1Mos. 7 - BUKO SIPUNENAN

Eba

¹ Lepa kuanangan si Tuhan kai Noak, “Akuitco ekeu saram le sirimanua sipasigagalaiake siobat bagaKu. Oto, tuguru le kabagat kinapat nenda pasamba sangamberi keluargam.

² Ambit leuet pitu ngamuneng simateu samba pitu ngamuneng sinanalep sibara ka senengamata uma' samba tarimeu bagei sitaikasitsitnakenen, tapoi kasenen uma' samba tarimeu kasitsitnakenen sara simanteu samba sara sinanalep le.

³ Galaiake le nenda bule ka senengamata tarimeu ai sibebela sibara katusubuat samba momoi ramakakra minca ka polak.

⁴ Ai pei pitunga gogoi Kubebeleake urat sitaimalelegeu ujunia epat pulu ngata'go epat pulunga soibo, bule sigalaiKu sipuririmanua nenda masubu.”

⁵ Lepa galaiakenangan si Noak sangamberi siparentaakenen Tuhan katubunia.

⁶ Si Noak ainia enemngotu ngarura, keteteret aibara eba sabeu ka polak.

⁷ Si Noak samba sinanalepnia, samba tatogania pasamba sinanalepra, tuguru' kabagat kinapat nenda addeat masibelaake tubu ka eba sabeu nenda.

⁸ Sangamuneng simanteu samba sangamuneng sinanalep ka senengamata uma' samba tarimeu bagi – ta'kasitsitnakenen samba kasitsitnakenen –

⁹ tuguru' kabagat kinapat nenda pasamba si Noak, siripot parentat Taikamanua.

¹⁰ Pasat pitu ngagogoi oi eba sabeu masikuilu' polak.

¹¹ Kateteret nenda si Noak ainia enemngotu ngarura, ka gogoi pulu pitu laggo rua, maragatnangan sangamberi bubuaket katei polak. Sangamberi matat baliu oinan ka manua tunga'nganangan,

¹² samba bele urat ujunia epat pulu ngata'go epat pulu ngasoibo.

¹³ Ka gogoi nenda leuet, si Noak samba sinanalepnia tuguru' kabagat kinapat nenda pasamba telu togania, iate si Sem, Jafet samba Ham pasamba sinanalepra.

¹⁴ Pasamba sia tuguru' leuet senengamata uma' samba tarimeu bagei, simaam samba simalia, sabeu samba leu sigoiso.

¹⁵ Sangamuneng simanteu samba sangamuneng sinanalep sibara ka senengamata sipungongoingoi guru' kabagat kinapat nenda pasamba si Noak,

¹⁶ siripot parentat Taikamanua katubunia. Lepa aituguru sangamberinia. Luplupmakenangan matat baliu kinapat si Tuhan.

¹⁷ Eba nenda mariuriu le ipasikuilu ujunia epat pulu ngagogoi, samba oinan ibailiu mabuak pat oinangan iputekbuk kinapat nenda.

¹⁸ Oinan memei mabubuak, samba kinapat nenda putekbuknangan ka uddut oinan.

¹⁹ Oinan nenda riuriu le imakeru, pat talunangan leleu simakope buak.

²⁰ Oinan riuriu le imabuak pat aili pulu lima eto barania ka uddut leleu.

²¹ Isubuake le si Tuhan senengamata sipungngoingoi ka polak nene:

²² Sirimanua, uma' samba tarimeu ka polak, sigoiso samba leu sabeu.

²³ Sitaimasusubu geti sarat si Noak le samba sangamberi sibabara pasambania kabagat kinapat nenda.

²⁴ Oinan nenda ta'magagarak sangotu limapulu ngagogoi ujunia.