1Mos. 8 - BUKO SIPUNENAN

Katukappulat eba

¹ Taikamanua ta'ikakalipogi si Noak samba sangamberi tarimeu sibabara pasambania kabagat kinapat nenda. Igalai le Taikamanua ipuboroi rusa, bailiu oinan nenda taddaakenangan ikainia.

² Sangamberi bubuaket katei polak samba sangamberi matat baliu oinan ka manua luplupmakenangannia. Malegeunangan urat,

³ samba oinan memei ikakai. Pasat sangotu limapulu ngagogoi oinan taan makope buak.

⁴ Kagogoi pulu pitu laggo pitu, kinapat nenda saggat ka sara tutut leleu ka leleu Ararat.

⁵ Oinan riuriu le ikainia samba ka gogoi sara laggo pulu, taddanagan imakoinong sangamberi tu'tut leleu.

⁶ Pasat epet pulu ngagogoi, ngangaakenangan si Noak sara jandelat kinapat,

⁷ lepa belaakenangan sangamuneng uma' kailea. Uma' nenda ta'atoili ka kinapat, tapoi riuriu le ituburut teret bulat kainangan eba nenda.

⁸ Kineneiget, belaakenangan si Noak sangamuneng uma' ngorut addeat masiagai aikaian pa' oinan nenda.

⁹ Tapoi oinan nenda aipeile itatalu sangamberi uddut polak, uma' ngorut nenda ta'aisese' kudduatnia muera'. Iageti toilinia ka kinapat; Totoiakenangan kabeinia si Noak lepa ambitnangannia kabagat kinapat.

¹⁰ Si Noak masingena pitu ngagogoi minca, lepa belaakenangan minca uma' ngorut nenda.

¹¹ Ka legre soibo toili uma' nenda katubunia ambitnangan sangambuiluk buluk zitun sibau ka udduknia. Kineiget si Noak iagai, oinan aikaian.

¹² Lepat aingena pitu ngagogoi minca, belaakenangan ngorut nenda aipei sangaminca; sangaminca nene uma' ngorut nenda ta'an atoili katubunia.

¹³ Kateteret si Noak ainia enemngotu sara ngaruru, ka gogoi sara laggo sara, bulat amagarakngan oinan. Ngangaakenangan si Noak matat baliu kinapat nenda, samba itconangan kasangalionia. Itconangan uddut polak amagarakngan.

¹⁴ Kagogoi rua pulu pitu laggo rua, polak amagarakngan.

¹⁵ Lepa kuanangan Taikamanua kai Noak,

¹⁶ “Belaake ekeu ka kinapat nenda pasamba sinanalepnu, tatogam samba tainanalepra.

¹⁷ Belaake le sangamberi uma' samba tarimeu bagei, sabeu samba leu sigoiso, bule ioi imakakra samba ikudduiji ka sangalio polak.”

¹⁸ Lepa bela si Noak ka kinapat nenda pasamba sinanalepnia, tatogania samba tainanalepra.

¹⁹ Sangamberi uma' samba tarimeu ka polak bela ka kinapat nenda, senen mungkuat ngamataatnia.

²⁰ Si Noak masirioake sara kudduat pasibuluat addeat Tuhan. Alanangan pasasangamuneng ka senengamata uma' tarimeu bagei sitaikasitsitnakenen, lepa panguruatnakenangannia sibailiu panguruat silabo ka uddut kudduat pasibuluat nenda.

²¹ Singin tubut panguruatnakenen buluakenen nenda masiangkaake bagat Tuhan, samba Ikua kapaatuat, “Taan Kutetelei geti polak nene kalulut galaitubut sirimanua; Akuagaian, kateteret bau tubunia, paatuat sirimanua nenda makatai. Taan Kususubuake geti minca sangamberi sipungongoingoi kele sigalaiKu simaruei nene.

²² Ujut kababarat polak nene, sarat ai le tetere mangurep samba masimonei, gogoi simaleppet samba simaoloi, gogoi simalegeu samba simaurat, sinago samba sinoibo.”