1Mos. 9 - BUKO SIPUNENAN

Palelengan Taikamanua pasamba si Noak

¹ Taikamanua masisukatnake si Noak samba tatogania samba kuanangan, “Pupunuteteu simaigi, bule reddenannu masikudduiji sangliot polak.

² Sangamberi uma' samba iba, samba leu tarimeu bagei maloto te geti katum. Sangamberitra ai kabagat kupkumennu.

³ Sangamberinia nenda momoi ibailiu komennu, kele leuet se'se simalimun; sangamberinia nenda Kuake katubum addeat ibailiu komennu.

⁴ Sarat sara le ta'momoi nukom iate akkula aipeile logaunia, aipoi enga nenda ai kabagat logau.

⁵ Senen sirimanua samba tarimeu simateiake sirimanua Kuukum matei geti.

⁶ Sirimanua tugalai kele Aku; aipoi nenda, kasei simateiake sirimanua, imamateiake leuetnia sirimanua.

⁷ Oo, buita mupunuteteu le ekeu simigi, bule sapunuteteunu masikudduiji sangaliot polak.”

⁸ Kuanangan Taikamanua kai Noak samba ka tatogania,

⁹ “Kineigei Kugalai le palelenganKu pasamba ekeu samba sapunuteteunu,

¹⁰ samba sangamberi sipungongoingoi, iate uma' samba sangamberi tarimeu kapolak, sangamberinia sibebela ka kinapat nenda pasamba ekeu.

¹¹ Nene te palelenganKu pasamba ekeu. Mupalelengan le Aku, sangamberi sipungongoingoi taan isusubuake geti eba minca. Taan babara geti minca eba sisubuake polak nene.

¹² Sibailiu toggaiat palelengan sitaimasususu', sigalaiKu pasamba ekeu samba sangamberi sipungongoingoi,

¹³ Kugalakngake le linungKu ka manua sibailiu toggaiat palelenganKu pasamba polak.

¹⁴ Senen-senen, ke'Kupetpet manua pasamba tanai rusa, iageti makoinongnangan linu nenda,

¹⁵ Kurepdep le geti palelenganKu katubum samba katubut sangamberi sipungongoingoi, iate eba taan masisusubuake geti minca sangamberi sipuririmanua.

¹⁶ Ke'bai matoila linu nenda ka manua, Kuitco te geti nia samba Kurepdep le palelengan sitaimasususu' nenda katalagat Aku samba sangamberi sipungongoingoi ka polak.

¹⁷ Nenda te toggaiat palelenganKu siakeKu katubut sangamberi sipungongoingoi ka polak.”

Si Noak samba tatogania

¹⁸ Tatogat Noak sibebela ka kinapat iate si Sem, Jafet samba Ham; (si Ham iate ukkui Kanaan.)

¹⁹ Katelu togat Noak nenda iate taikebbukatda sangamberi sirimanua ka polak.

²⁰ Si Noak sara sipumomone, samba nia te sipuboiki amasigalai monen anggur.

²¹ Lepat ai lo anggurnia, roronangannia. Goloknangan sangamberi bibiletnia lepa perepnia sibulutut kabagat sapounia.

²² Kele ai itconia si Ham ukkui Kanaan, ukkuinia mubulutut, belania samba paagainangan pagalaiat nenda katubut karua sasarainania.

²³ Lepa alanangan si Sem samba si Jafet sara juba samba nganangakenangannia ka ta'ta'ra. Puenungrangan sisoksok masiguruki sapou nenda samba tabborangan ukkuira pasaba juba nenda. Pisikngakerangan matatra bule ta'raitco ukkuira simabulutut nenda.

²⁴ Lepat aiagainia si Noak barania ka roronia samba aiagai apa sigalaiakenen togania sisule katubunia,

²⁵ kuanangan, “Tutelei le si Kanaan! Ibailiu le nia geti pakoinien loloijet ka sasarainania.

²⁶ Umun le si Tuhan, Taikamanuan Sem! Si Kanaan ibailiu le geti pakoinien Sem.

²⁷ Bule Taikamanua masituppai panukanan kai Jafet pasamba masipalio pukudduatnia. Bule punuteteunia mukuddu pasamba punuteteu Sem. Kanaan ibailiu le geti pakoinien Jafet.”

²⁸ Lepat eba nenda si Noak murimanua peilenia minca telungotu lima pulu ngarura.

²⁹ Aitata' si Noak kateteret ainia sibangotu lima pulu ngarura.