

¹⁷ Ke nuagai kam nia Ukkui, sitaiiggat masiukum senen sirimanua siripot sigalaira, oto kau numaloto kam murimanua ujumui musitoi ka polak nene.

¹⁸ Anuagaian poi kam, ta bibilet simasusuet kele mas ele perak atukau masitebui kam ka puparaboananmui siboboi pangusunan sibara ka taikebbukatmui,

¹⁹ logau Kristus simakeppu saki le, kele logau biribiri si ta loloiet samba simalina.

²⁰ Enan tapei atubaraake polak atupilingan nia, tapoi kalulut kam ia pei ipatoila tubunia ka gogoi kalepakat.

²¹ Kalulut nia te anukatonemi kam Taikamanua sisuruake nia ka simamatei samba sipasilalatsatnake nia, bailiu Taikamanuangan le katonemietmui samba karonietmui.

²² Anulinaakean poi kam ketsatmui ka purereddet ka pubulanan ioi nugalaiake kam nuntut baga simalina ka sasaraina, kauan sibulatnia nupanuntu kam baga pasasambamui sibara ka muinet paatuat.

²³ Atututuakean poi kam minca ta ka karamen simasusuet, sitaimasusuet le, kalulut tiboiet Taikamanua sipuririmanua samba simatom.

²⁴ Aipoi, “Sangamberi sirimanua kele turuturu le samba latsatnia kele botcoket turuturu. Malalaju le turuturu, botcoketnia leu iraragat,

²⁵ tiboiet Taikamanua geti, riuriu le teret buruburu.” Nene te tiboiet Katuareman Simaeru sinegeakenen ka kam.